Read ბიბლია ეზრ. 8 Bible Online

ეზრ. 8 - ბიბლია bible

ეზრ. 8

¹და აჰა, მათი მამისსახლის თავკაცთა საგვარტომო ნუსხა, რომელნიც წამოვიდნენ ჩემთან ერთად ბაბილონიდან ართახშასთას მეფობაში:

²ფინხასის ძეთაგან: გერშომი; ითამარის ძეთაგან: დანიელი; დავითის ძეთაგან: ხატუში;

³შექანიას ძეთაგან და ფარყოშის ძეთაგან: ზაქარია და მასთან მითვლილი ას ორმოცდაათი მამროვანი;

⁴ფახათ-მოაბის ძეთაგან: ელიეჰოყენაი, ზერახიას ძე, და მასთან ერთად ორასი მამროვანი;

⁵[ზათუს] ძეთაგან: შექანია, იახაზიელის ძე, და მასთან ერთად სამასი მამროვანი;

⁶ყადინის ძეთაგან: ყებედი, იონათანის ძე, და მასთან ერთად ორმოცდაათი მამროვანი;

⁷ყელამის ძეთაგან: ესაია, ყათალიას ძე, და მასთან ერთად სამოცდაათი მამროვანი;

⁸შეფატიას ძეთაგან: ზებადია, მიქაელის ძე, და მასთან ერთად ოთხმოცი მამროვანი;

⁹იოაბის ძეთაგან: ყობადია, იეხიელის ძე, და მასთან ერთად ორას თვრამეტი მამროვანი;

¹⁰ბანის ძეთაგან: შელომითი, იოსიფიას ძე, და მასთან ერთად ას სამოცი მამროვანი;

¹¹ბებაის ძეთაგან: ზაქარია, ბებაის ძე, და მასთან ერთად ოცდარვა მამროვანი;

¹²ყაზგადის ძეთაგან: იოხანანი, ჰაკატანის ძე, და მასთან ერთად ას ათი მამროვანი;

¹³ადონიკამის ძეთაგან უკანასკნელნი, და აჰა, მათი სახელები: ელიფელეტი, იეყიელი და შემაყია, და მათთან ერთად სამოცი მამროვანი;

¹⁴ბიგვაის ძეთაგან: ყუთაი და ზაბუდი, და მათთან ერთად სამოცდაათი მამროვანი.

¹⁵და შევყარე ისინი მდინარესთან, რომელიც ერთვის აჰავას, და ვიდექით იქ სამი დღე. გამოვიკვლიე ერი და სამღვდელოება, მაგრამ მათ შორის ლევიანთაგან იქ ვერ ვპოვე.

¹⁶და დავიბარე ელიეზერი, არიელი, შემაყია, ელნათანი, იარიბი, ელნათანი, ნათანი, ზაქარია, მეშულამი — თავკაცები, და იოიარიბი და ელნათანი — სწავლულები.

¹⁷გავგზავნე ისინი იდოსთან, ქასიფიას ადგილის უფროსთან, და შევუთვალე მათი პირით იდოს და მის ძმებს, ტაძრის მსახურებს, ქასიფიას ადგილში მყოფთ, რათა მოეყვანათ ჩვენთვის მსახურნი ჩვენი ღმერთის სახლისათვის.

¹⁸რადგან კეთილი ხელი ჩვენი ღმერთისა ჩვენზე იყო, მათ მოიყვანეს ჩვენთან ერთი გონიერი კაცი მახლის ძეთაგან, ლევის ძისა, ისრაელის ძისა, სახელად შერებია და მისი ვაჟები და თვრამეტი კაცი;

¹⁹და ხაშაბია, და მასთან ესაია მერარის ძეთაგან, მისი ძმები და მისი ვაჟები — ოცი კაცი.

²⁰და ტაძრის მსახურთაგან, რომელნიც დავითსა და მთავრებს მიცემული ჰყავდათ ლევიანთა სამსახურებლად — ორას ოცი ტაძრის მსახური; ყველა მათგანი სახელებით იყო ხმობილი.

²¹და გამოვაცხადე იქ მარხვა, მდინარე აჰავაზე, რათა თავი დაგვემდაბლებინა ჩვენი ღმერთის წინაშე, და გვეკითხა მისგან სწორი გზა ჩვენთვის და ჩვენი წვრილშვილისა და მთელი ჩვენი მონაგარისათვის,

²²რადგან შემრცხვა მეთხოვა მეფისთვის ლაშქარი და მხედრები, მტრისაგან გზაზე თავის დასაცავად, რადგან ნათქვამი გვქონდა მეფისათვის: ‘ჩვენი ღმერთის ხელი სასიკეთოა ყველასთვის, ვინც ეძებს მას, ხოლო მისი ძალა და რისხვა თავს ატყდება ყველას, ვინც მიატოვებს მას!’

²³და ვიმარხულეთ, და ვთხოვეთ ჩვენს ღმერთს ეს და შეისმინა მან ჩვენი.

²⁴და გამოვყავი თორმეტი კაცი მღვდლების უფროსთაგან: შერებია, ხაშაბია და მათთან ერთად ათი კაცი მათი ძმებიდან.

²⁵და ავუწონე მათ ვერცხლი, ოქრო, და ჭურჭელი, ჩვენი ღვთის სახლის შეწირულობა, რაც შესწირეს მეფემ, მისმა მრჩევლებმა, მთავრებმა და იქ მყოფმა მთელმა ისრაელმა.

²⁶და მივუწონე მათ ხელში ექვსას ორმოცდაათი ტალანტი ვერცხლი, და ვერცხლის ჭურჭელი ასი ტალანტისა, და ასი ტალანტი ოქრო.

²⁷და ოცი თასი ათას დრაქმიანი და პრიალა სპილენძის ორი საუკეთესო ჭურჭელი, ოქროსავით ძვირფასი.

²⁸და ვუთხარი მათ: „თქვენ წმიდა ხართ უფლისათვის და ეს ჭურჭელიც წმიდაა; და ვერცხლი და ოქრო ნებაყოფლობით შეწირულობაა უფლის, თქვენი მამების ღმერთისადმი.

²⁹ფრთხილად იყავით და მოუფრთხილდით, ვიდრე მიუწონიდეთ მღვდლების, ლევიანების და ისრაელიანთა ტომის მთავრების უფროსებს იერუსალიმში, უფლის სახლის სალოცავებში რომ არიან.“

³⁰და ჩაიბარეს მღვდლებმა და ლევიანებმა ვერცხლი და ოქრო, და ჭურჭელი წონით, რათა წაეღოთ იერუსალიმში, ჩვენი ღვთის სახლში.

³¹და დავიძარით მდინარე აჰავადან იერუსალიმში წასასვლელად პირველი თვის მეთორმეტე დღეს; და ჩვენი ღმერთის ხელი იყო ჩვენზე და გვიხსნიდა ჩვენი მტრის ხელიდან და გზაზე ჩასაფრებულთაგან.

³²და მივედით იერუსალიმში, და დავყავით იქ სამი დღე.

³³და მეოთხე დღეს ვერცხლი და ოქრო, და ჭურჭელი ჩვენი ღვთის სახლში მიწონილ იქნა მერემოთის, ურია მღვდლის ვაჟის ხელში; და მასთან ერთად იყო ელეაზარ ფინხასის ძე, და მათთან ერთად იყვნენ იოზაბადი იესოს ძე და ნოადია ბინუის ძე, ლევიანები.

³⁴ყველაფერი დაითვალა და აიწონა; და ჩაიწერა მთელი ეს წონა იმ დროს.

³⁵ტყვეობიდან მოსულებმა და გადასახლებიდან დაბრუნებულებმა სრულადდასაწველი შესწირეს ისრაელის ღმერთს: თორმეტი მოზვერი მთელი ისრაელისათვის, ოთხმოცდათექვსმეტი ვერძი, სამოცდაჩვიდმეტი კრავი, თორმეტი ვაცი ცოდვისათვის, ყოველივე სრულადდასაწველად უფლისათვის.

³⁶და გადასცეს მეფისნაცვლებს და მდინარისგაღმელ განმგებელთ; და მათაც ხელი შეუწყვეს ხალხსა და ღვთის სახლს.