Read ბიბლია ეზრ. 5 Bible Online

ეზრ. 5 - ბიბლია bible

ეზრ. 5

¹და წინასწარმეტყველებდნენ ისრაელის ღმერთის სახელით წინასწარმეტყველნი: ანგია და ზაქარია, ყიდოს ძე, იუდაელებზე, რომელნიც იუდასა და იერუსალიმში ცხოვრობდნენ.

²მაშინ ადგნენ ზერუბაბელ შეალთიელის ძე და იესო იეჰოცადაკის ძე, და შეუდგნენ ღვთის სახლის შენებას იერუსალიმში. და მათთან იყვნენ ღვთის წინასწარმეტყველნი, რომელნიც მხარს უჭერდნენ მათ.

³იმ ხანად მოვიდნენ მათთან თათნაი, მდინარისგაღმელი განმგებელი, და შეთარ-ბოზნაი, და მათი თანამოაზრენი და ასე უთხრეს მათ: „ვინ მოგცათ თქვენ ბრძანება ამ სახლის აშენებისა და ამ კედლების გასრულებისა?“

⁴მაშინ ვუთხარით მათ იმათი სახელები, ვინც ამ შენობას აგებდნენ.

⁵და მათი ღვთის თვალი იყო იუდაელთა უხუცესებზე, და არ შეუწყვეტიათ სამუშაო, ვიდრე დარიოსს არ შეატყობინეს ამბავი და საპასუხო წერილი არ მიიღეს ამ საქმეზე.

⁶აჰა, პირი იმ წერილისა, რომელიც მეფე დარიოსს გაუგზავნეს თათნაიმ, მდინარისგაღმელმა განმგებელმა და შეთარ-ბოზნაიმ და მისმა თანამოაზრეებმა, აფარსახელებმა, რომელნიც მდინარის გაღმა იყვნენ.

⁷დაბეზღება გაუგზავნეს მას, რომელშიც ასე ეწერა: „მეფე დარიოსს სრული მშვიდობა!

⁸იცოდეს მეფემ, რომ ჩვენ ვიყავით იუდას მხარეში, დიდი ღმერთის სახლთან. იგი შენდება დიდრონი ქვებისაგან, კედლებში ძელებს ატანენ, მუშაობა სწრაფად მიდის და წარმატებით მათ ხელში.

⁹მაშინ ვკითხეთ მათ უხუცესებს და ვუთხარით ასე: ‘ვინ მოგცათ თქვენ ბრძანება ამ ტაძრის შენებისა და ამ კედლების აგებისა?’

¹⁰და გამოვიკითხეთ მათი სახელები, რომ გვეცნობებინა შენთვის და დაგვეწერა იმათი სახელებიც, რომელნიც სათავეში უდგანან მათ.

¹¹მათ ასეთი პასუხი გაგვცეს: ‘ჩვენ ვართ მსახურნი ცისა და მიწის ღმერთისა; თავიდან ვაშენებთ ტაძარს, რომელიც მრავალი წლის წინ აშენდა, და ისრაელის დიდი მეფე აშენებდა მას და დაასრულა იგი.

¹²მაგრამ, რაც ჩვენმა მამებმა განარისხეს ცათა ღმერთი, მან ბაბილონის მეფეს ნაბუქოდონოსორს, ქალდეველს, ჩაუგდო ისინი ხელში, რომელმაც ეს ტაძარი დაანგრია და ხალხი ბაბილონში გადაასახლა.

¹³მაგრამ კიროსის ბაბილონის მეფის, მეფობის პირველ წელს კიროს მეფემ გასცა ბრძანება ღვთის სახლის ასაშენებლად.

¹⁴და ღვთის სახლის ოქროსა და ვერცხლის ჭურჭელი, რაც ნაბუქოდონოსორმა გაიტანა იერუსალიმის ტაძრიდან და წაიღო ბაბილონის ტაძარში, უკან გამოიტანა კიროს მეფემ და გადასცა იგი შეშბაცარს, რომელიც განმგებლად ჰყავდა დანიშნული.

¹⁵და უთხრა მას: აიღე ეს ჭურჭელი, წადი და წაიღე იერუსალიმის ტაძარში, და აშენდეს ღვთის სახლი თავის ადგილზეო.

¹⁶მაშინ მოვიდა ის შეშბაცარი და საძირკველი ჩაუყარა ღვთის სახლს იერუსალიმში; და იმ დროიდან მოკიდებული აქამდე შენდება იგი, მაგრამ ჯერ არ გასრულებულა.’

¹⁷და ახლა, თუ მეფე ინებებს, მოჩხრიკონ მეფის საგანძური იქ, ბაბილონში, ნამდვილად გასცა თუ არა კიროს მეფემ განკარგულება ამ ღვთის სახლის ასაშენებლად იერუსალიმში. მეფემ გამოგვიგზავნოს გადაწყვეტილება ამ საქმის თაობაზე. ამის შესახებ წარმოიგზავნოს ჩვენთან.“