Read ბიბლია ივდითი 13 Bible Online

ივდითი 13 - ბიბლია bible

ივდითი 13

¹როდესაც მოსაღამოვდა, მსახურები სასწრაფოდ წამოიშალნენ და ბაგოასიმ გარე-დან ჩაკეტა კარვის კარი, გუშაგები კი დაითხოვა და მათაც თავიანთ საწოლებს მიაშურეს, რადგანაც ღვინით გამტყვრალნი ძლივს იდგნენ ფეხზე.

²ივდითი მარტო დარჩა კარავში ღვინით გალეშილ ჰოლოფერნესთან, საწოლზე რომ გაშხლართულიყო.

³უბრძანა ივდითმა თავის მოახლეს საძინებ-ლის გარეთ მდგარიყო და მის გამოსვლას დალოდებოდა. როგორც ყოველდღე, ახლაც უთხრა, რომ სალოცავად უნდა წასულიყო; და იგივე უთხრა ბაგოასისსაც.

⁴როცა ყველანი გაიკრიფნენ და საძინებელში აღარავინ დარჩა, არც დიდი და არც პატარა, ივდითი თავზე დაადგა ჰოლოფერნეს და გულში თქვა: „ღმერთო, ყოველი ძალის უფალო, აწ მოხედე ჩემი ხელის საქმეს, რომელიც უნდა აღსრულდეს იერუსალიმის ასამაღლებლად,

⁵რადგანაც დროა დაიცვა შენი სამკვიდრო და აღასრულო ჩემი განზრახვა — შემამუსრინო მტერი, რომელიც აღიძრა ჩვენს წინააღმდეგ.“

⁶საწოლის სვეტს მიუახლოვდა, ჰოლოფერნეს თავთით რომ აღმართულიყო, და ჩამოხსნა მასზე ჩამოკიდებული მახვილი.

⁷დაიხარა, თმებში სწვდა ჰოლოფერნეს და თქვა: „უფალო, ღმერთო ისრაელისაო, მომეცი ძალა დღევანდელ დღეს!“

⁸მერე, რაც ძალი და ღონე ჰქონდა, ორჯერ დაჰკრა კისერზე და თავი გააგდებინა.

⁹საწოლიდან გადააგორა გვამი და ფარდა ჩამოხსნა. ცოტა ხნის შენდეგ გამოვიდა და ჰოლოფერნეს თავი მისცა მოახლეს.

¹⁰ხოლო მან ხურჯინში ჩააგდო იგი და, ჩვეულებისამებრ, ორივენი ერთად გაემართნენ სალოცავად. ბანაკი გაიარეს, გარს შემოუარეს ხევს, ბეთულიას მთაზე ავიდნენ და ქალაქის ბჭეს მიადგნენ.

¹¹შორიდანვე გასძახა ივდითმა მცველებს: „გააღეთ, კარი გააღეთ, ჩვენთან არს ღმერთი, ჩვენი ღმერთი, თავის ძალას რომ მოუვლენს ისრაელს და ძლევას მიანიჭებს მტრებზე, როგორც დღეს მიანიჭა.“

¹²როგორც კი მოესმათ მისი ხმა, მოქალაქეებმა კარიბჭეს მიაშურეს და ქალაქის უხუცესთ უხმეს.

¹³მორბოდა ყველა, დიდიან-პატარიანად, რადგანაც წარმოუდგენლად ეჩვენებოდათ მისი დაბრუნება. კარიბჭე გააღეს, ქალები შეუშვეს, გასანათებლად დაანთეს ცეცხლი და გარს შემოეხვივნენ მათ.

¹⁴ხოლო ივდითმა ხმამაღლა უთხრა ხალხს: „აქეთ და ადიდეთ უფალი, აქეთ და ადიდეთ, წყალობა რომ არ მოაკლო ისრაელის სახლს და ამღამინდელ ღამეს ჩემი ხელით შემუსრა მტერი.“

¹⁵ამოიღო თავი ხურჯინიდან, უჩვენა მათ და უთხრა: „აი, აშურელთა ლაშქრის მთავარსარდლის — ჰოლოფერნეს თავი, და აი, ფარდაც, რომლის მიღმაც ის იწვა გალეშილი, და ღმერთმა დაუბნელა მზე ქალის ხელით.

¹⁶უფლის სიცოცხლემ, რომელმაც დამიფარა ჩემს სავალ გზაზე, ჩემმა სახემ მისდა წარსაწყმედად აცთუნა ჰოლოფერნე, მაგრამ ცოდვის ჩადენა ვერ მოასწრო ჩემს შესაბილწად და შესარცხვენად.“

¹⁷ელდანაცემივით გაოგნდა ხალხი, ძირს დაემხო, თაყვანი სცა ღმერთს და ერთხმად შეჰღაღადა: „კურთხეული ხარ, უფალო ჩვენო, არარაობად რომ აქციე დღეს შენი ხალხის მტრები.“

¹⁸ყუზიამ კი უთხრა ივდითს: „კურთხეული ხარ, ქალო, უზენაესი ღმერთის მიერ, უფრო მეტად, ვიდრე ყველა სხვა ქალი მთელი დედამიწის ზურგზე, და კურთხეულია უფალი ღმერთი, ცათა და მიწის შემოქმედი, რომელმაც გიწინამძღვრა, რათა თავი გაგეგდებინებინა ჩვენი მტრების მთავრისათვის;

¹⁹რადგანაც არ მოაკლდება შენი იმედი კაცთა გულებს, რომლებსაც მუდამ ემახსოვრებათ ძალმოსილება ღმერთისა.

²⁰უფალმა მოგაგოს სანაცვლო საუკუნო დიდებითა და პატივით, რომ სიცოცხლე არ დაიშურე ჩვენი დათრგუნვილი მოდგმისთვის, არამედ წინ აღუდექი ჩვენს დამხობას, წრფელი გზით მოარული ჩვენი ღმერთის წინაშე.“ და შესძახა მთელმა ერმა: „იქმნას! იქმნას!“