Read ბიბლია 1ნეშტ. 22 Bible Online

1ნეშტ. 22 - ბიბლია bible

1ნეშტ. 22

¹და თქვა დავითმა: „აჰა, უფალი ღმერთის სახლი და აჰა, სრულადდასაწველის სამსხვერპლო ისრაელისათვის.“

²და ბრძანება გასცა დავითმა, რომ თავი მოეყარათ ხიზნებისათვის, რომელნიც ისრაელის ქვეყნად იყვნენ, და განაწესა ისინი ქვისმთლელებად, რომ ღვთის სახლის ასაშენებლად ქვები დაეთალათ.

³დიდძალი რკინა გაიღო დავითმა კარიბჭის ლურსმნებისა და კაუჭების დასამზადებლად, დახარჯულ სპილენძს ხომ წონა არ ჰქონდა.

⁴არც ნაძვის ძელებს ჰქონდა თვლა, რადგან ციდონელებსა და ცორელებს მოჰქონდათ დავითისთვის.

⁵და თქვა დავითმა: „ჩემი ძე სოლომონი ყმაწვილია და სუსტი, უფლისთვის ასაშენებელი სახლი კი ყველაზე დიდებული, სახელგანთქმული და მშვენიერი უნდა იყოს მთელ ქვეყანაზე. ამიტომ ყველაფერს მოვამზადებ მისთვის“. და ბევრი გაამზადა დავითმა სიკვდილის წინ.

⁶და დაუძახა სოლომონს, თავის ძეს, და უფლისთვის, ისრაელის ღვთისთვის, სახლის აგება უანდერძა.

⁷და უთხრა დავითმა თავის ძეს, სოლომონს: „შვილო, გულით მეწადა უფლის, ღვთის სახელისთვის სახლი ამეგო.

⁸და იყო უფლის სიტყვა ჩემს მიმართ თქმული: ‘ბევრი სისხლი გაქვს დაღვრილი და დიდი ომები გაქვს გადახდილი. ამიტომ შენ არ ააშენებ ჩემს სახელზე სახლს, რადგან ბევრი სისხლი დაღვარე ქვეყნად ჩემს წინაშე.

⁹აჰა, ძე შეგეძინება და მშვიდი კაცი იქნება. ყველა მტრისაგან მოვასვენებ, ამიტომაც სოლომონი იქნება მისი სახელი და მის დღეებში მშვიდობას მივცემ ისრაელს.

¹⁰ის ააშენებს სახლს ჩემს სახელზე, ის იქნება ჩემთვის ძე და მე ვიქნები მისთვის მამა, და განვამტკიცებ მის სამეფო ტახტს ისრაელში უკუნისამდე.’

¹¹ახლა კი, შვილო ჩემო, უფალი იყოს შენთან, რათა ხელი მოგემართოს და უფლის, შენი ღვთის სახლი ააშენო, როგორც თქვა უფალმა შენზე.

¹²უფალმა მოგცეს აზრი და გონიერება და დაგაყენოს ისრაელზე უფლის, ღვთის რჯულის დასაცავად.

¹³მაშინ იქნები წარმატებული, თუ იმ წესებსა და კანონებს დაიცავ, რომელნიც მოსეს უბრძანა უფალმა ისრაელისათვის. მტკიცედ დეგ და გამაგრდი, ნუ შიშობ და ნუ თრთი.

¹⁴აჰა, ჩემს სიღარიბეში უფლის სახლისათვის გავამზადე ასიათასი ქანქარი ოქრო, მილიონი ქანქარი ვერცხლი, სპილენძსა და რკინას წონა არა აქვს, რადგან უამრავია. ხე-ტყე და ქვაც გავამზადე, მაგრამ შენც შეგიძლია მიუმატო.

¹⁵ბევრი ხელოსანი მყავს: ტყისმჭრელები, ქვისმთლელები, ხუროები და ყველანაირი ხელობის მცოდნენი.

¹⁶ოქროს, ვერცხლს, სპილენძს თვლა არა აქვს. ახლა ადექი და საქმეს შეუდექი და უფალი შენთან იქნება.“

¹⁷და ბრძანა დავითმა, რომ ისრაელის ყველა მთავარი მიხმარებოდა მის ძეს, სოლომონს:

¹⁸„განა თქვენთან არ არის უფალი, ჩვენი ღმერთი? განა მან არ მოგცათ ირგვლივ მშვიდობა? მან ჩემს ხელში ჩაყარა ამ ქვეყნის მკვიდრნი, და დამორჩილდა ეს ქვეყანა უფლისა და მისი ერის წინაშე.

¹⁹ახლა კი გაუხსენით თქვენი გული და სული უფალს, თქვენს ღმერთს. ადექით და დაიწყეთ უფლის, ღვთის საწმიდრის შენება, რათა უფლის აღთქმის კიდობანი და ღვთის ჭურჭლეული უფლის სახელზე აგებულ სახლში გადააბრძანოთ.“