Read ქართული ბიბლია, სრული ვერსია 1 Samuel 6 Bible Online

1 Samuel 6 - ქართული ბიბლია, სრული ვერსია bible

1 Samuel 6

¹შვიდ თვეს იყო უფლის კიდობანი ფილისტიმელთა ქვეყანაში.

²მოიხმეს ფილისტიმელებმა ქურუმები და მისნები და უთხრეს: „რა ვუყოთ უფლის კიდობანს? გვასწავლეთ, როგორ გავგზავნოთ თავის ადგილას.“

³მათ მიუგეს: „თუ ისრაელის ღვთის კიდობნის გაგზავნა გინდათ, ცარიელს ნუ გაგზავნით, არამედ შესწირეთ ისრაელის ღმერთს დანაშაულის მსხვერპლი. მაშინ განიკურნებით და გაიგებთ, რატომ არ გეშვებათ მისი ხელი.“

⁴მათ კი თქვეს: „რა უნდა შევწიროთ დანაშაულის მსხვერპლად?“ მიუგეს: „ხუთ-ხუთი ოქროს ბუგრი და ხუთ-ხუთი ოქროს თაგვი ფილისტიმელთა მთავრების რიცხვისამებრ, რადგან ერთი სასჯელია თქვენზე და თქვენს მთავრებზე.

⁵ჩამოასხით თქვენი ბუგრების მსგავსი ბუგრები და თქვენი თაგვების მსგავსი თაგვები, რომლებიც აჩანაგებენ ქვეყანას და პატივს მიაგებთ ამით ისრაელის ღმერთს. ეგებ შეამსუბუქოს ხელი თქვენზე, თქვენს ღმერთებსა და თქვენს ქვეყანაზე.

⁶ეგვიპტელებისა და ფარაონის მსგავსად რატომ ისასტიკებთ გულს? განა არ გაუშვეს მათ ხალხი, როგორც კი გაამწარა ისინი უფალმა?

⁷ახლა ადექით და ერთი ახალი ურემი გააკეთეთ. გამოარჩიეთ ორი მეწველი, უღელდაუდგმელი ფური და შეაბით ურემში, მათი ხბორები კი მოაშორეთ და შინ დატოვეთ;

⁸აიღეთ უფლის კიდობანი და ურემზე შედგით. ყუთში ოქროს ნივთები ჩააწყვეთ, რომელთაც დანაშაულის მსხვერპლად ატანთ და გვერდით მიუდგით კიდობანს. მერე გაუშვით, და წავიდეს საითაც უნდა.

⁹თვალი გააყოლეთ და თუ თავისი ქვეყნის გზას დაადგა, ბეთ-შემეშისკენ, მას მოუწევია ჩვენს თავზე ეს დიდი უბედურება; თუ არა და, გვეცოდინება, რომ მის ხელს არ ვუგვემივართ, შემთხვევით დაგვტეხია თავს ეს ამბავი.“

¹⁰ასეც მოიქცნენ: გამოარჩიეს ორი მეწველი ფური და ურემში შეაბეს. ხბორები კი შინ დაამწყვდიეს.

¹¹ურემზე შედგეს უფლის კიდობანი და სკივრი ოქროს თაგვებითა და თავიანთი ბუგრებით.

¹²პირდაპირ ბეთ-შემეშის გზას დაადგნენ ფურები. ერთ გზას მიჰყვებოდნენ და ბღაოდნენ, არც მარჯვნივ გადაუხვევიათ, არც მარცხნივ. უკან ფილისტიმელთა მთავრები მისდევდნენ ბეთ-შემეშის საზღვრამდე.

¹³ბეთ-შემეშელნი ამ დროს პურს მკიდნენ მინდორში. და როცა გაიხედეს და კიდობანი დაინახეს, გაუხარდათ მისი დანახვა.

¹⁴ბეთ-შემეშელი იოშუაყის ყანაში შევიდა ურემი და იქ გაჩერდა. დიდი ლოდი იდო იქ. მათ ურემი შეშად დაჩეხეს და ფურები სრულადდასაწველ მსხვერპლად აღუვლინეს უფალს.

¹⁵უფლის კიდობანი და სკივრი, რომელიც მასთან ერთად იდო და რომელშიც ოქროს ნივთები ელაგა, ლევიანებმა გადმოიღეს და იმ დიდ ლოდზე დადგეს. ბეთ-შემეშელებმა იმავე დღეს მოიტანეს სრულადდასაწველი და საკლავი დაუკლეს.

¹⁶ეს რომ დაინახა ფილისტიმელთა ხუთმა მთავარმა, იმავე დღეს გაბრუნდა უკან ყეკრონისაკენ.

¹⁷აი, ოქროს ბუგრები, რომლებიც უფალს შესწირეს ფილისტიმელებმა დანაშაულის მსხვერპლად: ერთი აშდოდისათვის იყო, ერთი — ღაზასთვის, ერთი — აშკელონისთვის, ერთი — გათისთვის, ერთიც — ყეკრონისთვის.

¹⁸იყო აგრეთვე ოქროს თაგვები ფილისტიმელთა ქალაქების რიცხვისამებრ, რომლებიც ეკუთვნოდა ხუთ მთავარს — ციხესიმაგრიანი ქალაქებიდან მოყოლებული უგალავნო დაბებამდე, და დიდ ლოდამდე, სადაც დაასვენეს უფლის კიდობანი, და ის დღემდე ბეთ-შემეშელი იოშუაყის მინდორში იმყოფება.

¹⁹და უფალმა მოსრა ბეთ-შემეშელნი იმის გამო, რომ მათ ჩაიხედეს უფლის კიდობანში. და მოსრა ხალხიდან 70 კაცი. მოთქვამდა ყველა, რადგან დიდი მოსვრით მოსრა უფალმა ხალხი.

²⁰და თქვეს ბეთ-შემეშელებმა: „ვინ დაუდგება უფალს, ამ წმიდა ღმერთს? და ვისთან წავა ის ჩვენგან?“

²¹გაუგზავნეს მოციქულები კირიათ-იეყარიმელებს და შეუთვალეს: „ფილისტიმელებმა დააბრუნეს უფლის კიდობანი, ჩამოდით და წაიღეთ.“