Read ქართული ბიბლია, სრული ვერსია 1 Samuel 5 Bible Online

1 Samuel 5 - ქართული ბიბლია, სრული ვერსია bible

1 Samuel 5

¹წაიღეს ფილისტიმელებმა ღვთის კიდობანი და ებენყეზერიდან აშდოდში მიიტანეს.

²აიღეს ფილისტიმელებმა ღვთის კიდობანი და შეიტანეს დაგონის ტაძარში, და გვერდით დაუდგეს დაგონს.

³და როცა მეორე დღეს დილაადრიანად ადგნენ აშდოდელები, ნახეს, რომ უფლის კიდობნის წინ პირქვე გდია დაგონი. ააყენეს დაგონი და კვლავ თავის ადგილას დადგეს.

⁴და როცა ადგნენ შემდეგ დღეს დილაადრიანად, ნახეს, რომ პირქვე გდია დაგონი უფლის კიდობნის წინ. დაგონის მოგლეჯილი თავი და ხელ-ფეხი ყრია ზღურბლთან, მარტო ტანიღა შერჩენია.

⁵ამიტომაც ერიდებიან აშდოდში დაგონის ქურუმები და დაგონის ტაძარში შემსვლელნი დაგონის ზღურბლზე დაბიჯებას დღემდე.

⁶დამძიმდა უფლის ხელი აშდოდელებზე — ანადგურებდა და გვემდა მათ ბუგრებით მთელს აშდოდსა და მის შემოგარენში.

⁷როცა ხედავდნენ აშდოდის მკვიდრნი, რაც ხდებოდა, ამბობდნენ: „არ უნდა დარჩეს ჩვენთან ისრაელის ღვთის კიდობანი, რადგან მძიმეა მისი ხელი ჩვენზე და დაგონზე, ჩვენს ღმერთზე.“

⁸მათ გაგზავნეს და შეკრიბეს თავისთან ყველა ფილისტიმელი მთავარი და იკითხეს: „რა ვუყოთ ისრაელის ღვთის კიდობანს?“ მათ თქვეს: „გათში წაიღეთ ისრაელის ღვთის კიდობანი.“ და გადაიტანეს ისრაელის ღვთის კიდობანი გათში.

⁹მას შემდეგ, რაც მიიტანეს იგი, უფლის ხელი იყო ქალაქზე, ატყდა დიდი ჩოჩქოლი; გვემა უფალმა ქალაქის მკვიდრნი დიდიან-პატარიანად, და ბუგრები გამოაჩნდა ხალხს.

¹⁰და გაგზავნეს ღვთის კიდობანი ყეკრონს. როცა მივიდა ყეკრონში ღვთის კიდობანი, აყვირდნენ ყეკრონელები და ამბობდნენ: „მოგვიტანეს ისრაელის ღვთის კიდობანი, რომ ამოგვხოცონ ჩვენცა და ჩვენი ხალხიც!“

¹¹შეუთვალეს და შეკრიბეს ფილისტიმელთა ყველა მთავარი და თქვეს: „დააბრუნეთ ისრაელის ღვთის კიდობანი თავის ადგილას, რომ არ ამოგვხოცოს ჩვენცა და ჩვენი ხალხიც!“ რადგან მომაკვდინებელი შიშის ზარი იყო მთელს ქალაქში, მეტისმეტად დამძიმდა მათზე უფლის ხელი.

¹²და ის, ვინც სიკვდილს გადაურჩა, ბუგრით იგვემებოდა, და ცას სწვდებოდა ქალაქის ღაღადისი.