Read ქართული ბიბლია, სრული ვერსია Judges 6 Bible Online

Judges 6 - ქართული ბიბლია, სრული ვერსია bible

Judges 6

¹და როცა ისრაელის ძეთ იწყეს ისეთი საქმეების კეთება, რაც უფლისთვის სისაძაგლე იყო, უფალმა ხელში ჩაუგდო ისინი მიდიანს შვიდი წლით.

²დამძიმდა მიდიანის ხელი ისრაელზე, და ისრაელის ძეთ იწყეს გახიზვნა კლდის ნაპრალებში, გამოქვაბულებსა და მიუვალ ადგილებში.

³და როგორც კი ისრაელი ხვნა-თესვას მორჩებოდა, ამოდიოდნენ მიდიანელნი, ყამალეკელნი და აღმოსავლეთის ტომები,

⁴ბანაკებს აწყობდნენ მათ წინ, და აჩანაგებდნენ ქვეყნის მოსავალს ღაზამდე, და არ უტოვებდნენ საზრდოს ისრაელიანთ — არც ცხვარს, არც ხარს და არც სახედარს.

⁵რადგან ისინი ამოდიოდნენ თავიანთი ჯოგებითა და კარვებით. მოდიოდნენ კალიასავით ურიცხვნი, ვერ დაითვლიდი ვერც მათ და ვერც მათ აქლემებს. მოდიოდნენ და ძარცვავდნენ ქვეყანას.

⁶და მთლად გაღატაკდა ისრაელი მიდიანელთაგან, და შეჰღაღადეს ისრაელის ძეთ უფალს.

⁷და როცა შეჰღაღადეს ისრაელის ძეთ უფალს მიდიანის გამო,

⁸მოუვლინა უფალმა მათ წინასწარმეტყველი კაცი, რომელმაც უთხრა მათ: „ასე ამბობს უფალი, ისრაელის ღმერთი: მე გამოგიყვანეთო ეგვიპტიდან, გამოგიყვანეთ მონობის სახლიდან;

⁹გიხსენით ეგვიპტელთა ხელიდან და ყველა თქვენი მჩაგვრელის ხელიდან, და განვდევნე ისინი თქვენგან, და მოგეცით მათი ქვეყანა,

¹⁰და გითხარით: მე ვარ უფალი, თქვენი ღმერთი, არ ირწმუნოთ-მეთქი ამორეველებისა, რომელთა ქვეყანაშიც თქვენ მკვიდრობთ, მაგრამ არ შეისმინეთ ჩემი ხმა.“

¹¹და მოვიდა უფლის ანგელოზი, და დაჯდა ყოფრაში, მუხის ქვეშ, რომელიც ეკუთვნოდა იოაშს, აბიყეზერის შთამომავალს; და გედეონი, მისი ვაჟი, ხორბალს ცეხვავდა საწნახელში, რათა გადაემალა მიდიანელთაგან.

¹²და გამოეცხადა მას უფლის ანგელოზი, და უთხრა: „უფალი შენთანაა, მამაცო მებრძოლო!“

¹³და უთხრა მას გედეონმა: „ვაგლახ, ჩემო ბატონო, თუ უფალი ჩვენთან არის, მაშ რაღათ დაგვემართა ეს ყოველივე? აბა სად არის მისი სასწაულები, ჩვენი მამები რომ გვიყვებოდნენ: ‘ეგვიპტიდან გამოგვიყვანაო უფალმა?’ ახლა კი მიგვატოვა უფალმა და მიდიანის ხელში ჩაგვაგდო!“

¹⁴მაგრამ მიუბრუნდა მას უფალი და უთხრა: „წადი მაგ შენი ძალითა და იხსენ ისრაელი მიდიანის ხელიდან. მე გაგზავნი შენ.“

¹⁵და უთხრა მას გედეონმა: „მომხედე, ჩემო ბატონო! როგორ ვიხსნი მე ისრაელს, როცა ჩემი საგვარეულო ყველაზე მცირეა მანაშეს ტომში, და მეც ნაბოლარა ვარ მამაჩემის სახლში.“

¹⁶და უთხრა მას უფალმა: „მე ვიქნები შენთან და ისე სძლევ მიდიანს, როგორც ერთ კაცს.“

¹⁷და უთხრა მას გედეონმა: „თუ მე მადლი ვპოვე შენს თვალში, რაიმე ნიშანი მიჩვენე, რომ შენ მელაპარაკები.

¹⁸ნუ წახვალ აქედან ჩემს მოსვლამდე, და ძღვენს გამოვიტან და დავდებ შენს წინაშე.“ და მან უპასუხა: „აქ დაგიცდი, ვიდრე დაბრუნდები.“

¹⁹და წავიდა გედეონი, და მოამზადა თიკანი და ერთი ეფა ფქვილის ხმიადები. ხორცი კალათში ჩააწყო, და წვენი ქოთანში ჩაასხა და გამოუტანა მას მუხის ქვეშ, და მიართვა.

²⁰და უთხრა მას ღმერთის ანგელოზმა: „აიღე ხორცი და ხმიადები და დააწყვე ამ კლდის თავზე და წვენი ზედ დაასხი.“ და ასეც მოიქცა გედეონი.

²¹და გაიწოდა უფლის ანგელოზმა კვერთხი, ხელში რომ ეჭირა, შეახო ხორცსა და ხმიადებს და ავარდა ცეცხლი ტინიდან, და შთანთქა ხორცი და ხმიადები ცეცხლმა; და უფლის ანგელოზი თვალს მიეფარა.

²²და მიხვდა გედეონი, რომ ეს უფლის ანგელოზი იყო და დაიჩივლა: „ვაგლახ მე, უფალო ღმერთო! პირისპირ ვიხილე უფლის ანგელოზი!“

²³და უთხრა მას უფალმა: „მშვიდობა შენდა! ნუ გეშინია, არ მოკვდები.“

²⁴და სამსხვერპლო აუგო იქ გედეონმა უფალს, და უწოდა მას: „უფალი მშვიდობაა.“ იგი დღევანდელ დღემდე დგას აბიყეზერელთა ყოფრაში.

²⁵და იმ ღამეს უთხრა მას უფალმა: „წაიყვანე მოზვერი მამაშენის ხარებიდან, და მეორე შვიდი წლის ზვარაკი; და დაანგრიე ბაყალის სამსხვერპლო, მამაშენს რომ აქვს, ხოლო აშერა, რომელიც მის გვერდითაა, აჩეხე.

²⁶და აუგე უფალს, შენს ღმერთს, სამსხვერპლო ამ კლდის თავზე თავისი წესით, და მეორე ზვარაკი აღუვლინე სრულადდასაწველად იმ აშერას შეშით, რომელსაც აჩეხავ.“

²⁷და წაიყვანა გედეონმა ათი კაცი თავის მსახურთაგან, და ისე მოიქცა, როგორც უფალმა უთხრა; და რაკი თავისი მამისსახლის და ქალაქის მკვიდრების შიში ჰქონდა, ვერ გაბედა, დღისით გაეკეთებინა, ამიტომ ღამით გააკეთა.

²⁸და ადგნენ დილით იმ ქალაქის მკვიდრნი და აჰა, ბაყალის სამსხვერპლო დანგრეულია და აშერა, მის გვერდით რომ იყო, აჩეხილი; მეორე ზვარაკი კი ახლადაგებულ სამსხვერპლოზე იწვის.

²⁹და ჰკითხეს ერთმანეთს: ვინ ჩაიდინაო ეს საქმე? და გამოიძიეს და გამოიკვლიეს, და გაიგეს, რომ გედეონმა, იოაშის ძემ, ჩაიდინა ეს.

³⁰და უთხრეს ქალაქის მკვიდრებმა იოაშს: „გამოიყვანე შენი ძე, ის უნდა მოკვდეს, რადგან ბაყალის სამსხვერპლო დაანგრია და მის გვერდით აშერა აჩეხა.“

³¹და უთხრა იოაშმა ყველას, ვინც მას მიუხდა: „ნუთუ თქვენ უნდა გამოესარჩლოთ ბაყალს, ნუთუ თქვენ უნდა იხსნათ იგი? ვინც მას გამოესარჩლება, იგი განთიადამდე მოკვდება. თუ ღმერთია იგი, თავად გამოესარჩლოს თავის თავს, როცა ანგრევენ მის სამსხვერპლოს!“

³²და იმ დღეს უწოდეს გედეონს იერუბაყალი, რაც ნიშნავს: „თავად ბაყალმა გასცეს პასუხი.“ ბაყალის სამსხვერპლო ხომ მან დაანგრია.

³³და მთელი მიდიანი და ყამალეკი, და აღმოსავლეთის ტომები ერთად შეიყარნენ და მოვიდნენ და დაიბანაკეს იზრეყელის ველზე.

³⁴და უფლის სულმა მოიცვა გედეონი: და მან ბუკსა ჰკრა და თავი მოიყარეს აბიყეზერელებმა მის უკან.

³⁵მაცნეები დაგზავნა და მთელი მანაშეს ტომი მასთან მოვიდა; მაცნეები გაუგზავნა აშერის, ზებულუნისა და ნაფთალის ტომებს — და ეს ტომებიც გამოვიდნენ საომრად.

³⁶და უთხრა გედეონმა ღმერთს: „შენ მართლა აპირებ, ჩემი ხელით იხსნა ისრაელი, როგორც მპირდებოდი?

³⁷აჰა, საწმისს გავშლი კალოზე: თუ ცვარი მხოლოდ საწმისზე იქნება, მთელი მიწა კი მშრალი, მაშინ გავიგებ, რომ ჩემი ხელით იხსნი ისრაელს, როგორც ამბობდი.“

³⁸და ასეც მოხდა: მეორე დღეს დილაადრიანად ადგა გედეონი, გამოწურა საწმისი და გამოადინა ნამი, წყლით სავსე ერთი თასი.

³⁹და უთხრა გედეონმა ღმერთს: „ნუ აღიგზნება შენი რისხვა ჩემზე, თუ კიდევ ერთხელ გეტყვი, რომ მხოლოდ ერთხელ კიდევ გამოვცადო საწმისი: მხოლოდ საწმისი იყოს მშრალი და მთელ მიწაზე კი ცვარი იდოს.“

⁴⁰და ასეც მოახდინა ღმერთმა იმ ღამეს. მხოლოდ საწმისი იყო მშრალი, მთელ მიწაზე კი ცვარი იდო.