Read ქართული ბიბლია, სრული ვერსია Prayer of Manasseh 1 Bible Online

Prayer of Manasseh 1 - ქართული ბიბლია, სრული ვერსია bible

Prayer of Manasseh 1

¹უფალო ყოვლისმპყრობელო, ჩვენი მამა-პაპის — აბრაამის, ისაკის, იაკობისა და მათი მართალი მოდგმის ღმერთო,

²რომელმაც შეჰქმენი ცა და მიწა მთელი მათი დიდებულებით,

³დაიურვე ზღვა შენი განგების სიტყვით და დაგმანე უფსკრული შენი საშინელი და დიადი სახელით,

⁴რომელიც ყველას თავზარსა სცემს და ძრწიან შენი ძალმოსილების წინაშე.

⁵რადგანაც წინააღუდგომელია შენი დიდების ბრწყინვალება და გაუსაძლისია შენი რისხვა, ცოდვილებს რომ დაატეხ თავზე.

⁶მაგრამ განუზომელია და გონებამიუწვდომელი მოწყალება შენი აღთქმისა.

⁷რადგანაც შენა ხარ უფალი უზენაესი, ლმობიერი, სულგრძელი და მრავალმოწყალე, კაცთა ცოდვების გამო მონანული.

⁸შენი ლმობიერების სიუხვით დაუწესე, უფალო, სინანული და აღუთქვი ცოდვათა მიტევება შენს მიმართ შემცოდეთ.

⁹უფალო, მართალთა ღმერთო, არ დაგიწესებია სინანული მართალთათვის — აბრაამის, ისაკისა და იაკობისთვის, არამედ მე, ცოდვილს, დამიწესე სინანული,

¹⁰რადგანაც ზღვის ქვიშაზე უმეტესია ჩემი ცოდვები და იმრავლა ჩემმა ურჯულოებამ, უფალო; იმრავლა და არა ვარ ღირსი იმისა, რომ ცის სიმაღლეს ვუმზერდე ჩემი ურიცხვი უსამართლობის გამო.

¹¹წელში მოვხრილვარ რკინის ბორკილთა სიმძიმით, ასე რომ, თავიც კი ვერ ამიწევია, და არა მაქვს მოსვენება, რადგანაც განგარისხე, უკუღმართად ვიქცეოდი შენს წინაშე, არ აღვასრულე შენი ნება, არ დავიცავი შენი მცნებანი, დავამკვიდრე სიბილწე და ვამრავლე საცთური.

¹²ახლა კი მომიდრეკია ჩემი გულის მუხლი და შეწყალებას გემუდარები.

¹³ვცოდე, უფალო, ვცოდე და ჩემი ურჯულოებანი მე თვითონ ვიცი.

¹⁴და მაინც გევედრები, მომიტევე, უფალო, მომიტევე, ნუ დამღუპავ ჩემი ურჯულოების გამო და სუკუნოდ ნუ გამწირავ ქვესკნელისათვის, რადგანაც შენა ხარ მონანულთა ღმერთი.

¹⁵მოავლინე ჩემზე შენი სიკეთე და მიხსენი მე, უღირსი, შენი უსაზღვრო გულმოწყალებით.

¹⁶და მთელი ჩემი დღე და მოსწრება შენი მადიდებელი ვიქნები, რადგანაც შენ გიგალობენ ზეცის ყოველნი ძალნი და შენია დიდება უკუნითი უკუნისამდე. ამინ.