Read ბიბლია ივდითი 9 Bible Online

ივდითი 9 - ბიბლია bible

ივდითი 9

¹პირქვე დაემხო ივდითი, თავზე ნაცარი დაიყარა, გაიძრო ძაძა, რომელიც ემოსა, და როცა იერუსალიმს, უფლის სახლში, გუნდრუკი აკმიეს მწუხრისას, ხმამაღლა შეჰღაღადა უფალს:

²უფალო, მამაჩემის — სიმეონის ღმერთო, ვისაც მიეცი ხელში მახვილი, რათა შური ეძია გადამთიელებზე, შესაბღალავად რომ გაუხსნეს ქალწულს წიაღი, შესარცხვენად გაუშიშვლეს ბარძაყი და საგინებლად შეუბილწეს საშო; შენ კი ბრძანე, ნუ იქნებაო ასე, მაგრამ მათ მაინც ჩაიდინეს ეს.

³რის სანაცვლოდაც სასიკვდილოდ გასწირე მათი მთავარნი და მათივე სისხლით მორწყე მათი ცოდვის მხილველი სარეცელი; მბრძანებელთა გვერდით დაყარე მათი მონების ცხედრები, მბრძაებლებისა კი — მათ ტახტებზე.

⁴მათი ცოლები ნადავლად ჩაუგდე ხელში, მათი ასულნი — დასატაცებლად, ხოლო მათი ნაალაფარი — დასანაწილებლად შენს საყვარელ შვილებს, მრისხანედ რომ აღიძრნენ საღმრთო შურით, შეიზიზღეს სიბილწე მათი სისხლისა და მწედ გიხმეს, უფალო ღმერთო ჩემო; მაშ, მისმინე მე ქვრივ-ოხერსაც.

⁵შენ შეჰქმენ ყოველივე უწინდელი, აწინდელი და მომავალი, შენ ჩაიფიქრე მთელი აწმყო და მყოფადი, და რაც ჩაიფიქრე, აღსრულდა კიდეც.

⁶რაც ისურვე, არსებობას ეზიარა და თქვა: აი, აქა ვართ. რადგანაც გამზადებულია ყოველი შენი გზა და ყოველი შენი მსჯავრი — წინასწარ განჭვრეტილი.

⁷აი, აშურელებმა მოიცეს ძალი, ამაყობენ ცხენებითა და მხედრებით. ამპარტავნობენ ქვეითთა მკლავის სიმტკიცით, თავიანთი ფარის, შუბის, მშვილდისა და შურდულის იმედი აქვთ და არ კი იციან, რომ შენა ხარ უფალი, ბრძოლათა მმუსვრელი.

⁸უფალია სახელი შენი, შემუსრე მათი ძალა შენი ძალმოსილებით, დაამხე მათი მძლავრობა შენი რისხვით, რადგანაც განუზრახავთ შებილწონ შენი სიწმიდენი, შებღალონ კარავი — შენი დიადი სახელის სავანე და შემუსრონ შენი საკურთხევლის რქა.

⁹მოხედე მათ ქედმაღლობას და თავს დაატეხე შენი რისხვა; მიეცი ქვრივის ხელს იმისი ძალა, რომ განზრახულის აღსრულება შესძლოს.

¹⁰ჩემი ცბიერების ბაგით დაამხე მონა მთავრის გვერდით, ხოლო მთავარი — მისი მსახურის გვერდით; ქალის ხელით შემუსრე მათი ზვაობა.

¹¹რადგანაც შენი ძალა სიმრავლეში როდია და არა ძლიერებაშია შენი ძალმოსილება, არამედ შენა ხარ მდაბალთა ღმერთი, დამცირებულთა ქომაგი, უძლურთა მწე, განწირულთა მფარველი, უსასოთა მხსნელი.

¹²დიახ, დიახ, მამაჩემისა და ისრაელის სამკვიდ-როს ღმერთო, ზეცისა და მიწის მპყრობელო, წყალთა შემქმნელო, ყოველი შენი ქმნილების მეუფევ; ისმინე ჩემი ვედრება.

¹³მიეცი ჩემს სიტყვას და ცბიერებას იმისი ძალა, რომ იმათ წყლულად და იარად იქცეს, ვისაც ეგზომი ბოროტება განუზრახავს შენი აღთქმის, შენი წმიდა სახლის, სიონის სიმაღლისა და შენი შვილების სამკვიდრო სახლის მიმართ.

¹⁴შეაგონე მთელ შენს ხალხს და შეაგნებინე ყველა ტომს, რომ შენა ხარ ღმერთი, ღმერთი ყოველი ძალისა და სიმტკიცისა, და რომ შენს მეტი სხვა მფარველი არა ჰყავს ისრაელის მოდგმას.