Read ბიბლია 1ნეშტ. 11 Bible Online

1ნეშტ. 11 - ბიბლია bible

1ნეშტ. 11

¹მოვიდა მთელი ისრაელი დავითთან ხებრონში და უთხრეს: „აჰა, შენი ძვალი და ხორცი ვართ.

²გუშინაც და იმის უწინაც, როცა საული მეფობდა, შენ გამოგყავდა და შეგყავდა ისრაელი, უფალმა, შენმა ღმერთმა, გითხრა: ‘შენ დამწყემსავ ჩემს ერს, ისრაელს, შენ იქნები ჩემი ერის, ისრაელის, მთავარი.’“

³და მოვიდა ისრაელის მთელი უხუცესობა მეფესთან ხებრონს და შეკრა დავითმა მათთან კავშირი ხებრონში უფლის წინაშე, და სცხეს ისრაელზე მეფედ დავითი, უფლის სიტყვის თანახმად, სამუელის ხელით.

⁴და გაილაშქრეს დავითმა და ისრაელის ძეთ იერუსალიმისაკენ, ანუ იებუსისკენ. იქ იყვნენ იებუსელნი, იმ ქვეყნის მკვიდრნი.

⁵და უთხრეს იებუსის მკვიდრებმა დავითს: „აქ ვერ შემოხვალ“. მაგრამ აიღო დავითმა სიონის ციხე-სიმაგრე. ეს არის დავითის ქალაქი.

⁶და თქვა დავითმა: „ვინც ყველაზე უწინ შემუსრავს იებუსელთ, ის გახდება თავკაცი და სარდალი.“ ყველაზე უწინ იოაბი, ცერუიას ძე, ავიდა და გახდა სარდალი.

⁷და დადგა დავითი იმ ციხე-სიმაგრეში. ამიტომ უწოდეს მას დავითის ქალაქი.

⁸მან შემოაშენა ქალაქი გარშემო, მილოდან შემოგარენამდე. იოაბმა კი დანარჩენი ქალაქი აღადგინა.

⁹და სულ მაღლა და მაღლა მიდიოდა დავითი და ცაბაოთ უფალი იყო მასთან.

¹⁰აჰა, დავითის მოყმეთა მთავარნი, რომელნიც მხარს უმაგრებდნენ მას მის სამეფოში, ისრაელთან ერთად, მის გასამეფებლად, უფლის სიტყვისამებრ.

¹¹აჰა, დავითის მოყმეთა რიცხვი: იაშობყამ ხაქმონის ძე, ოცდაათეულის თავკაცი. მან თავისი შუბის ერთი მოქნევით სამასი კაცი მოკლა.

¹²მას შემდეგ ელეაზარი, ძე დოდო ახოხელისა, ერთ-ერთი იმ სამ მოყმეთაგანი.

¹³იგი დავითს ახლდა ფას-დამიმში, სადაც ფილისტიმელნი საომრად შეიყარნენ. იყო იქ ყანის ნაკვეთი, სადაც ქერი ეთესა, და უკუიქცა ხალხი ფილისტიმელთაგან.

¹⁴ისინი ჩადგნენ შუა ყანაში, დაიცვეს იგი და მუსრი გაავლეს ფილისტიმელებს. და დიდი ხსნა მოიტანა უფალმა.

¹⁵ოცდაათი თავკაციდან ეს სამნი ავიდნენ კლდეზე დავითთან, ყადულამის გამოქვაბულში. ხოლო ფილისტიმელთა ურდო რეფაიმის ველზე იყო დაბანაკებული.

¹⁶მაშინ დავითი საფარში იყო, ხოლო ფილისტიმელთა ყარაული ბეთლემში იდგა.

¹⁷და ინება დავითმა და თქვა: „ვინ შემასმევს ბეთლემის ჭის წყალს, კარიბჭესთან რომ არის?“

¹⁸და გაარღვია ამ სამმა ფილისტიმელთა ბანაკი, და ამოიღეს წყალი ბეთლემის ჭიდან, კარიბჭესთან რომ არის, და წამოიღეს და დავითს მიუტანეს. არ ინდომა დავითმა მისი შესმა და უფალს დაუღვარა.

¹⁹და თქვა: „შორს იყოს ჩემგან, უფალო, ასეთი საქმე! ნუმც შემესვას ამ ვაჟკაცთა სისხლი, თავის გასაწირად რომ წავიდნენ!“ და აღარ ინდომა დავითმა წყლის შესმა. ასე მოიქცა ეს სამი მოყმე.

²⁰აბიშაი, იოაბის ძმა, ამ სამის უფროსი იყო. მან სამას კაცს მოუქნია შუბი და განგმირა, მას მეტი სახელი ჰქონდა ამ სამში.

²¹ამ სამზე მეტად იყო პატივდებული და მათ მეთაურობდა, მაგრამ იმ პირველ სამს ვერ უტოლდებოდა.

²²ბენაია იეჰოიადაყის ძე მაგარი ვაჟკაცი იყო, დიდ საქმეთა მქმნელი, კაბცეელიდან. მან დაამარცხა ორი მოაბელი ლომკაცი, ჩავიდა ორმოში და მოკლა ლომი თოვლიან დღეს.

²³მანვე მოკლა ეგვიპტელი კაცი, ხუთი წყრთის სიმაღლისა: შუბი ისე ეჭირა ეგვიპტელს ხელში, როგორც ფეიქარს საქსელავი. და ჩაუხტა კეტით და ხელიდან გამოსტაცა ეგვიპტელს შუბი და მისივე შუბით განგმირა.

²⁴ეს გააკეთა ბენაია იეჰოიადაყის ძემ და სახელი მოიხვეჭა სამ მოყმეს შორის.

²⁵ოცდაათისგან გამოირჩეოდა, მაგრამ იმ სამს ვერ უტოლდებოდა. თავის მცველთა მეთაურად დანიშნა იგი დავითმა.

²⁶მებრძოლთა მეთაურნი იყვნენ: ყასაელი, იოაბის ძმა, ელხანანი, დოდოს ძე, ბეთლემელი,

²⁷შამოთ ჰარორელი, ხელეც ფელონელი,

²⁸ყირა, ყიკეშის ძე, თეკოაყელი, აბიყეზერ ყანათოთელი,

²⁹სიბქაი ხუშათელი, ყილაი ახოხელი,

³⁰მაჰარაი ნეტოფათელი, ხელედ ბაყანას ძე, ნეტოფათელი,

³¹ითაი, რიბაის ძე, ბენიამინის გიბყადან, ბენაია ფირყათონელი,

³²ხურაი გაყაშის ხევიდან, აბიელ ყარბათელი,

³³ყაზმავეთ ბახარუმელი, ელიახბა შაყალბონელი.

³⁴ჰაშემ გიზონელის ძენი; იონათან შაგეს ძე, ჰარარელი,

³⁵ახიამ საქარის ძე, ჰარარელი, ელიფალ ურის ძე,

³⁶ხეფერ მექერათელი, ახია ფელონელი,

³⁷ხეცრო ქარმელელი, ნაყარაი ეზბაის ძე,

³⁸იოელ, ნათანის ძმა, მიბხარ ჰაგრის ძე,

³⁹ცელეკ ყამონელი, ნახარაი ბეროთელი, იოაბ ცერუიას ძის საჭურველთმტვირთველი,

⁴⁰ყირა ითრელი, გარებ ითრელი,

⁴¹ურია ხეთელი, ზაბად ახალაის ძე,

⁴²ყადინა შიზას ძე, რეუბენელი, რეუბენის ძეთა თავკაცი, და ოცდაათი მასთან ერთად.

⁴³ხანან მაყაქას ძე, იოშაფატ მითნელი,

⁴⁴ყუზია ყაშთერათელი, შამაყი და იეყიელი — ხოთამის ძენი — ყაროყერელნი.

⁴⁵იედიყაელ შიმრის ძე, მისი ძმა იოხა, მისი ძმა თიციელი,

⁴⁶ელიელ მახაველი, ირიბაი, იოშავია — ელნაყამის ძენი — და ითმა მოაბელი.

⁴⁷ელიელი, ყობედი, იაყასიელ მეცობაელი.