Read ბიბლია ტობითი 6 Bible Online

ტობითი 6 - ბიბლია bible

ტობითი 6

¹მგზავრები საღამო ხანს მდინარე ტიგროსს მიადგნენ და იქ შეისვენეს.

²ჭაბუკი საბანაოდ ჩავიდა, მაგრამ მდინარიდან თევზმა ამოყო თავი და შთანთქმა დაუპირა.

³მაშინ ანგელოზმა უთხრა, თევზი ამოიყვანეო; ჭაბუკმაც დაიჭირა და მიწაზე დააგდო.

⁴ანგელოზმა უთხრა: „გაკვეთე თევზი, გული, ღვიძლი და ნაღველი ამოაცალე და შეინახე.“

⁵ჭაბუკი ისე მოიქცა, როგორც ანგელოზმა უთხრა. თევზი კი შეწვეს და შეჭამეს.

⁶მერე ორივენი გზას გაუდგნენ და ეკბატანას მიადგნენ.

⁷უთხრა ჭაბუკმა ანგელოზს: ყაზარია, ძმაო, რა არის ეს თევზის გულ-ღვიძლი და ნაღველი?“

⁸ანგელოზმა მიუგო: „თუ ვინმეს ეშმაკი ან ბოროტი სული ტანჯავს, გულ-ღვიძლს უკმევ ქალსა თუ კაცს და მის ტანჯვასაც ბოლო მოეღება.

⁹ნაღველი კი თვალებზე უნდა სცხო კაცს, რომელსაც ლიბრი გადაჰკვრია, და განიკურნება.“

¹⁰ეკბატანას რომ მიუახლოვდნენ,

¹¹ანგელოზმა უთხრა ჭაბუკს: „მოდი, რეღუელისას შევისვენოთ, ძმაო, ისიც ხომ შენი ნათესავია; ერთადერთი ქალი ჰყავს, სახელად სარა.

¹²სიტყვას ჩამოვაგდებ იმაზე, რომ შენ მოგცენ ცოლად, რადგან, განგებით, შენ უნდა გხვდეს წილად მისი სამკვიდრო. შენ ხომ ერთადერთი ხარ მისი გვარისა. ყმაწვილი ქალი კი ჭკვიანია და მშვენიერი.

¹³მაშ, ყური მიგდე: მამამისს მოველაპარაკები და რაგესიდან რომ დავბრუნდებით, ქორწილი გადავიხადოთ. კარგად ვიცნობ რეღუელს, მოსეს სჯულს არ დაარღვევს და სხვას არ მისცემს თავის ქალს, თორემ სიკვდილის თანამდები იქნება. რადგანაც მისი სამკვიდრო სწორედ შენ უნდა გერგოს და არა სხვას.“

¹⁴მაშინ ჭაბუკმა უთხრა ანგელოზს: „ყაზარია, ძმაო, გამიგია, რომ ეს ქალი შვიდ ქმარს გააყოლეს და ყველამ სული დალია სანთიობოში.

¹⁵მე კი ერთადერთი ვყავარ მამაჩემს და მეშინია, ვაითუ მეც ჩემი წინამორბედების ბედი გავიზიარო. ეს ქალი ხომ თვით ეშმაკს უყვარს, რომელიც მხოლოდ იმას ერჩის, ვინც მის სატრფოს მიეკარება. ამიტომაც მეშინია, ვაითუ მოვკვდე და ჩემზე მგლოვიარე დედ-მამას სიცოცხლე მოვუსწრაფო; სხვა შვილი და სხვა დამმარხველი მათ არა ჰყავთ.“

¹⁶ანგელოზმა უთხრა: „ნუთუ აღარ გახსოვს მამაშენის შეგონება, შენი გვარის ცოლი უნდა მოიყვანოო? მაშ, ისმინე, ძმაო, რაკი შენი საბედოა, ეშმაკის შიში ნუ გექნება; იმ ღამესვე მოგეცემა ცოლად.

¹⁷სანთიობოში შესვლისთანავე აიღე მღვივანი სასაკმევლე, ზედ თევზის გულ-ღვიძლი დადე და აკმიე. როგორც კი სუნი ეცემა, ეშმაკი გაიქცევა და აღარასოდეს შემოიქცევა უკან.

¹⁸როგორც კი ქალთან მიახლოებას დააპირებ, ორივენი ადექით და შეევედრეთ მოწყალე ღმერთს. ის გიხსნით და შეგიწყალებთ. ნურაფრის შიში ნუ გაქვს, რადგანაც ოდითგანვე შენი საბედოა ეს ქალი, შენ იხსნი, შენ გამოგყვება და დარწმუნებული ვარ, რომ შვილები გეყოლება მისგან.“

¹⁹ეს რომ გაიგონა, ტობიას გულში ჩაუვარდა ის ქალი და სულით მიეწება მას.