ბიბლია bible online

მეორე ეზრა 8

¹ყოველივე ამის შემდეგ, სპარსელთა მეფის არტარქსერქსეს მეფობის დროს, მოვიდა ეზრა, სარაიას ძე, აზარიას, ხილკიას, შალუმის,

²ცადოკის, ახიტუბის, ამარიას, ყუცის, ბუკის, აბიშუაყის, ფინხასის, ელეაზარის, მღვდელმთავარ აარონის შთამომავალი.

³ეს ეზრა მოვიდა ბაბილონიდან როგორც მწიგნობარი და გაწაფული მოსეს სჯულში, ღვთისგან რომ მიეცა ისრაელს.

⁴პატივი მიაგო მეფემ და კეთილმოსურნედ შეიწყნარა მისი ყოველი სათხოვარი.

⁵მასთან ერთად მოვიდნენ იერუსალიმში ზოგიერთნი ისრაელის ძეთაგან, მღვდელთა, ლევიანთა, მგალობელთა, მეკარეთა და ტაძრის მსახურთაგან, არტაქსერქსეს მეფობის მეშვიდე წლის მეხუთე თვეს.

⁶პირველი თვის ახალმთვარობისას ბაბილონიდან გამოსულნი, უფლის კეთილმოწყალებით, მეხუთე თვის ახალმთვარობისას მშვიდობიანად მოვიდნენ იერუსალიმში.

⁷ხოლო ეზრა სულ იმის ცდაში იყო, რომ არაფერი გამორჩენოდა უფლის სჯულიდან და მცნებათაგან და ყველა ისრაელიანისთვის ესწავლებინა მთელი სამართალი და მსჯავრი.

⁸მოვიდა მეფე არტაქსერქსეს შემდეგი შინაარსის წერილობითი ბრძანებაც ეზრა მღვდლისა და საღვთო სჯულის მკითხველისადმი:

⁹„მეფე არტარქსერქსე მოკითხვას უთვლის ეზრა მღვდელსა და საღვთო სჯულის მკითხველს.

¹⁰კაცთმოყვრულად განვსაჯე და ვბრძანე: ვისაც კი სურს ჩვენს სამეფოში მყოფი იუდაელი ხალხიდან, მღვდელსა თუ ლევიანს, შენთან ერთად წამოვიდეს იერუსალიმს,

¹¹დიახ, ვისაც სურს, გაემზადოს და თან წამოგყვეს, როგორც განვსაჯე ჩემს შვიდ უახლოეს მრჩეველთან ერთად,

¹²რათა ნახონ, რა ხდება იუდასა და იერუსალიმში, თანახმად უფლის სჯულისა,

¹³და მიართვან ჩემგან და ჩემი ახლობლებისაგან აღთქმული ძღვენი იერუსალიმში ისრაელის უფალს, მთელი ოქრო-ვერცხლი, რაც კი მოიძებნება ბაბილონის ქვეყნად, ხალხის შესაწირავთან ერთად მათი უფლის ტაძრისათვის, რომელიც არის იერუსალიმში.

¹⁴შეგროვდეს ოქრო-ვერცხლი კურატების, ვერძების, კრავებისა და სხვა მისთანათათვის,

¹⁵რათა შესწირონ მსხვერპლი მათი უფლის სამსხვერპლოზე იერუსალიმში.

¹⁶და ყველაფერი, რისი აღსრულებაც გსურს შენს ძმებთან ერთად ამ ოქრო-ვერცხლით, აღასრულე შენი ღმერთის ნებისამებრ.

¹⁷უფლის წმიდა ჭურჭელი, რაც გებოძა, რათა ემსახურო შენი ღმერთის ტაძარს, რომელიც არის იერუსალიმში,

¹⁸და ყველაფერი, რაც დაგჭირდება შენი ღმერთის ტაძრისთვის, სამეფო საგანძურიდან გაეცი.

¹⁹და მე, მეფე არტარქსერქსემ, ვუბრძანე სირიისა და ფინიკიის საგანძურთა მცველებს, რომ ყველაფერი, რასაც მოითხოვს ეზრა მღვდელი და უზენაესი ღმერთის სჯულის მკითხველი, დაუყოვნებლივ მიეცეს, თვით ვერცხლის ასი ტალანტიც კი;

²⁰ასევე ხორბალი, ას საწყაულამდე, ამდენივე ღვინო და ბლომად მარილი.

²¹ყოველივე დანარჩენიც, საღვთო სჯულის შესაბამისად, საგულდაგულოდ აღსრულდეს უზენაესი ღმერთის სახელზე, რათა თავს არ დაატყდეს რისხვა მეფის და მის წულთა სამეფოს.

²²იმასაც გეტყვით, რომ არავითარი ხარკი არ დააკისროთ არცერთ მღვდელსა და ლევიანს, მგალობელსა და მეკარეს, ტაძრის მსახურს თუ ტაძრის მწერალს; და არც არავის ჰქონდეს უფლება, რაიმე გადაახდევინოს მათ.

²³ხოლო შენ, ეზრა, ღვთის სიბრძნისამებრ, დაადგინე მსაჯულნი და მოსამართლენი, რათა მთელს სირიასა და ფინიკიაში განიკითხავდნენ ყველას, ვინც იცის სჯული შენი ღვთისა, არმცოდნეთ კი წვრთნიდე.

²⁴ღვთის სჯულისა თუ მეფის კანონის ყველა დამრღვევი დაუყოვნებლივ დასჯილ იქნეს სიკვდილით ან წამებით, ფულადი ჯარიმით ან განდევნით“.

²⁵კურთხეულია ერთი უფალი, რომელმაც გულში ჩაუნერგა მეფეს განედიდებინა მისი სახლი იერუსალიმში.

²⁶ხოლო მე პატივი მომაგო მეფის და მისი მრჩევლების, ყველა მისი ახლობლისა და დიდებულის წინაშე.

²⁷მხნეობა მოვიკრიფე უფლის, ჩემი ღმერთის, შეწევნით და შევკრიბე ისრაელის ძენი, რათა ჩემთან ერთად წამოსულიყვნენ.

²⁸აი, წინამძღოლნი მათი საგვარეულოებისა და უხუცესობის მიხედვით, ჩემთან ერთად რომ წამოვიდნენ ბაბილონიდან მეფე არტაქსერქსეს მეფობის დროს:

²⁹ფინხასის ძეთაგან — გერშომი; ითამარის ძეთაგან — გამაელი; დავითის ძეთაგან — ხატუში შექანიას [ძე];

³⁰ფაროშის ძეთაგან — ზაქარია და მასთან ერთად ჩაწერილი ას ორმოცდაათი კაცი;

³¹ფახათმოაბის ძეთაგან — ელიეჰონაი ზერახიას [ძე] და მასთან ერთად ორასი კაცი;

³²ზათუს ძეთაგან — შექანია იახაზიელის [ძე] და მასთან ერთად სამასი კაცი; ყადინის ძეთაგან — ყობედ იონათანის [ძე] და მასთან ერთად ორას ორმოცდაათი კაცი;

³³ყელამის ძეთაგან — ესაია ყათალიას [ძე] და მასთან ერთად სამოცდაათი კაცი;

³⁴შეფატიას ძეთაგან — ზერახია მიქაელის [ძე] და მასთან ერთად სამოცდაათი კაცი;

³⁵იოაბის ძეთაგან — ყობადია იეხიელის [ძე] და მასთან ერთად ორას თორმეტი კაცი;

³⁶ბანის ძეთაგან — შელომითი იოსიფიას [ძე] და მასთან ერთად ას სამოცი კაცი;

³⁷ბებაის ძეთაგან — ზაქარია ბებაის [ძე] და მასთან ერთად ოცდა რვა კაცი;

³⁸ყაზგადის ძეთაგან — იოხანანი ჰაკატანის [ძე] და მასთან ერთად ას ათი კაცი;

³⁹ადონიკამის ძეთაგან — უკანასკნელნი; და აი, მათი სახელები: ელიფელეტი, იეყუელი და მათთან ერთად სამოცდაათი კაცი;

⁴⁰ბიგვაის ძეთაგან — ყუთაი ისტალკურუსის [ძე] და მასთან ერთად სამოცდაათი კაცი.

⁴¹შევკრიბე ისინი თერასად წოდებულ მდინარესთან, სამი დღე დავყავით იქ და მე დავათვალიერე ისინი.

⁴²მაგრამ მღვდელთა და ლევიანთაგან ვერავინ ვპოვე იქ.

⁴³მაშინ შევუთვალე ელეაზარს, იდუელს, მაყასმასს, ელნათანს, შემაყიას, იარიბს, ნათანს, ელნათანს, ზაქარიას და მეშულამს, წინამძღვრებსა და სწავლულთ,

⁴⁴რომ მოსულიყვნენ ყიდოსთან, განძთსაცავის ადგილის წინამძღოლთან,

⁴⁵და ვუბრძანე მათ: უთხარით-მეთქი ყიდოს, მის ძმებსა და განძთსაცავის ადგილას მყოფთ, მღვდელმსახურნი გამოგვიგზავნონ ჩვენი უფლის სახლისთვის.

⁴⁶და მოგვგვარეს კიდეც, მტკიცე ხელით ჩვენი უფლისა, მცოდნე კაცნი, მახლის, ლევის ძის, ისრაელის ძის, შერებიას შთამომავალნი — მისი ძენი და ძმანი, თვრამეტი კაცი;

⁴⁷ხაშაბია და ანუნუსი და მისი ძმა ესაია, ხანანიას ძეთაგან, და მათი ძენი, ოცი კაცი;

⁴⁸ტაძრის მსახურთაგან, დავითმა და წინამძღოლებმა მსახურებად რომ მისცეს ლევიანებს, ორას ოცი კაცი, თვითოეულის სახელის აღნუსხვით.

⁴⁹და გამოვუცხადე იქ ჭაბუკებს, რომ ემარხულათ ჩვენი უფლის წინაშე,

⁵⁰რათა კეთილი მგზავრობა გამოგვეთხოვა მისგან ჩვენთვის, ჩვენი თანამგზავრების, შვილებისა და საქონლისათვის.

⁵¹რადგანაც მრცხვენოდა მეფისთვის მეთხოვა ქვეითნი, მხედრები და გამყოლები ჩვენს დასაცავად მტრებისაგან,

⁵²ვინაიდან მეფეს ვუთხარით, რომ ჩვენი უფლის ძალმოსილება მის მაძიებლებთან იქნებოდა ყველა კეთილ საქმეში.

⁵³კვლავ შევევედრეთ ჩვენს უფალს ყოველივე ამისათვის და დიდი წყალობა მივიღეთ მისგან.

⁵⁴გამოვყავი მღვდლების წინამძღვართაგან თორმეტი კაცი, შერებია, ხაშაბია და მათთან ერთად მათივე ძმებისაგან ათი კაცი.

⁵⁵და ავუწონე მათ ოქრო-ვერცხლი და ჩვენი უფლის სახლის წმიდა ჭურჭელი, თვით მეფის, მისი მრჩევლების, დიდებულებისა და მთელი ისრაელის მიერ მიძღვნილი;

⁵⁶ავუწონე და გადავეცი ექვსას ორმოცდაათი ვერცხლის ტალანტი, ასი ტალანტის ვერცხლის ჭურჭელი, ასი ოქროს ტალანტი, ოცი ოქროს ნივთი და ოქროსავე მბზინავი წმიდა სპილენძის თორმეტი ჭურჭელი.

⁵⁷და ვუთხარი მათ: „თქვენც წმიდანი ხართ უფლის წინაშე, ეს ჭურჭელიც და ოქრო-ვერცხლიც; მაშ, ილოცეთ უფლის, ჩვენი მამა-პაპის უფლის მიმართ.

⁵⁸იფხიზლეთ და გაუფრთხილდით მათ, ვიდრე არ ჩააბარებთ მღვდლების წინამძღვრებს, ლევიანებს და ისრაელის საგვარეულოთა წინამძღოლებს იერუსალიმში, ჩვენი უფლის სახლის საჭურჭლეში“.

⁵⁹მღვდლებმა და ლევიანებმა, ოქრო-ვერცხლი და ჭურჭელი რომ მიიღეს იერუსალიმში, უფლის ტაძარში შეიტანეს ისინი.

⁶⁰დავიძარით მდინარე თერასიდან პირველი თვის მეთორმეტე დღეს და შევედით იერუსალიმში ჩვენი უფლის მტკიცე ხელით, რომელიც გვიფარავდა და მტრისაგან გვიცავდა ჩვენ, და ასე მოვაღწიეთ იერუსალიმს.

⁶¹აქ, მესამე დღეს, ჩვენი აწონილი ოქრო-ვერცხლი გადაეცა უფლის სახლში მღვდელ მერემოთს, ურიას ძეს.

⁶²მასთან ერთად იყო ელეაზარი, ფინხასის ძე; იქვე იყვნენ ლევიანები — იოზაბადი, იესოს ძე და მოეთი, ბინუის ძე; ყველაფერი ჩააბარეს რიცხვით და წონით და იმავდროულად ჩაწერილ იქნა მათი წონაც.

⁶³ხოლო ტყვეობიდან დაბრუნებულებმა შესწირეს მსხვერპლი უფალს, ისრაელის ღმერთს: თორმეტი კურატი მთელი ისრაელისთვის, ოთხმოცდათექვსმეტი ვერძი, სამოცდათორმეტი კრავი, თორმეტი თხა გადარჩენის აღსანიშნავად, და ყოველივე ეს იყო მსხვერპლი უფლისა.

⁶⁴მეფის განკარგულებანი გადასცეს სამეფოს გამგებლებსა და კოილე-სირიისა და ფინიკიის მთავრებს, რომლებმაც პატივი მიაგეს ხალხსა და უფლის ტაძარს.

⁶⁵როცა ყოველივე ეს აღსრულდა, მოვიდნენ ჩემთან წინამძღოლები და მითხრეს:

⁶⁶„არ განეშორა ისრაელის ერი, მთავრები, მღვდლები და ლევიანები ამ ქვეყნის უცხო ტომებს და მათ უწმინდურებას. ქანაანელებს, ხეთელებს, ფერიზელებს, იებუსელებს, მოაბელებს, ეგვიპტელებს და ედომელებს,

⁶⁷რადგან თვითონაც და მათი ძენიც შეეუღლნენ მათ ასულებს და შეერია წმიდა თესლი უცხო თესლს, აქაურ ხალხებს; ხოლო წინამძღოლნი და დიდებულნი ამ უსჯულოების მონაწილენი გახდნენ იმთავითვე“.

⁶⁸ამის გამგონემ შემოვიძარცვე ტანსაცმელი და სამღვდელო შესამოსელი, თმა-წვერს ვიგლეჯდი და ვიჯექი მწუხარე და შეჭირვებული.

⁶⁹შემომეხვივნენ ისრაელის უფლის სიტყვით აღძრულნი, როცა უსჯულოების გამო ვგოდებდი და მწუხრის მსხვერპლშეწირვამდე ვიჯექი შეურვებული.

⁷⁰ნამარხულევი რომ ავდექი შემოხეული ტანსაცმლით და სამღვდელო შესამოსელით, მუხლი მოვიყარე და ხელაპყრობით მივმართე უფალს:

⁷¹„უფალო, მრცხვენია და ვძრწი შენი სახის წინაშე;

⁷²რადგანაც ცოდვები თავზე გადაგვდის და ჩვენმა უგუნურებამ ზეცას უწია.

⁷³მამა-პაპის დროიდან მოყოლებული დღევანდელ დღემდე დიდ ცოდვაში ვართ დანთქმულნი.

⁷⁴როგორც ჩვენი, ისე მამა-პაპათა ცოდვების გამო ჩვენს ძმებთან, ჩვენს მეფეებსა და ჩვენს მღვდლებთან ერთად ქვეყნიერების მეფეთა ხელში ჩაგვყარე მახვილით ამოსაწყვეტად, საძარცვავად და საგინებლად დღევანდელ დღემდე.

⁷⁵მაგრამ რაოდენი მოწყალება მოიღე ჩვენზე ამჟამად, რათა შეგვენარჩუნებინა, უფალო, ჩვენი ფესვი და სახელი შენი საწმიდრის ადგილას;

⁷⁶შენ მოგვივლინე ნათელი ჩვენი უფლის სახლში და დროულად გვიწყალობე საზრდო ჩვენი მონობის ჟამს.

⁷⁷მონობაშიაც არ მივუტოვებივართ ჩვენს უფალს, არამედ მადლი მოგვფინა სპარსელ მეფეთა წინაშე,

⁷⁸რათა მოეცათ ჩვენთვის საზრდო, განედიდებინათ ჩვენი უფლის ტაძარი და აღდგენილიყო დაქცეული სიონი, ხოლო ჩვენ დავმკვიდრებულიყავით იუდასა და იერუსალიმში.

⁷⁹„აწ რაღა გვეთქმის, უფალო, ყოველივე ამის მქონებელთ? დავარღვიეთ შენი ბრძანებულებანი, რომელნიც მოგვეცი შენი მონა-მორჩილი წინასწარმეტყველთა ხელით და გვითხარი:

⁸⁰‘ქვეყანა, რომელშიაც შედიხართ, რათა დაიმკვიდროთ იგი, წაბილწულია ქვეყნიერების უცხოელთა სიბილწით, და მათი უწმინდურებითაა სავსე;

⁸¹ასე რომ, ამიერიდან თქვენს ასულთ ცოლად ნუ მისცემთ მათ ვაჟებს და ნურც თქვენს ვაჟებს მოჰგვრით მათ ასულთ ცოლად;

⁸²ნურასოდეს დაუზავდებით მათ, რათა გაძლიერდეთ, იგემოთ სიკეთენი ამ მიწისა და თქვენს შვილებს საუკუნო სამკვიდროდ მისცეთ იგი’.

⁸³რაც მოგვდის, ჩვენი უკეთური საქმეებისა და ჩვენი დიდი ცოდვების გამო მოგვდის.

⁸⁴შენ შეგვიმსუბუქე, უფალო, ჩვენი ცოდვები და მოგვეცი ასეთი ფესვი, მაგრამ ჩვენ კვლავ მივიქეცით, რათა დაგვერღვია შენი სჯული და შევრეოდით ამ ქვეყნის ხალხთა უწმინდურებას.

⁸⁵ისე ხომ არ გაგვირისხდი, რომ ამოგვწყვიტო და აღარც ჩვენი ფესვი დარჩეს, აღარც თესლი და აღარც სახელი?

⁸⁶ჭეშმარიტი ხარ, უფალო ისრაელისა, რადგანაც ფესვად დავრჩით დღევანდელ დღემდე.

⁸⁷მაგრამ აწ კვლავ უსჯულოებაში დანთქმულნი ვართ შენს წინაშე, თუმცა არ კი უნდა ვყოფილიყავით შენს პირისპირ“.

⁸⁸როცა ეზრა ლოცულობდა, აღსარებას ამბობდა და ტიროდა ტაძრის წინ მიწას განრთხმული, გარს შემოადგა იერუსალიმიდან დიდძალი ხალხი: ქალები, კაცები და ბავშვები, და იყო დიდი გოდება ხალხში.

⁸⁹შეღაღადა იექონიამ, იეელოსის ძემ, ისრაელის ძეთაგან, და უთხრა ეზრას: „ჩვენ ვცოდეთ უფალს და შევეუღლეთ ამ ქვეყნის უცხო ტომთა ქალებს; და, აი, ახლა შენი იმედი აქვს ისრაელს.

⁹⁰შევფიცოთ უფალს, რომ გავუშვებთ უცხოტომელ ცოლებს თავიანთი შვილებითურთ, როგორც განსაჯე შენ და საღვთო სჯულის ყველა მორჩილმა.

⁹¹აღდექ და აღასრულე ეს შენი საქმე, და შენთან ერთად როგორმე ჩვენც შევძლებთ ამას“.

⁹²აღდგა ეზრა, დააფიცა მთელი ისრაელის მღვდლების და ლევიანების წინამღძოლნი, რომ ასე მოიქცეოდნენ, და მათაც შეჰფიცეს.

Read ბიბლია მეორე ეზრა 8 Bible Online

მეორე ეზრა 8 - ბიბლია bible

მეორე ეზრა 8