Read ბიბლია ივდითი 1 Bible Online

ივდითი 1 - ბიბლია bible

ივდითი 1

¹ნაბუქოდონოსორის მეფობის მეთორმეტე წელს, აშურელებზე რომ მბრძანებლობდა დიდ ქალაქ ნინევეში, — არფაქსადის მეფობისას, რომელიც მეფობდა მიდიელებზე ეკბატანაში,

²და ეკბატანას გარს შემოავლო თლილი ქვის გალავანი, სისქით სამი წყრთა და სიგრძით ექვსი წყრთა, ხოლო მისი სიმაღლე სამოცდაათ წყრთას აღწევდა, სიგანე კი — ორმოცდაათს;

³მის ბჭეებთან აღმართა ასწყრთიანი კოშკები, რომელთაც საფუძველში სამოცი წყრთის სიგანე ჰქონდათ.

⁴ბჭეთა სიმაღლე, საიდანაც გადიოდა მისი ძლევამოსილი მხედრობა და მწყობრად მიაბიჯებდნენ ქვეითნი, სამოცდაათი წყრთა იყო, ხოლო სიგანე — ორმოცი.

⁵იმ ხანად მეფე ნაბუქოდონოსორი რაგეში მდებარე ვრცელ ტაფობზე შეება არფაქსად მეფეს.

⁶ეახლა მას ყველა მთიელი, ყველა, ვინც ტიგროსის, ევფრატისა თუ ჰიდასპეს პირას სახლობს, ხოლო არიოქის დაბლობიდან — ელიმელთა მეფე. მრავალი ტომი შეუერთდა ქალდეველთა ლაშქარს.

⁷და უხმო ნაბუქოდონოსორმა, აშურელთა მეფემ, სპარსეთის ყველა მცხოვრებს და დასავლეთის ყველა მცხოვრებს, კილიკიისა და დამასკოს, ლიბანის, ანტილიბანის და ზღვისპირეთის ყველა მცხოვრებსაც;

⁸ქარმელის, გილყადის, ზემო გალილეისა და ეშდრელონის ვრცელი დაბლობის ხალხებს;

⁹სამარიისა და მისი ქალაქების მკვიდრთ, იორდანეს გაღმა მცხოვრებთ, ვიდრე იერუსალიმამდე, ბატანეასმდე, ხელუსამდე, კადეშამდე, ეგვიპტის მდინარემდე, თახფანესამდე, რამზესამდე და გოშენის მთელ ქვეყნამდე,

¹⁰ზემო ტანისის და მემფისის მისადგომამდე და ეგვიპტის ყველა მცხოვრებს ქუშის საზღვრამდე.

¹¹მაგრამ მთელი ამ მიწა-წყლის მხცოვრებლებმა არად ჩააგდეს ნაბუქოდონოსორის, აშურელთა მეფის, სიტყვა და მხარში არ ამოუდგნენ საომრად, ვინაიდან არ შეუშინდნენ მას, აქაოდა ეს ერთი კაცი რას დაგვაკლებსო, და გაწბილებული გააბრუნეს უკან მისი მოციქულები.

¹²ნაბუქოდონოსორი სასტიკად განურისხდა ყველა ამ ქვეყანას და თავისი ტახტი და მეუფება დაიფიცა, რომ შურს იძიებდა კილიკიის, დამასკოსა თუ სირიის საზღვრებზე და მახვილით გაავლებდა მუსრს მოაბელთა ქვეყანას, ყამონის, მთელი იუდასა და ეგვიპტის ყველა მკვიდრს ორი ზღვის საზღვრებამდე.

¹³მეჩვიდმეტე წელს თავისი ლაშქრით გაემართა არფაქსად მეფის წინააღმდეგ, დაამარცხა და უკუაქცია მთელი მისი ლაშქარი, მთელი მისი მხედრობა და საომარი ეტლები.

¹⁴აიღო მისი ქალაქები, ეკბატანას მიაღწია, ხელთ იგდო ციხე-სიმაგრენი, ააოხრა მისი მოედნები და შებღალა მისი მშვენება.

¹⁵არფაქსადი კი რაგეს მთიანეთში შეიპყრო და იმავე დღეს თავისი ჰოროლით მოუღო ბოლო.

¹⁶მერე ნინევესაკენ გაბრუნდა მთელი თავისი ლაშქრითურთ, მხნე მეომართა ურიცხვი სიმრავლით; იქ შეისვენა და ას ოცი დღე ილხენდა თავის ლაშქართან ერთად.