Read ბიბლია მეორე ეზრა 3 Bible Online

მეორე ეზრა 3 - ბიბლია bible

მეორე ეზრა 3

¹დარიოს მეფემ დიდი წვეულება გაუმართა ყველა თავის ქვეშევრდომს და მთელ თავის სახლეულს, მიდიისა და სპარსეთის ყველა მთავარს,

²ყველა სატრაპს, მხედართმთავარს და ინდოეთიდან ქუშამდე ას ოცდაშვიდი ყმადნაფიცი ქვეყნის გამგებელს.

³სმა-ჭამით რომ იჯერეს გული, კმაყოფილნი დაიშალნენ, დარიოს მეფე კი თავის საწოლ ოთახში შევიდა, გამოიძინა და ბოლოს, გაიღვიძა.

⁴ამასობაში მეფის სამმა ჭაბუკმა — პირადმა მცველმა — ერთმანეთს უთხრა:

⁵„მოდით, სამივემ თითო სიტყვა ვთქვათ იმის თაობაზე, თუ რა არის ყველაზე უფრო ძლიერი; ვინც დანარჩენ ორზე უფრო ბრძნულ სიტყვას იტყვის, დაე, დარიოს მეფემ სწორედ ის აავსოს წყალობით;

⁶ძოწეულით შეიმოსოს და ოქროს სასმისით სვას, ოქროზე ეძინოს და ეტლით დაბრძანდებოდეს, რომელშიაც ოქროს აღვირიანი ცხენები იქნებიან შებმულნი, თავს ბისონის საბურავი უმკობდეს და ყელს — მანიაკი;

⁷დარიოსის გვერდით იჯდეს თავისი სიბრძნის წყალობით, და დარიოსის ნათესავად იწოდებოდეს“.

⁸სამივემ ხელად დაწერა თავისი სიტყვა, დაბეჭდა და სასთუმალთან დაუდო დარიოს მეფეს.

⁹როცა მეფე გაიღვიძებს, წერილებს მიართმევენ და ვის სიტყვასაც უფრო ბრძნულად მიიჩნევენ მეფე და სამი სპარსელი დიდებული, გამარჯვებაც მას დარჩება, როგორც სწერია.

¹⁰ერთმა დაწერა: მძლეთა-მძლეა ღვინო.

¹¹მეორემ დაწერა: მძლეთა-მძლეა მეფე.

¹²მესამემ დაწერა: მძლეთა-მძლენი არიან ქალები, მაგრამ ყველაფერს სძლევს ჭეშმარიტება.

¹³როდესაც გაიღვიძა მეფემ, მიართვეს დაწერილი და წაიკითხა.

¹⁴დაიბარა სპარსეთისა და მიდიის ყველა დიდებული, სატრაპები და მხედართმთავარნი, მხარეთა გამგებელნი და მრჩეველნი; დაჯდა სამსჯავროში და წაუკითხეს მათ დაწერილი.

¹⁵ბრძანა, უხმეთ ამ ჭაბუკებს, რათა განგვიმარტონ თავიანთი სიტყვებიო. უხმეს და ისინიც ეახლნენ.

¹⁶და უთხრა მათ: „აგვიხსენით ეგ თქვენი სიტყვები“.

¹⁷დაიწყო პირველმა, ღვინის მძლეთა-მძლეობას რომ ამტკიცებდა, და ასე თქვა:

¹⁸„როგორ არა სძლევს, კაცნო, ღვინო ყველაფერს? აკი გონებას უბნელებს ყველას, ვინც მას ეწაფება.

¹⁹ერთმანეთს უსწორებს ჭკუით მეფეს და ობოლს, მონას თუ თავისუფალს, ღატაკს და მდიდარს.

²⁰ყველა გონებას ალხენს და ამხიარულებს, ასე რომ, აღარც მწუხარება ახსოვს ვინმეს და აღარც მოვალეობა.

²¹ყველა გულს მდიდრად აქცევს, ასე რომ, აღარც მეფე ახსოვს ვინმეს და აღარც სატრაპი, ყველას თავის საკუთარ ტალანტზე ალაპარაკებს.

²²გამტყვრალთ აღარც ძმობა ახსოვთ, აღარც მეგობრობა და არც თუ იშვიათად იშიშვლებენ მახვილს.

²³გამოფხიზლდებიან და აღარ ახსოვთ, რა ჩაიდინეს.

²⁴მაშ, კაცნო, როგორ არა ვთქვათ ღვინო მძლეთა-მძლედ, რაკიღა ხალხს აიძულებს ასე მოიქცნენ?“ ესა თქვა და დადუმდა.