Read ბიბლია დაბ. 11 Bible Online

დაბ. 11 - ბიბლია bible

დაბ. 11

¹და ჰქონდა მთელ ქვეყანას ერთი ენა და ერთი სიტყვა.

²და როცა დაიძრნენ აღმოსავლეთიდან, შინყარის ქვეყანაში ჰპოვეს ველი და დამკვიდრდნენ იქ.

³და თქვეს: „მოდი, გავაკეთოთ აგურები და გამოვწვათ ცეცხლში“. და ჰქონდათ აგური ქვის ნაცვლად და ფისი — კირად.

⁴და თქვეს: „მოდი, ავიშენოთ ქალაქი და გოდოლი, რომლის თავიც ზეცას მისწვდება. და ასე შევიქმნათ სახელი, ვიდრე გავიფანტებით მთელი ქვეყნის პირზე“.

⁵და ჩამოვიდა უფალი, რათა ენახა ქალაქი და გოდოლი, რომელსაც აშენებდნენ ადამიანების ძეები.

⁶და თქვა უფალმა: „ერთი ხალხია ეს და ერთი ენა აქვთ. და დაიწყეს ამის კეთება. და ახლა მათთვის აღარაფერი არ იქნება მიუღწეველი.

⁷ჩავიდეთ და ავურიოთ მათ ენა, რომ ადამიანებმა ვერ გაუგონ ერთმანეთს“.

⁸და გაფანტა უფალმა ისინი იქიდან მიწის ზურგზე და მათ შეწყვიტეს ქალაქის შენება.

⁹ამიტომ ეწოდა მას სახელად ბაბილონი, რადგან იქ აღრია უფალმა ენები და იქიდან გაფანტა ისინი მიწის პირზე.

¹⁰ეს არის სემის შთამომავლობა: სემი იყო ასი წლისა, როდესაც, წარღვნიდან ორი წლის შემდეგ შვა არფაქშადი.

¹¹და იცოცხლა სემმა არფაქშადის დაბადების შემდეგ ხუთასი წელი, და კვლავ შვა ძენი და ასულნი.

¹²ოცდათხუთმეტი წლის იყო არფაქშადი, როდესაც შვა შელახი.

¹³და იცოცხლა არფაქშადმა შელახის დაბადების შემდეგ ოთხას სამი წელიწადი, და კვლავ შვა ძენი და ასულნი.

¹⁴ოცდაათი წლის იყო შელახი, როდესაც შვა ყებერი.

¹⁵და იცოცხლა ყებერმა შელახის დაბადების შემდეგ ოთხას სამი წელი, და კვლავ შვა ძენი და ასულნი.

¹⁶ოცდათოთხმეტი წლის იყო ყებერი, როდესაც შეეძინა ფელეგი.

¹⁷და იცოცხლა ყებერმა ფელეგის დაბადების შემდეგ ოთხას ოცდაათი წელი, და კვლავ შვა ძენი და ასულნი.

¹⁸ოცდაათი წლის იყო ფელეგი, როდესაც შვა რეღუ.

¹⁹და იცოცხლა ფელეგმა რეღუს დაბადების შემდეგ ორას ცხრა წელი, და კვლავ შვა ძენი და ასულნი.

²⁰ოცდათორმეტი წლის იყო რეღუ, როდესაც შეეძინა სერუგი.

²¹და იცოცხლა რეღუმ სერუგის დაბადების შემდეგ ორას შვიდი წელი, და კვლავ შვა ძენი და ასულნი.

²²ოცდაათი წლის იყო სერუგი, როდესაც შვა ნახორი.

²³და იცოცხლა სერუგმა ნახორის დაბადების შემდეგ ორასი წელი, და კვლავ შვა ძენი და ასულნი.

²⁴ოცდაცხრა წლის იყო ნახორი, როდესაც შვა თერახი.

²⁵და იცოცხლა ნახორმა თერახის დაბადების შემდეგ ას ცხრამეტი წელი, და კვლავ შვა ძენი და ასულნი.

²⁶და იცოცხლა თერახმა სამოცდაათი წელი, და შვა აბრამი, ნახორი და ხარანი.

²⁷და ეს არის თერახის შთამომავლობა: თერახმა შვა აბრამი, ნახორი და ხარანი; და ხარანმა შვა ლოტი.

²⁸და მოკვდა ხარანი თერახის, მამამისის, სიცოცხლეშივე, თავისი შობის ქვეყანაში, ქალდეველთა ურში.

²⁹და მოიყვანეს აბრამმა და ნახორმა ცოლები. აბრამის ცოლს ერქვა სარაი, ხოლო ნახორის ცოლს — მილქა, ასული ხარანისა, რომელიც იყო მილქასა და ისქას მამა.

³⁰და იყო სარაი ბერწი, და არ ჰყავდა შვილი.

³¹და წაიყვანა თერახმა აბრამი — თავისი ძე, და ლოტი — ხარანის ძე, თავისი შვილიშვილი და სარაი — თავისი რძალი, აბრამის, თავისი ძის ცოლი, და მათთან ერთად გავიდა ქალდეველთა ურიდან, რომ წასულიყო ქანაანის ქვეყანაში, და მივიდნენ ხარანამდე, და იქ დამკვიდრდნენ.

³²თერახმა იცხოვრა ორას ხუთი წელი და თერახი ხარანში მოკვდა.