Read ბიბლია 4მეფ. 11 Bible Online

4მეფ. 11 - ბიბლია bible

4მეფ. 11

¹როცა დაინახა ღოთოლიამ, ახაზიაჰუს დედამ, რომ მოკვდა მისი შვილი, ადგა და ამოწყვიტა სამეფო მოდგმა.

²მაგრამ იეჰოშებაყმა, მეფე იორამის ასულმა, ახაზიაჰუს დამ, აიყვანა იოაში, ახაზიაჰუს ძე, და მოიპარა დასახოცად განწირულ უფლისწულთა შორის და მის ძიძასთან ერთად საწოლ ოთახში დამალეს ღოთოლიასგან, და ვერ მოკლეს.

³ექვს წელს იმალებოდა მასთან ერთად უფლის სახლში, ღოთოლია კი მეფობდა ქვეყანაზე.

⁴მეშვიდე წელს დაიბარა იეჰოიადაყმა მცველთა და მალემსრბოლთა ასისთავები და შეიყვანა ისინი უფლის სახლში. და აღთქმა მოსთხოვა მათ, და დააფიცა უფლის სახლში და აჩვენა უფლისწული.

⁵და უბრძანა: „აი, როგორ უნდა მოიქცეთ: თქვენგან მესამედმა, შაბათს მომსვლელთაგან, მეფის სასახლეში უნდა იყარაულოს.

⁶მესამედმა — სურის კარიბჭესთან, მესამედმაც — კარიბჭესთან, მალემსრბოლთა უკან რომ არის. მორიგეობით იყარაულეთ სასახლეში.

⁷თქვენგან ორმა მესამედმა, შაბათს გამომსვლელთაგან, უფლის სახლში უნდა იყარაულოს მეფის წინაშე.

⁸გარს შემოერტყით მეფეს იარაღით ხელში და, ვინც რიგებში შემოვა, მოკვდეს. ედექით მეფეს მისი გამოსვლისას და შესვლისას.“

⁹ყველაფერი ისე გააკეთეს ასისთავებმა, როგორც დაარიგა მათ იეჰოიადაყ მღვდელმა: წაიყვანეს თავ-თავისი ხალხი — შაბათს მომსვლელნი, შაბათის გამსვლელებთან ერთად — და იეჰოიადაყ მღვდელთან მივიდნენ.

¹⁰და დაურიგა მღვდელმა ასისთავებს შუბები და ფარები, მეფე დავითს რომ ჰქონდა უფლის სახლში,

¹¹და დადგნენ მალემსრბოლები იარაღით ხელში სახლის მარჯვენა ფრთიდან სახლის მარცხენა ფრთამდე, სამსხვერპლოსთან და სახლთან, მეფის ირგვლივ.

¹²და გამოიყვანა უფლისწული, დაადგა შარავანდი და მისცა მოწმობა, და გაამეფეს და სცხეს ზეთი. ტაშს უკრავდნენ და ამბობდნენ: „იცოცხლოს მეფემ!“

¹³და შემოესმა ღოთოლიას ხალხის ჩოჩქოლი და გავიდა ხალხთან უფლის სახლში.

¹⁴და დაინახა სვეტზე მდგარი მეფე, წესისამებრ, და სარდლები და საყვირები მეფის გვერდით. მხიარულობს ქვეყნის ერი და საყვირებს ახმიანებენ. და შემოიგლიჯა სამოსელი ღოთოლიამ და იყვირა: „ღალატია! ღალატი!“

¹⁵და უბრძანა იეჰოიადაყ მღვდელმა ასისთავებს — ჯარის მეთაურებს, და უთხრა: „გარეთ გაიყვანეთ ღოთოლია და ვინც უკან გაჰყვება, მახვილით მოკალით“, რადგან იფიქრა მღვდელმა, უფლის სახლში არ მოკლანო.

¹⁶და გზა მისცეს და წავიდა „ცხენთა შესასვლელით“ სასახლისკენ, და იქ მოკლეს.

¹⁷და დადო იეჰოიადაყმა აღთქმა უფალს, მეფეს და ერს შორის, რათა საუფლო ერი ყოფილიყო, და ასევე მეფესა და ერს შორის.

¹⁸და შევიდა მთელი ქვეყნის ერი ბაყალის სახლში და დაანგრიეს იგი სამსხვერპლოიანად, და დალეწეს მისი გამოსახულებანი და მოკლეს მათანი, ბაყალის ქურუმი, სამსხვერპლოების წინ. და დააწესა მღვდელმა ზედამხედველობა უფლის სახლზე.

¹⁹და წამოიყვანა ასისთავები, სასახლის მცველები, მალემსრბოლები და ქვეყნის ერი და მათაც გამოიყვანეს მეფე უფლის სახლიდან. მცველთა შესასვლელით სამეფო სახლში მივიდნენ; და მეფეთა ტახტზე დაჯდა იგი.

²⁰და გამხიარულდა მთელი ქვეყნის ერი და დაწყნარდა ქალაქი. ხოლო ღოთოლია მახვილით მოკლეს სამეფო სახლში.