Read ბიბლია 2მეფ. 8 Bible Online

2მეფ. 8 - ბიბლია bible

2მეფ. 8

¹ამის შემდეგ იყო, რომ დაამარცხა დავითმა ფილისტიმელები, დაიმორჩილა ისინი და წაართვა დავითმა ფილისტიმელებს მათეგ ამა.

²და დაამარცხა მოაბიც, მიწაზე წააწვინა ისინი და საბლით გაზომა: ორი საბელი დასახოცად გადაზომა, ერთი მთელი საბელი — ცოცხლად დასატოვებლად. და გახდნენ მოაბელები დავითის მორჩილნი და მოხარკე მსახურნი.

³და დაამარცხა დავითმა ჰადად-ყეზერი რეხობის ძე, ცობას მეფე, როცა იგი მდინარეზე ბატონობის დასაბრუნებლად მიდიოდა.

⁴და წაართვა მას დავითმა ათას შვიდასი ცხენოსანი და ოცი ათასი ქვეითი. და ეტლის ცხენებს ძარღვები გადაუჭრა დავითმა, მხოლოდ ასი ეტლისთვის დაიტოვა მათგან.

⁵და მოვიდნენ დამასკოს არამელები ცობას მეფის ჰადად-ყეზერის დასახმარებლად და მუსრი გაავლო დავითმა არამელთაგან ოცდაორი ათას კაცს.

⁶და დააყენა დავითმა ხელისუფალნი დამასკოს არამში და გახდნენ არამელები დავითის მსახურნი და მოხარკენი. და ყველგან, სადაც კი მიდიოდა, უფალი შეეწეოდა დავითს.

⁷და აიღო დავითმა ოქროს ფარები, ჰადად-ყეზერის მსახურთ რომ ჰქონდათ, და იერუსალმში მოიტანა.

⁸დიდძალი სპილენძი წამოიღო დაივთმა ბეტახიდან და ბეროთიდან, ჰადად-ყეზერის ქალაქებიდან,

⁹და შეიტყო თოყიმ, ხამათის მეფემ, რომ სძლია დავითმა ჰადად-ყეზერს,

¹⁰და გაგზავნა თოყიმ თავისი ძე იორამი დავითთან მოსაკითხავად და მისალოცად, რომ შეებრძოლა ჰადად-ყეზერს და სძლია მას, რადგან თოყის მოსისხლე იყო ჰადად-ყეზერი. თან გაატანა ოქრო-ვერცხლისა და სპილენძის ჭურჭელი.

¹¹ეს ჭურჭელიც შესწირა მეფე დავითმა უფალს იმ შეწირულ ოქრო-ვერცხლთან ერთად, დამორჩილებულ ხალხებს რომ წაართვა —

¹²არამს, მოაბს, ყამონის ძეთ, ფილისტიმელებს, ყამალეკს, აგრეთვე ჰადად-ყეზერ რეხობის ძეს, ცობას მეფეს.

¹³გაითქვა სახელი დავითმა თვრამეტი ათასი არამელის დამარცხების შემდეგ მარილოვან ველზე.

¹⁴და დააყენა ედომოში ხელისუფალნი, მთელს ედომოში დააყენა ხელისუფალნი, და გახდა მთელი ედომი დავითის მსახური. და უფალი შეეწეოდა დავითს, სადაც კი წავიდოდა.

¹⁵და მეფობდა დავითი მთელს ისრაელზე და წესსა და სამართალს აძლევდა მთელს თავის ხალხს.

¹⁶იოაბ ცერუიას ძე ჯარს სარდლობდა და იოშაფატ ახილუდის ძე მემატიანე იყო.

¹⁷ცადოკ ახიტუბის ძე, და ახიმელექ აბიათარის ძე მღვდლები იყვნენ, ხოლო სერაია — მწერალი;

¹⁸და ბენიაჰუ იეჰოიადაყის ძე ქერეთელებს და ფელეთელებს განმგებლობდა, დავითის შვილები ეზოს მოძღვრები იყვნენ.