Read ბიბლია ტობითი 11 Bible Online

ტობითი 11 - ბიბლია bible

ტობითი 11

¹მგზავრები ნინევეს რომ მიუახლოვდნენ, რაფაელმა უთხრა ტობიას:

²„ხომ იცი, ძმაო, რა დღეში დატოვე მამაშენი?

³მოდი, წინ გავუსწროთ შენს ცოლს და შევამზადოთ შინაურები.

⁴შენ კი ხელში გეჭიროს თევზის ნაღველი.“ წავიდნენ და უკან მისდევდათ ძაღლი.

⁵ხანა კი იჯდა და შვილის მოლოდინში გზას გაჰყურებდა.

⁶შენიშნა მომავალი და თავის ქმარს უთხრა: „აჰა, მოდის შენი შვილი ერთ კაცთან ერთად.“

⁷რაფაელმა თქვა: „ვიცი, დღეს აეხილება თვალი მამაშენს.

⁸შენ მხოლოდ ნაღველი წაუსვი თვალებზე და, როცა აეწვება, მოიწმენდს, ლიბრი გადაეცლება და დაგინახავს.“

⁹ხანა სირბილით შეეგება შვილს, ყელზე მოეჭდო და უთხრა: „რაკი შენს ნახვას მოვესწარი, შვილო, ახლა შენი ჭირიც წამიღია.“ და ორივენი ატირდნენ.

¹⁰ტობითი კარს მიადგა და წაიბორძიკა, შვილმა კი მიირბინა მასთან.

¹¹ხელი შეაშველა მამას, თვალებზე ნაღველი სცხო და უთხრა: „გამხნევდი, მამაჩემო!“

¹²თვალები აეწვა ტობითს და მოიწმინდა თუ არა, გუგებიდან ლიბრი გადაეცალა.

¹³როგორც კი დაინახა შვილი, ყელზე მოეჭდო, ატირდა და თქვა:

¹⁴„კურთხეული ხარ, ღმერთო, კურთხეულია შენი სახელი უკუნისამდე, კურთხეულია ყველა წმიდა ანგელოზი შენი, რადგანაც შენს მიერ დასჯილი შენვე შემიწყალე, და, აი, ვხედავ ტობიას, ჩემს ძეს!“

¹⁵შევიდა მისი ძე გახარებული და აუწყა მამას მთელი ის საკვირველება, რაც მიდიაში გადახდა თავს.

¹⁶გამოვიდა ტობითი, რათა ნინევეს ბჭესთან შეგებებოდა რძალს; მიდიოდა გახარებული და ღმერთს ადიდებდა, და უკვირდა ყველას, მის შემყურეს, თვალახელილს რომ ხედავდა გზაზე. და აღიარა ტობითმა მათ წინაშე, რომ შეიწყალა იგი ღმერთმა.

¹⁷როდესაც სარას, თავის რძალს მიუახლოვდა, დალოცა იგი და უთხრა: „მშვიდობით მოგვიხველ, შვილო. კურთხეულია ღმერთი, რომელმაც შენი თავი მოგვგვარა, და კურთხეულია შენი დედ-მამა.“

¹⁸დიდად გაიხარა ნინევეში ტობითის ყველა მოძმემ.

¹⁹მოვიდნენ ახიკარი და ნადაბი, მისი ძმისწული, და შვიდ დღეს სიხარულით ზეიმობდნენ ტობიას ქორწილს.