Read ბიბლია 3მეფ. 15 Bible Online

3მეფ. 15 - ბიბლია bible

3მეფ. 15

¹იერობყამ ნაბატის ძის მეფობის მეთვრამეტე წელს აბიამი გამეფდა იუდაზე.

²სამ წელიწადს მეფობდა იგი იერუსალიმში. დედამისი იყო მაყაქა, აბიშალომის ასული.

³და დადიოდა ყველა იმ ცოდვებით, რასაც მის წინ მამამისი სჩადიოდა, და არ იყო სრულად მინდობილი მისი გული უფლისადმი, როგორც მამამისის, დავითის, გული.

⁴უფალმა, მისმა ღმერთმა, დავითის გამო მისცა მას ლამპარი იერუსალიმში, რომ დაუსვა ძე მემკვიდრედ და შეუნარჩუნა იერუსალიმი.

⁵რადგანაც სწორს აკეთებდა დავითი უფლის თვალში და არასოდეს უღალატია უფლის მცნებისათვის, გარდა ხეთელი ურიას შემთხვევისა.

⁶გამუდმებული ომი იყო რეხაბყამსა და იერობყამს შორის.

⁷აბიამის დანარჩენი საქმენი, ყველაფერი, რაც მან გააკეთა, იუდას მეფეთა მატიანეშია ჩაწერელი. ომი იყო ამტყდარი აბიამსა და იერობყამს შორის.

⁸და განისვენა აბიამმა თავის მამებთან და დამარხეს იგი დავითის ქალაქში. მის ნაცვლად ასა, მისი ძე, გამეფდა.

⁹ისრაელის მეფის, იერობყამის მეფობის მეოცე წელს გამეფდა ასა იუდაზე.

¹⁰და ორმოცდაერთ წელს მეფობდა იერუსალიმში. დედამისი იყო მაყაქა, აბიშალომის ასული.

¹¹სწორს აკეთებდა უფლის თვალში ასა დავითის, მამამისის, მსგავსად.

¹²გაყარა მემრუშენი ქვეყნიდან, და ერთიანად მოიშორა კერპები, რომლებიც მის მამებს ჰქონდა გაკეთებული.

¹³თავისი დედაც კი, მაყაქა, დედოფლობას მოაშორა, რადგან კერპი ჰქონდათ დადგმული აშერასთვის. აჩეხა ასამ მისი კერპი და კიდრონის ხევში დასწვა.

¹⁴გორაკები კი არ მოუშორებია, თუმცა სრულად იყო ასას გული მინდობილი უფლისადმი მთელი მისი სიცოცხლე.

¹⁵და შეიტანა უფლის სახლში თავისი შეწირული და მამამისის შეწირული ნივთები — ოქრო-ვერცხლი და ჭურჭელი.

¹⁶გამუდმებული ომი იყო ასასა და ბაყაშას, ისრაელის მეფეს, შორის.

¹⁷და გავიდა ბაყაშა, ისრაელის მეფე, იუდას წინააღმდეგ და იწყო რამას შენება, რათა არავინ გამოეშვა ასასგან, იუდას მეფისგან, და არავინ შეეშვა მასთან.

¹⁸და აიღო ასამ მთელი ოქრო-ვერცხლი, რაც კი სამეფო სახლის საგანძურებში იყო დარჩენილი, და მისცა ხელში თავის მსახურთ. მიაგზავნა ისინი მეფე ასამ ბენ-ჰადადთან, ტაბრიმონის ძესთან, ხეზიონის ძისა, არამის მეფესთან, დამასკოში რომ იჯდა, და შეუთვალა:

¹⁹„იყოს კავშირი ჩვენს შორის, როგორც ჩვენს მამებს შორის იყო. აჰა, გიგზავნი ძღვნად ოქრო-ვერცხლს; გაწყვიტე კავშირი ბაყაშასთან, ისრაელის მეფესთან, და ჩამომეხსნება.“

²⁰და დაუჯერა ბენ-ჰადადმა მეფე ასას და გაგზავნა თავისი მხედართმთავრები ისრაელის ქალაქთა წინააღმდეგ. და დალაშქრეს ყიონი, დანი, აბელ-თებ-მაყაქა, მთელი ქინეროთი და ნაფთალის მთელი მხარე.

²¹ეს რომ შეიტყო ბაყაშამ, შეწყვიტა რამას შენება და თირცაში დარჩა.

²²და მოუხმო მეფე ასამ უკლებლივ მთელს იუდას და გაზიდეს რამას ქვები და ხე-ტყე, რასაც სამშენებლოდ იყენებდა ბაყაშა. და ააშენა ამით მეფე ასამ ბენიამინის გებაყი და მიცფა.

²³ასას დანარჩენი საქმენი და ყველა მისი გმირობა, ყველაფერი, რაც გააკეთა, ქალაქები რომ ააშენა, იუდას მეფეთა მატიანეშია ჩაწერილი, გარდა იმისა, რომ სიბერეში ფეხები ასტკივდა.

²⁴განისვენა ასამ თავის მამებთან და დაიმარხა თავისი მამა-პაპის გვერდით დავითის, მამამისის, სახლში. მის ნაცვლად იოშაფატი, მისი ძე, გამეფდა.

²⁵ისრაელზე იერობყამის ძე ნადაბი გამეფდა ასას, იუდას მეფის, მეორე წელს, და ორი წელი მეფობდა ისრაელზე.

²⁶ცუდს აკეთებდა იგი უფლის თვალში, და მიჰყვებოდა მამის გზას და მის ცოდვებს, და ისრაელსაც აცდუნებდა.

²⁷აუჯანყდა მას ბაყაშა, ახიას ძე, ისაქარელი, და მოკლა იგი ბაყაშამ ფილისტიმის გიბეთონში, როცა ნადაბი და მთელი ისრაელი გიბეთონს ედგნენ ალყად.

²⁸მოკლა იგი ბაყაშამ ასას, იუდას მეფის, მესამე წელს და მის ნაცვლად გამეფდა.

²⁹გამეფდა თუ არა, მუსრი გაავლო იერობყამის მთელს სახლს. ცოცხალი არავინ დაუტოვა იერობყამს, ვიდრე მთლიანად არ გაანადგურა, უფლის სიტყვისამებრ, როგორც თავისი მსახურის, შილოელი ახიას პირით ბრძანა.

³⁰იერობყამის ცოდვების გამო, თვითონ რომ შესცოდა და ისრაელიც რომ აცდუნა, როცა გულისწყრომით აავსო უფალი, ისრაელის ღმერთი.

³¹ნადაბის დანარჩენი საქმენი, ყველაფერი, რაც მან გააკეთა, ისრაელის მეფეთა მატიანეში არის ჩაწერილი.

³²გამუდმებული ომი იყო ასასა და ისრაელის მეფის ბაყაშას შორის.

³³იუდას მეფის, ასას მესამე წელს გამეფდა ბაყაშა, ახიას ძე, ისრაელზე თირცაში და ოცდაოთხი წელი [იმეფა].

³⁴ბოროტს აკეთებდა უფლის თვალში, მიჰყვებოდა იერობყამის გზას და მის ცოდვებს, და ისრაელსაც აცდუნებდა.