Read ბიბლია 2ნეშტ. 4 Bible Online

2ნეშტ. 4 - ბიბლია bible

2ნეშტ. 4

¹და გააკეთა სპილენძის სამსხვერპლო სიგრძით ოცი წყრთა, სიგანით ოცი წყრთა,

²და ჩამოასხა სპილენძის ზღვა, სრულიად მრგვალი, კიდით კიდემდე ათი წყრთა იყო, სიმაღლე ხუთი წყრთა ჰქონდა, ოცდაათი წყრთა ლარი სწვდებოდა გარს.

³მის ქვეშ, ირგვლივ, ხარების გამოსახულებები იყო შემორტყმული, ზღვას ათ წყრთაზე გარს ევლებოდა მასთან ერთად ჩამოსხმული ხარების ორი რიგი.

⁴იგი თორმეტ ხარზე იდგა. სამი ჩრდილოეთით იყურებოდა, სამი დასავლეთით იყურებოდა, სამი სამხრეთით იყურებოდა, სამი აღმოსავლეთით იყურებოდა. ზღვა ზედ ედგათ და გავები ყველას შიგნით ჰქონდათ მიქცეული.

⁵სისქე ერთი მტკაველი ჰქონდა, კიდეები თასის კიდესავით ჰქონდა გაკეთებული და გაშლილ შროშანს ჰგავდა. სამია თას ბათს იტევდა.

⁶და გააკეთა ათი საბანელი. ხუთი მარჯვენა ფრთაზე დადგა, ხუთი — მარცხენა ფრთაზე, რომ მათში განბანილიყვნენ და სრულადდასაწველი საკლავიც ამოევლოთ. ხოლო ზღვა მღვდელთა გასაბანად იყო განკუთვნილი.

⁷და გააკეთა ათი ცალი ოქროს სასანთლე მათი წესის შესაფერისად და ტაძარში დადგა. ხუთი მარჯვენა ფრთაზე, ხუთიც მარცხენა ფრთაზე.

⁸და გააკეთა ათი ტაბლა და ტაძარში დადგა. ხუთი მარჯვენა ფრთაზე, ხუდთიც მარცხენა ფრთაზე. და გააკეთა ასი ცალი ოქროს სასხურებელი.

⁹და გააკეთა მღვდელთა ეზო, და დიდი ეზო, და ეზოს კარები, და სპილენძით მოჭედა მათი კარებები.

¹⁰ზღვა მარჯვენა ფრთაზე დადგა, სამხრეთ-აღმოსავლეთით.

¹¹და გააკეთა ხურამმა ქვაბები, აქანდაზები, სასხურებლები. და მოამთავრა ხურამმა სამუშაო, რომელსაც სოლომონს უკეთებდა ღვთის სახლში.

¹²ორი სვეტი, ბუღაურები, სვეტისთავზე დასადგმელი, და ორი ცხაური ბუღაურების დასაფარავად,

¹³ოთხასი ბროწეული ორი ცხაურისთვის, ორ-ორი რიგი ბროწეულებისა ორთავე ცხაურისათვის, სვეტებზე დასადგმელი, ბუღაურების დასაფარავად.

¹⁴და გააკეთა კვარცხლბეკები, კვარცხლბეკებზე საბანლები გააკეთა.

¹⁵ერთი ზღვა და თორმეტი ხარი მის ქვეშ.

¹⁶ქვაბები, აქანდაზები, ჩანგლები და ყველა სხვა ჭურჭელი, რაც კი ხურამმა სოლომონს გაუკეთა უფლის სახლისათვის, მბზინვარე სპილენძისა იყო.

¹⁷იორდანეს მიდამოებში ჩამოასხა ისინი მეფემ, თიხნარ ნიადაგზე, სუქოთსა და ცერედას შორის.

¹⁸და გააკეთა სოლომონმა ყველა ეს ჭურჭელი, ძალზე ბევრი, ისე, რომ გაურკვეველი იყო სპილენძის წონა.

¹⁹და გააკეთა სოლომონმა ყველა ის ჭურჭელი, რაც კი ღვთის სახლშია: ოქროს სამსხვერპლო, ოქროსავე ტაბლები, რომლებზედაც საწინაშეო პურები ეწყო;

²⁰სუფთა ოქროს სასანთლეები და მისი ლამპრები, რათა აენთოთ ისინი დაბირის წინ, წესისამებრ.

²¹ოქროს ყვავილები, ლამპრები და მაშები — სუფთა ოქროსაგან,

²²დანები, სასხურებლები, კოვზები, საცეცხლურები — სუფთა ოქროსაგან. ასევე ტაძრის კარებები: წმიდათა წმიდაში შესასვლელი შიდა კარებიც და ტაძრის საწმიდარში შესასვლელი შიდა კარებიც ოქროსივე იყო.