Read ბიბლია 3მეფ. 6 Bible Online

3მეფ. 6 - ბიბლია bible

3მეფ. 6

¹ისრაელის ძეთა ეგვიპტიდან გამოსვლის ოთხასმეოთხმოცე წელს, ისრაელზე სოლომონის მეფობის მეოთხე წელს, ზივის თვეში, რომელიც არის მეორე თვე, შეუდგა იგი უფლის სახლის შენებას.

²სახლი, რომელიც სოლომონმა აუშენა უფალს, სიგრძით სამოცი წყრთა იყო, სიგანით — ოცი წყრთა, სიმაღლით — ოცდაათი წყრთა.

³სტოა ტაძრის წინ სიგრძით ოცი წყრთა იყო, ტაძრის სიგანის შესაბამისად, ხოლო სიგანე — ათი წყრთა, სახლის წინ.

⁴და გაუკეთა სახლს სარკმლები, რომლებიც იღებოდა და იკეტებოდა.

⁵და მიუშენა სახლის კედელს სართულები, სახლის კედლების ირგვლივ, ტაძრისა და დაბირის ირგვლივ, და მიუშენა შრამელები ირგვლივ.

⁶ქვედა სართული ხუთი წყრთა იყო სიგანით, შუა — ექვსი წყრთა სიგანით, ხოლო მესამე — შვიდი წყრთა სიგანით, რადგან სახლს ირგვლივ შვერილი კოჭები ჰქონდა გარედან დატანებული, რომ სახლის კედლებს ხარაჩოები არ მიჰკარებოდა.

⁷როცა სახლი შენდებოდა, ზოდებად მოჭრილი ქვით შენდებოდა. არც ჩაქუჩის, არც კვერის და არც ერთი რკინის იარაღის ხმა არ გაღებულა სახლში მისი შენებისას.

⁸შუა სართულზე ასასვლელი სახლს მარჯვენა ფრთაზე ჰქონდა. დახვეული კიბით ადიოდნენ შუაზე და შუადან — მესამეზე.

⁹და დაასრულა სახლის შენება და ნაძვის ფიცრებითა და კოჭებით გადახურა სახლი.

¹⁰სართულები მიუშენა მთელს სახლს, თითო ხუთი წყრთა სიმაღლისა, და ნაძვის ძელებით მიამაგრა სახლს.

¹¹და გამოეცხადა სოლომონს უფლის სიტყვა:

¹²„აჰა, აშენებ ამ სახლს, მაგრამ თუ ივლი ჩემს წესზე და ჩემს სამართალს გააჩენ, თუ დაიცავ და გაჰყვები ჩემს ნაბრძანევს, მაშინ შეგისრულებ სიტყვას, რომელიც დავითს, მამაშენს, ვუთხარი.

¹³დავმკვიდრდები ისრაელის ძეთა შორის და არასოდეს მივატოვებ ჩემს ერს, ისრაელს.“

¹⁴და ააგო სოლომონმა სახლი და დაასრულა იგი.

¹⁵ნაძვის ფიცრები ააკრა სახლის შიდა კედლებს იატაკიდან ჭერამდე. ჭერი შიგნიდან ხით მოაპირკეთა და სახლის იატაკზე კვიპაროსის ფიცრები დააგო.

¹⁶სახლის კიდეებიდან ოც წყრთაზე ააკრა ნაძვის ფიცრები იატაკიდან ჭერამდე და განაკუთვნა იგი დაბირისთვის, წმიდათა წმიდისთვის.

¹⁷ორმოცი წყრთა იყო სახლი, ანუ ტაძრის წინა ნაწილი.

¹⁸ნაძვის ფიცრებზე სახლის შიგნით კიტრები და გაშლილი ყვავილები იყო ამოჩუქურთმებული. ყველაფერი ნაძვისგან იყო, ქვა არ ჩანდა.

¹⁹შუა სახლში მოაწყო დაბირი, რომ იქ უფლის აღთქმის კიდობანი დაედგა.

²⁰დაბირის სიგრძე ოცი წყრთა იყო, სიგანეც ოცი წყრთა, სიმაღლე — ოცი წყრთა. წმიდა ოქროთი მოჭედა იგი, ოქროთივე მოჭედა ნაძვის სამსხვერპლო.

²¹და მოჭედა შიგნიდან სახლი წმიდა ოქროთი სოლომონმა, და გადაჭიმა ოქროს ჯაჭვები დაბირის წინ, რომელიც ოქროთი მოჭედა.

²²მთელი სახლი ოქროთი მოჭედა, მთლიანად მთელი სახლი და მთელი სამსხვერპლო დაბირის წინ მდგარი, ოქროთი მოჭედა

²³და გააკეთა დაბირში ორი ქერუბიმი ზეთისხილის ხისგან, რომლის სიმაღლე ათი წყრთა იყო.

²⁴ერთი ფრთა ხუთი წყრთა ჰქონდა ქერუბიმს, მეორე ფრთაც ხუთი წყრთა. ათი წყრთა იყო ერთი ფრთის ბოლოდან მეორე ფრთის ბოლომდე.

²⁵ათი წყრთა იყო მეორე ქერუბიმიც. ორივე ქერუბიმს ერთი ზომა და ერთი სახე ჰქონდა.

²⁶ერთი ქერუბიმის სიმაღლე ათი წყრთა იყო, ასევე მეორე ქერუბიმისაც.

²⁷დადგა ქერუბიმები შიდა სახლის შუაგულში. გაშლილი ჰქონდათ ფრთები ქერუბიმებს, ერთი ქერუბიმის ფრთა ერთ კედელს სწვდებოდა, მეორე ქერუბიმის ფრთა — მეორე კედელს, ხოლო სახლის შუაგულისკენ მიმართული მათი ფრთები ერთმანეთს ეხებოდნენ.

²⁸ოქროთი მოჭედა ქერუბიმები.

²⁹სახლის მთელს კედლებზე ირგვლივ — შიგნიდან და გარედან, ქერუბიმების, ფინიკის ხეებისა და გაშლილი ყვავილების გამოსახულებანი მოაჩუქურთმა.

³⁰სახლის იატაკიც ოქროთი მოჭედა, შიგნიდანაც და გარედანაც.

³¹დაბირში შესასვლელად გააკეთა ზეთისხილის ხის კარედი, რომლის ჩარჩო და წირთხლები კედლის სიმაღლის მეხუთედი იყო.

³²ზეთისხილის ხის ორ კარედზე ქერუბიმები, ფინიკის ხეები და გაშლილი ყვავილები ამოაჩუქურთმა და ოქროთი მოჭედა. მოჭედა ქერუბიმიც და ფინიკის ხეებიც.

³³ტაძრის შესასვლელსაც ასევე გაუკეთა ზეთისხილის ხის ოთხკუთხა წირთხლები.

³⁴და კვიპაროსის ხის ორი კარედი. ერთი კარედის ორივე ფრთა ტრიალებდა, მეორე კარედის ორივე ფრთა ტრიალებდა.

³⁵და ამოაჩუქურთმა ქერუბიმები, ფინიკის ხეები და გაშლილი ყვავილები და ოქროთი მოჭედა ჩუქურთმის ღარები.

³⁶და მოაწყო შიდა ეზო სამი წყება თლილი ქვისაგან და ერთი წყება ნაძვის ძელებისაგან.

³⁷მეოთხე წელს, ზივის თვეში, ჩაეყარა საძირკველი უფლის სახლს.

³⁸მეთერთმეტე წელს, ბულის თვეში, რომელიც არის მერვე თვე, გაასრულა სახლი ყოველი წესისა და რიგის მიხედვით. შვიდ წელიწადს აშენებდა სახლს.