Read ქართული ბიბლია, სრული ვერსია 1 Samuel 8 Bible Online

1 Samuel 8 - ქართული ბიბლია, სრული ვერსია bible

1 Samuel 8

¹როცა მოხუცდა სამუელი, მსაჯულებად თავისი შვილები დაადგინა ისრაელზე.

²სახელი მისი პირმშოსი იყო იოელი, ხოლო მეორეს აბია ერქვა; ბეერ-შებაყში იყვნენ ისინი მსაჯულებად.

³მაგრამ არ გაჰყვნენ შვილები მამის გზას: ანგარებას მისდევდნენ, ქრთამებს იღებდნენ და სამართალს ამრუდებდნენ.

⁴შეიკრიბა ისრაელის ყველა უხუცესი და მიადგა სამუელს რამაში,

⁵და უთხრეს: „აჰა, შენ მოხუცდი და შენი შვილები არ მიჰყვებიან შენს გზებს; დაგვისვი ახლა მეფე, რომ განგვსჯიდეს, როგორც სხვა ხალხებშია წესად.“

⁶არ მოეწონა ეს სიტყვა სამუელს, რაკი მათ თქვეს, მეფე მოგვეცი, რომელიც ჩვენ გაგვსჯისო. მაშინ ილოცა სამუელმა უფლის მიმართ.

⁷უთხრა უფალმა სამუელს: „გაუგონე ხალხს ყველაფერი, რასაც გეტყვიან, რადგან შენ კი არ უარგყვეს, არამედ მე უარმყვეს, რათა არ ვიმეფო მათზე.

⁸როგორც იქცეოდნენ იმ დღიდან, რაც ეგვიპტიდან გამოვიყვანე, დღემდე, როცა დამივიწყეს და უცხო ღმერთებს დაემონენ, ასევე გექცევიან შენც.

⁹ახლა გაუგონე მათ ხმას; ოღონდ გააფრთხილე და აუხსენი უფლებები მეფისა, რომელიც მათზე იბატონებს.“

¹⁰გადასცა სამუელმა უფლის ყველა სიტყვა ხალხს, მეფეს რომ მოითხოვდნენ.

¹¹და უთხრა: „აი, რა უფლებები ექნება მეფეს, რომელიც თქვენზე იბატონებს: წაიყვანს თქვენს შვილებს და თავის საომარ ეტლებთან დაიყენებს და თავის მხედრებად იყოლიებს, და ირბენენ მისი ეტლის წინ;

¹²და დააყენებს მათ ათასისთავებად და ერგასისთავებად; თავისი მინდვრების მხვნელებად და მომკელებად; თავისი საბრძოლო საჭურვლისა და ეტლების მკეთებლებად.

¹³წაიყვანს თქვენს ასულებს მენელსაცხებლეებად, მზარეულებად და ხაბაზებად.

¹⁴წაგართმევთ საუკეთესო მინდვრებს, ვენახებსა და ზეთისხილის ბაღებს და თავის კარისკაცებს გადასცემს.

¹⁵მეათედს აიღებს თქვენი ნათესებიდან და ვენახებიდან, და თავის საჭურისებს და მსახურებს დაურიგებს.

¹⁶წაგართმევთ საუკეთესო ყმებს, მხევლებს, მსახურ ბიჭებს, სახედრებს და თავის საქმეზე მოიმსახურებს.

¹⁷წაასხამს მეათედს თქვენი ფარებიდან და თქვენც მისი მონები გახდებით.

¹⁸და როცა გმინვა აღმოგხდებათ თქვენი არჩეული მეფის გამო, აღარ გიპასუხებთ უფალი.“

¹⁹მაგრამ არ დაუჯერა ხალხმა სამუელს და თქვა: „არა და არა, მეფე უნდა გვყავდეს,

²⁰ჩვენც სხვა ხალხების მსგავსად ვიქნებით: ჩვენი მეფე განგვსჯის, ის გვიწინამძღვრებს და ჩვენთან ერთად იბრძოლებს!“

²¹მოისმინა სამუელმა ხალხის ყოველი სიტყვა და აუწყა უფალს.

²²მაგრამ უფალმა უთხრა სამუელს: „ყურად იღე მათი სიტყვა და დაუდგინე მეფე!“ და უთხრა სამუელმა ისრაელის კაცებს: წადითო, თქვენ-თქვენს ქალაქებში!