Read ბიბლია 4მეფ. 24 Bible Online

4მეფ. 24 - ბიბლია bible

4მეფ. 24

¹მის დღეებში გამოვიდა ნაბუქოდონოსორი, ბაბილონის მეფე, და იყო იეჰოიაკიმი მისი მსახური სამ წელიწადს. მერე კვლავ განუდგა მას.

²მიუსევდა ხოლმე მას უფალი ქალდეველთა, არამელთა, მოაბელთა და ყამონის ძეთა ბრბოებს, და შეუსევდა იუდას, რათა დაეღუპა იგი უფლის სიტყვისამებრ, როგორც ნაბრძანები ჰქონდა თავის მსახურთა — წინასწარმეტყველთა — პირით.

³უფლის ნებით ხდებოდა იუდაში, რათა თავიდან მოეშორებინა, მენაშეს მიერ ჩადენილი ცოდვების გამო,

⁴და იმ უბრალოდ დაღვრილი სისხლის გამოც, რომლითაც აავსო იერუსალიმი, და არ ინება უფალმა მისი პატიება.

⁵იეჰოიაკიმის დანარჩენი საქმენი, ყველაფერი, რაც გაუკეთებია, იუდას მეფეთა მატიანეშია ჩაწერილი.

⁶განისვენა იეჰოიაკიმმა თავის მამა-პაპასთან და მის ნაცვლად მისი ძე, იეჰოიაქინი, გამეფდა.

⁷და მეტად აღარ გამოსულა ეგვიპტის მეფე თავისი ქვეყნიდან, რადგან დაიპყრო ბაბილონის მეფემ ყველაფერი, რაც ეგვიპტელთა მეფეს ეკუთვნოდა, ეგვიპტის მდინარე ეფვრატამდე,

⁸თვრამეტი წლისა იყო იეჰოიაქინი, როცა გამეფდა, და სამი თვე იმეფა იერუსალიმში. მისი დედა იყო ნეხუშთა, ელნათანის ასული, იერუსალიმიდან.

⁹ბოროტს აკეთებდა უფლის თვალში, ისევე როგორც მამამისი აკეთებდა.

¹⁰ამ დროს დაიძრნენ ბაბილონის მეფის, ნაბუქოდონოსორის, მოლაშქრეები იერუსალიმისაკენ და შემოადგნენ ქალაქს.

¹¹და მოადგა ბაბილონის მეფე, ნაბუქოდონოსორი, ქალაქს, როცა მის მოლაშქრეებს ალყაში ჰყავდათ ქალაქი მოქცეული.

¹²და გავიდა იეჰოიაქინი, იუდას მეფე, ბაბილონის მეფესთან, და გავიდნენ დედამისიც, მისი მსახურნიც და დიდებულებიც, და კარისკაცებიც, და წაიყვანა იგი ბაბილონის მეფემ თავისი მეფობის მერვე წელს.

¹³და გაზიდა იქიდან უფლის სახლის საგანძური და მეფის სახლის საგანძური, და დაამტვრია მთელი ოქროს ჭურჭელი, რომელიც გააკეთა სოლომონმა, ისრაელის მეფემ, უფლის ტაძარში.

¹⁴და აჰყარა მთელი იერუსალიმი, ყველა დიდებული, ყველა მამაცი მებრძოლი, — ათი ათასი კაცი იყო აყრილი, — ყველა ხურო და მჭედელი, არავინ დარჩენილა, მდაბიორთა გარდა.

¹⁵და გადაასახლა იეჰოიაქინი ბაბილონს, და მეფის დედა, და მეფის ცოლები, და მისი კარისკაცები, და ქვეყნის თავკაცნი წაასხა იერუსალიმიდან ბაბილონში დასასახლებლად.

¹⁶მეომრები — შვიდი ათასი კაცი, ხელოსნები და მშენებლები — ათასი კაცი, ყველა ვაჟკაცი, ომის შემძლე, წაასხა ბაბილონის მეფემ ბაბილონში დასასახლებლად.

¹⁷და დასვა მეფედ ბაბილონის მეფემ [იეჰოიაქინის] ნაცვლად მისი ბიძა, მათანია, და სახელად ციდკიაჰუ დაარქვა.

¹⁸ოცდაერთი წლის იყო ციდკიაჰუ, როცა გამეფდა, და თერთმეტი წელი იმეფა იერუსალიმში. მისი დედა იყო ხამუტალი, იერემიას ასული, ლიბნადან,

¹⁹ბოროტს აკეთებდა უფლის თვალში ისევე, როგორც იეჰოიაკიმი აკეთებდა.

²⁰და მრისხანებდა უფალი იერუსალიმზე და იუდაზე, ვიდრე საბოლოოდ არ მოიშორა ისინი თავიდან. და განუდგა ციდკიაჰუ ბაბილონის მეფეს.