Read ბიბლია ივდითი 16 Bible Online

ივდითი 16 - ბიბლია bible

ივდითი 16

¹და თქვა ივდითმა: „ადიდეთ ჩემი ღმერთი დაფ-ნაღარით, უგალობეთ უფალს წინწილებით, აღუვლინეთ ახალი საგალობელი, აღამაღლეთ და უხმეთ მის სახელს.

²რადგანაც ის არის ღმერთი, ბრძოლათა მმუსვრელი უფალი, თავისი მეოხების გამოსავლენად რომ გამომარჩია ხალხში და მიხსნა მდევნელთა ხელიდან.

³მოვიდა აშური ჩრდილოეთის მთებიდან, მოვიდა თავისი ურიცხვი ლაშქრით; მათმა სიმრავლემ ჩახერგა ხევები და მათმა მხედრობამ დაფარა ბორცვები.

⁴მან თქვა, რომ ცეცხლს მისცემდა ჩემს საზღვრებს, მახვილით მოსრავდა ჩემს ჭაბუკებს, მიწას დააკლავდა ჩემს მეძუძურ ყრმებს, ტყვედ წაასხამდა ჩემს ყმაწვილებს და ნამუსს ახდიდა ჩემს ქალწულთ.

⁵მაგრამ ყოვლისმპყრობელმა უფალმა დაამხო იგი ქალის ხელით.

⁶არ დაცემულა მათი თავკაცი ჭაბუკთა ხელით, არც გოლიათთა ნაშიერებს მოუკლავთ და არც მძლეთა-მძლე ბუმბერაზებს დაუჯაბნიათ, არამედ ივდითმა, მერარის ასულმა, დაუბნელა მზე თავისი სილამაზით.

⁷ქვრივის კაბა გაიხადა, რათა აღედგინა დათრგუნვილნი ისრაელში, ნელსაცხებელი იცხო სახეზე,

⁸თავსაკრავით გაიკრა თმა და სელის სამოსი ჩაიცვა მის საცთუნებლად.

⁹მოსტაცა თვალი ჰოლოფერნეს მისმა სანდალმა, მისმა სილამაზემ წაუღო სული, და გაკვეთა მახვილმა მრუშის კისერი.

¹⁰შეაძრწუნა სპარსელები მისმა მხნეობამ და მისმა გამბედაობამ გააოგნა მიდიელები.

¹¹მაშინ შეღაღადეს ჩემმა ჩაგრულმა ძმებმა, — და შეძრწუნდნენ მტრები; ჩემმა უმწეო დებმა, — და თავზარი დაეცა მათ; ხმა აიმაღლეს ერთად, — და უკუიქცნენ ისინი.

¹²ყმაწვილ ქალთა შვილებმა განგმირეს ისინი და ჩეხავდნენ მათ, როგორც მონათა შვილებს, და ჩემი უფლის ომში ჰპოვეს სამარე.

¹³ახალ საგალობელს ვუგალობებ ჩემს ღმერთს: დიდი ხარ, უფალო, და დიდებული, ძალით საკვირველი და უძლეველი.

¹⁴დაე, გმორჩილებდეს ყოველი ქმნილება შენი, რადგანაც თქვი და იქმნა ყოველი; მოავლინე შენი სული, და დაემკვიდრნენ. ვის შეუძლია წინ აღუდგეს შენს მბრძანებლურ ხმას?

¹⁵წყლებითურთ შეირყევიან მთათა საფუძველნი, ცვილივით დადნებიან კლდენი შენს წინაშე, მაგრამ შენი წყალობა არ მოაკლდება ღვთისმოშიშთ.

¹⁶მწირია ყოველგვარი მსხვერპლი კეთილსურნელებისთვის და მცირეზე მცირეა ყოველგვარი ცმელი სრულადდასაწველისთვის, უფლის მოშიში კი დიდია მარად.

¹⁷ვაი, ყველა ხალხს, ჩემი მოდგმის წინააღმდგომს! ყოვლისმპყრობელი უფალი განსჯის მათ განკითხვის დღეს; ცეცხლსა და მატლს მოუვლენს მათ ხორცს და მწარედ იტირებენ უკუნისამდე.“

¹⁸იერუსალიმში რომ მივიდნენ, თაყვანი სცეს ღმერთს და როცა ხალხი განიწმიდა, შესწირეს სრულადდასაწველი, ნებაყოფლობითი მსხვერპლი და ძღვენი.

¹⁹ხოლო ივდითმა შესწირა ჰოლოფერნეს მთელი ჯამ-ჭურჭელი, ხალხმა რომ მიაკუთვნა მას, და ფარდა, რომელიც ჰოლოფერნეს საწოლიდან წამოიღო.

²⁰სამი თვე ილხენდა ხალხი იერუსალიმში სიწმიდეთა წინაშე, და ივდითიც მათ შორის იყო.

²¹იმ დღეების შემდეგ კი ყველა თავის სახლკარს დაუბრუნდა; ივდითიც ბეთულიაში მივიდა და სუწინდებურად ცხოვრობდა იქ, პატივდებული მთელი ქვეყნის მიერ.

²²ბევრს სურდა იგი, მაგრამ მთელი სიცოცხლის განმავლობაში კაცს აღარ გაჰკარებია მას მერე, რაც მენაშე, მისი ქმარი, გარდაიცვალა და შეუერთდა თავის ერს.

²³რაც უფრო ხანში შედიოდა, მით უფრო ემატებოდა პატივი; ას ხუთი წლისა მოიყარა თავისი ქმრის სახლში. გაათავისუფლა თავისი მხევალი. გარდაიცვალა ბეთულიაში და თავისი ქმრის — მენაშეს გვერდით დაკრძალეს.

²⁴შვიდი დღე გლოვობდა მას ისრაელის სახლი. სიკვდილის წინ მენაშეს ნათესავებსა და თავის მოგვარეებს გაუნაწილა მთელი ქონება.

²⁵ისრაელის ძენი აღარავის შეუშფოთებია ივდითის სიცოცხლეში და კიდევ დიდხანს მისი სიკვდილის შემდეგაც.