Read ბიბლია 1ნეშტ. 14 Bible Online

1ნეშტ. 14 - ბიბლია bible

1ნეშტ. 14

¹გაუგზავნა ხირამმა, ცორის მეფემ, დავითს მოციქულები და ფიჭვის ძელები, კედლის მშენებლები, ხუროები მისთვის სახლის ასაშენებლად.

²და მიხვდა დავითი, რომ მტკიცედ ჰყავდა დადგენილი იგი უფალს ისრაელის მეფედ, და რომ აღამაღლა მისი სამეფო თავისი ერის, ისრაელის, გამო.

³და კიდევ მოიყვანა დავითმა იერუსალიმში ცოლები და კიდევ შეეძინა დავითს ვაჟები და ასულები.

⁴აჰა, იმათი სახელები, რომელნიც იერუსალიმში შეეძინა: შამუაყი, შობაბი, ნათანი, სოლომონი,

⁵იბხარი, ელიშუაყი, ელიფალეტი.

⁶ნოგა, ნეფეგი, იაფიაყი,

⁷ელიშამაყი, ბეყელიადაყი, ელიფალეტი.

⁸და შეიტყვეს ფილისტიმელებმა, რომ მთელი ისრაელის მეფედ აკურთხეს დავითი, და დაიძრნენ ფილისტიმელნი დავითის შესაპყრობად. და შეიტყო ეს დავითმა და გამოვიდა მათ წინააღმდეგ.

⁹და მოვიდნენ ფილისტიმელები და რეფაიმის ველზე განლაგდნენ.

¹⁰დავითი ღმერთს დაეკითხა: „გავილაშქრო ფილისტიმელებზე? ჩამიგდებ მათ ხელში?“ და უთხრა მას უფალმა: „გაილაშქრე, რადგან ხელში ჩაგიგდებ ფილისტიმელებს.“

¹¹და ავიდნენ ბაყალ-ფერაციმში, და იქ სძლია დავითმა და თქვა: „წალეკა უფალმა ჩემი მტრები ჩემივე ხელით, როგორც წყალი წალეკავს.“ ამიტომ ეწოდა იმ ადგილს ბაყალ-ფერაციმი.

¹²და იქ მიატოვეს თავიანთი კერპები. დავითმა ბრძანა და ცეცხლში დაწვეს ისინი.

¹³და კვლავ გამოილაშქრეს ფილისტიმელებმა და ველზე განლაგდნენ.

¹⁴და კვლავ დაეკითხა დავითი ღმერთს. და უთხრა ღმერთმა: „უკან ნუ გაეკიდები, გარს მოუარე და ბალზამის ხეების მხრიდან მიადექი.

¹⁵და, როგორც კი ბალზამის ხის კენწეროებიდან შრიალის ხმა შემოგესმება, იმ წამსვე შეიმართე საომრად, რადგან მაშინ წაგიძღვება ღმერთი ფილისტიმელთა ბანაკის შესამუსრად.“

¹⁶ისე მოიქცა დავითი, როგორც ღმერთმა დაარიგა, და გაბაონიდან გეზერამდე მუსრი გაავლო ფილისტიმელთა ურდოს.

¹⁷დავითმა მთელ ქვეყანაზე გაითქვა სახელი და უფალმა მისი შიში მისცა ყველა ხალხს.