Read ქართული ბიბლია, სრული ვერსია Judges 10 Bible Online

Judges 10 - ქართული ბიბლია, სრული ვერსია bible

Judges 10

¹აბიმელექის შემდგომ აღდგა თოლაყი, ძე ფუვასი, ძისა დოდოსი, ისაქარის ტომისა, ისრაელის გამომხსნელად. იგი ცხოვრობდა შამირში, ეფრემის მთაზე.

²და განსჯიდა ისრაელს 23 წელიწადს, და მოკვდა და დაიმარხა შამირში.

³მის შემდგომ გამოჩნდა გალაადელი იაირი და განსჯიდა ისრაელს 22 წელი.

⁴და ჰყავდა მას 30 ვაჟი, და ყოველ მათგანს თავისი სახედარი ჰყავდა; და ჰქონდათ მათ 30 ქალაქი, დღემდე ხავოთ-იაირად წოდებული, გალაადის ქვეყანაში რომ არის.

⁵და მოკვდა იაირი და დაიმარხა კამონში.

⁶და კვლავ იწყეს ისრაელის ძეთ უფლის თვალში საძაგელი საქმეების კეთება: ემსახურებდნენ ბაყალებს და ყაშთორეთებს, არამისა და ციდონის ღმერთებს, მოაბისა და ყამონელთა ღმერთებს, და ფილისტიმელთა ღმერთებს; და მიატოვეს უფალი და აღარ ემსახურებოდნენ მას.

⁷და აღეგზნო რისხვა უფლისა ისრაელზე და ჩაყარა ისინი ფილისტიმელთა და ყამონელთა ხელში.

⁸და იმ წლიდან მოკიდებული ავიწროებდნენ და ჩაგრავდნენ ისრაელის ძეთ 18 წლის მანძილზე; ყოველი ისრაელის ძე დაიმონეს, ვინც იორდანეს გაღმა ცხოვრობდა ამორეველების ქვეყანაში — გალაადში რომ არის.

⁹და გადალახეს ყამონის ძეთ იორდანე, რომ იუდას, ბენიამინისა და ეფრემის სახლს შებრძოლებოდნენ, და ძლიერ გაუჭირდა ისრაელს.

¹⁰და შეჰღაღადეს ისრაელის ძეთ უფალს და უთხრეს: „შეგცოდეთ შენ, რადგან მივატოვეთ ჩვენი ღმერთი და ვემსახურებოდით ბაყალებს!“

¹¹და უთხრა უფალმა ისრაელის ძეთ: „ხომ დაგიხსენით ეგვიპტელთაგან, ამორეველთაგან, ყამონელთაგან, ფილისტიმელთაგან,

¹²და ციდონელები, ყამალეკი, და მაყონი, გავიწროებდნენ თქვენ; და როცა კი შემოგიღაღადებიათ ჩემთვის, ხომ მიხსნიხართ მათ ხელთაგან?

¹³მაგრამ თქვენ მიმატოვეთ და ემსახურებოდით სხვა ღმერთებს, ამიტომ აღარ გიხსნით თქვენ.

¹⁴წადით და შეჰღაღადეთ თქვენს მიერ არჩეულ ღმერთებს, მათ გიხსნან თქვენს გასაჭირში!“

¹⁵და უთხრეს ისრაელის ძეთ უფალს: „შევცოდეთ ჩვენ! და გვიყავი, რაც გენებოს, ოღონდ დღეს გვიხსენი.“

¹⁶და განიშორეს უცხო ღმერთები და ემსახურებოდნენ უფალს. და ვეღარ გაუძლო უფლის სულმა ისრაელის ტანჯვა-წამების ყურებას.

¹⁷და შეიყარნენ ყამონელები და გალაადში დაბანაკდნენ. ისრაელის ძენიც შეიყარნენ და დაბანაკდნენ მიცფაში.

¹⁸და გალაადის ხალხმა და მთავრებმა უთხრეს ერთმანეთს: „ვინც პირველი შეებრძოლება ყამონელებს, ის იყოს გალაადის მკვიდრთა წინამძღოლი.“