Read ბიბლია 2ნეშტ. 14 Bible Online

2ნეშტ. 14 - ბიბლია bible

2ნეშტ. 14

¹და განისვენა აბიამ თავის მამებთან, და დამარხეს დავითის ქალაქში, და მის ნაცვლად ასა, მისი ძე, გამეფდა. ასას დროს ათ წელიწადს მოსვენებული იყო იუდას ქვეყანა.

²კეთილს და სწორს აკეთებდა ასა უფლის, თავისი ღმერთის, თვალში.

³და მოშალა უცხო სამსხვერპლოები და გორაკები, შემუსრა კერპები და აჩეხა აშერები.

⁴და უთხრა იუდას, გამოეძია უფალი, თავისი მამა-პაპის ღმერთი, და შეესრულებინა მისი რჯული და მცნებები.

⁵და მოშალა იუდას ყველა ქალაქში გორაკები და სამზეო სვეტები. და მოისვენა სამეფომ მის წინაშე.

⁶და ააგო იუდაში გამაგრებული ქალაქები, რადგან მოსვენებული იყო ქვეყანა და არც ომი ჰქონია იმ წლებში, რაკი უფალმა სიმშვიდე მისცა.

⁷და უთხრა იუდას: „ავაშენოთ ეს ქალაქები და გარს გალავნები, კოშკები, კარიბჭეები და ბურჯები შემოვავლოთ. ქვეყანა კვლავ ჩვენს ხელშია, რადგან გამოვიძიეთ უფალი, ღმერთი ჩვენი. გამოვიძიეთ და ირგვლივ სიმშვიდე გვიბოძა.“ და დაიწყეს შენება და ხელი მოემართათ.

⁸ასას ჯარი ჰყავდა: სამასი ათასი ფარითა და შუბით შეიარაღებული კაცი იუდადან და ორას ოთხმოცი ათასი ფარით შეიარაღებული და მშვილდოსანი კაცი ბენიამინიდან. ყველანი მაგარი ვაჟკაცები იყვნენ.

⁹და წამოვიდა მათ წინააღმდეგ ზერახ ქუშელი ათასი ათასიანი ჯარით, სამასი ეტლით და მარეშას მოადგა.

¹⁰და გამოვიდა ასა მის წინააღმდეგ საბრძოლველად და დაეწყვნენ ცეფათას ხეობაში, მარეშას მახლობლად.

¹¹და უხმო ასამ უფალს, თავის ღმერთს, და უთხრა: „უფალო, განა შენგან არ არის შეწევნა ძლიერისა და უძლურისა? შეგვეწიე, უფალო, ღმერთო ჩვენო, რადგან შენზე ვართ მინდობილნი და შენი სახელით გამოვედით ამ ურდოს წინააღმდეგ. უფალო, შენ ღმერთი ხარ ჩვენი, ვერ გაგიძლებს კაცი!“

¹²და შემუსრა უფალმა ქუშელნი ასასა და იუდას წინაშე და გაიქცნენ ქუშელნი.

¹³და გაედევნა ასა და ხალხი, მასთან რომ იყო, გერარამდე. და დაეცნენ ქუშელნი, არავინ გადარჩენილა ცოცხალი, რადგან გატყდნენ უფლის წინაშე და მისი მხედრობის წინაშე. და დიდძალი ნადავლი იგდეს ხელთ.

¹⁴და გაანადგურეს ქალაქები გერარის ირგვლივ, რადგან უფლის შიში იყო დაცემული მათზე. და გაძარცვეს ყველა ქალაქი, რადგან იქ ბევრი იყო საძარცვი.

¹⁵საქონლის კარვებიც გაანადგურეს, და უამრავი ცხვარი და აქლემი გამოირეკეს და იერუსალიმში დაბრუნდნენ.