Read ბიბლია ტობითი 8 Bible Online

ტობითი 8 - ბიბლია bible

ტობითი 8

¹ვახშამს რომ მორჩნენ, ქალთან შეიყვანეს ტობია.

²მიმავალმა გაიხსენა რაფაელის სიტყვები, აიღო მღვივანი სასაკმევლე, ზედ დადო თევზის გულ-ღვიძლი და აკმია.

³როგორც კი სუნი იგრძნო, ეშმაკმა ზემო ეგვიპტისაკენ მოუსვა, და შებოჭა იგი ანგელოზმა.

⁴როცა ორივენი მარტონი დარჩნენ, ტობია სარეცლიდან ადგა და თქვა: „ადექი, დაო, და ვილოცოთ, რათა შეგვიწყალოს უფალმა.“

⁵დაიწყო ტობიამ და თქვა: „კურთხეული ხარ ჩვენი მამა-პაპის ღმერთო, კურთხეულია შენი სახელი, წმიდა და საუკუნოდ განდიდებული. დაე, გადიდებდნენ შენ ცანი და ყოველი ქმნილება შენი.

⁶შენ შეჰქმენ ადამი და მწედ და საყრდენად მიეცი ევა, მისი ცოლი. მათგან იშვა კაცთა მოდგმა. შენა თქვი: ‘არ არის კარგი კაცის მარტო ყოფნა, შევუქმნათ მწე, მისივე მსგავსი’.

⁷და მეც, უფალო, სიძვისთვის როდი მომყავს ცოლად ეს ჩემი და, არამედ ჭეშმარიტ მეუღლედ. მოწყალება მოიღე და ერთმანეთს შეგვაბერე.“

⁸და შემდეგ წარმოსთქვა: „ამინ!“

⁹და ორივემ მშვიდად დაიძინა იმ ღამეს.

¹⁰რეღუელი კი წამოდგა და საფლავის გასათხრელად წავიდა; თანაც ამბობდა, ნუთუ ესეც უნდა მოკვდესო?

¹¹ბოლოს, დაბრუნდა რეღუელი შინ

¹²და ყედნას, თავის ცოლს, უთხრა: ერთი მოახლე გაგზავნე, ნახოს, ცოცხალია თუ არა. თუ აღარაა და, დავმარხოთ და არავის ეცოდინება.

¹³წავიდა მოახლე, კარი შეაღო და ნახა, რომ ორივეს სძინავს.

¹⁴გამობრუნდა და აუწყა მათ, ცოცხალიაო.

¹⁵მაშინ აკურთხა რეღუელმა ღმერთი და თქვა: „კურთხეული ხარ, ღმერთო, ყოველი წმიდა და წრფელი კურთხევით. დაე, გაკურთხებდნენ შენი წმიდები და ყველა ქმნილება შენი; ყველა ანგელოზი შენი და ყველა რჩეული შენი. დაე, გაკურთხებდნენ საუკუნოდ.

¹⁶კურთხეული ხარ, რომ მილხინე მე და ისე არ მოხდა, როგორც მეგონა, არამედ ურიცხვი წყალობა მოიღე ჩვენზე.

¹⁷კურთხეული ხარ, რომ შეიწყალე ორი მხოლოდშობილი. კვლავაც სწყალობდე მათ, მეუფეო. სიხარულში, მშვიდობასა და წყალობაში გაატარებინე მთელი სიცოცხლე.

¹⁸მერე მსახურებს უბრძანა საფლავი ამო-ევსოთ.

¹⁹და თოთხმეტდღიანი ქორწილი გადაუხადა მათ.

²⁰ტობიას კი ფიცი დაადებინა, რომ ფეხი არ მოეცვალა საქორწილო დღეების გასრულებამდე: არ წახვიდე, ვიდრე ეს თოთხმეტი დღე არ გაივლისო;

²¹მერე კი ჩემი ქონების ნახევარს მოგცემ და შეგიძლია მშვიდობით დაუბრუნდე მამას, ხოლო დანარჩენს მაშინ მიიღებ, როცა მე და ჩემი ცოლი აღარ ვიქნებითო.