Read ბიბლია ესთ. 1 Bible Online

ესთ. 1 - ბიბლია bible

ესთ. 1

¹ეს მოხდა ახაშვეროშის დროს, იმ ახაშვეროშისა, რომელიც ას ოცდაშვიდ მხარეზე მეფობდა ინდოეთიდან ეთიოპიამდე.

²იმ დღეებში, როდესაც მეფე ახაშვეროში იჯდა თავის სამეფო ტახტზე, რომელიც შუშანში — სატახტო ქალაქში — იყო,

³თავისი მეფობის მესამე წელს მან ნადიმი გაუმართა ყველა თავის მთავარსა და მსახურს. სპარსეთისა და მიდიის ლაშქრის სარდლები, დიდებულები და მხარეთა მთავრებიც მის წინაშე ისხდნენ.

⁴იგი უჩვენებდა თავისი სამეფოს დიდებულ სიმდიდრეს და თავისი სიდიადის ბრწყინვალებას და მშვენიერებას მრავალ დღეს, ას ოთხმოც დღეს.

⁵ეს დღეები რომ ჩათავდა მეფემ ყველა იმ ხალხს, ვინც შუშანში, სატახტო ქალაქში, იმყოფებოდა, დიდიდან პატარამდე, შვიდდღიანი ნადიმი გაუმართა მეფის სასახლის ეზო-ბაღში.

⁶თეთრი ბამბეულის ქსოვილები და ცისფერი ფარდები ბისონისა და ძოწის ზონრებით ეკიდა ვერცხლის რგოლებზე და მარმარილოს სვეტებზე; ოქროსა და ვერცხლის საწოლები იდგა მეწამული ქვის, მარმარილოს და ძვირფასი ქვების ქვაფენილზე.

⁷და სასმელს აწვდიდნენ ოქროს ჭურჭლით და ნაირ-ნაირი სასმისებით; სამეფო ღვინო უხვად იყო, მეფის ხელგაშლილობისამებრ.

⁸და სვამდნენ წესისამებრ, დაუძალებლად, რადგან ასე ჰქონდა დადგენილი მეფეს თავისი სახლთუხუცესებისათვის, რათა თითოეულის სურვილისამებრ მოქცეულიყვნენ.

⁹და ვაშთი დედოფალმაც გამართა ბანოვანთათვის ნადიმი მეფე ახაშვეროშის სასახლეში.

¹⁰და მეშვიდე დღეს, როცა ღვინით მოილხინა მეფის გულმა, მან უბრძანა მეჰუმანს, ბიზთას, ხარბონას, ბიგთას, აბაგთას, ზეთარს და ქარქასს — შვიდ საჭურისს, რომელნიც მეფე ახაშვეროშის წინაშე მსახურობდნენ,

¹¹მოეყვანათ მეფის წინაშე ვაშთი დედოფალი სამეფო გვირგვინით, რათა ეჩვენებინათ ხალხისა და მთავრებისათვის მისი სილამაზე, რადგან მშვენიერი სანახავი იყო იგი.

¹²მაგრამ არ ინება ვაშთი დედოფალმა მისვლა მეფის ბრძანებაზე, რომელიც საჭურისთა პირით ეცნობა მას. ძალიან გაჯავრდა მეფე და რისხვით აენთო.

¹³და ჰკითხა მეფემ დრო-ჟამთა მცოდნე ბრძენკაცებს, რადგან მეფეს ჩვეულებად ჰქონდა, რჩევა ეკითხა რჯულისა და სამართლის ყოველი მცოდნისათვის.

¹⁴და მასთან დაახლოებულნი იყვნენ: ქარშენა, შეთარი, ადმათა, თარშიში, მერესი, მარსენა და მემუქანი — სპარსეთისა და მიდიის შვიდი მთავარი, მეფის პირის მხილველნი, სამეფოში პირველ ადგილზე მსხდომნი:

¹⁵„რჯულის მიხედვით, რა უნდა ვუყოთ ვაშთი დედოფალს, რომ არ შეასრულა მეფე ახაშვეროშის ბრძანება, საჭურისთა პირით ნამცნობი?“

¹⁶და თქვა მემუქანმა მეფისა და მთავართა წინაშე: „არა მარტო მეფის წინაშე დააშავა ვაშთი დედოფალმა, არამედ ყველა მთავრისა და ხალხის წინაშე, ვინც კი მეფე ახაშვეროშის ყველა მხარეში ცხოვრობს.

¹⁷რადგან მიუვათ დედოფლის ამბავი დედაკაცებს და ისინიც აითვალწუნებენ თავიანთ ქმრებს და იტყვიან: ‘მეფე ახაშვეროშმა ბრძანა მის წინაშე მოეყვანათ ვაშთი დედოფალი, მაგრამ არ ეახლა იგი’.

¹⁸და დღესვე სპარსეთისა და მიდიის ბანოვანები, რომელნიც შეიტყობენ დედოფლის ამბავს, ასევე შეეპასუხებიან მეფის ყველა მთავარს, ბევრი დამცირება და წყენა შეგვხვდება.

¹⁹თუ მეფე ინებებს, გასცეს მან სამეფო ბრძანება და ჩაიწეროს იგი სპარსეთისა და მიდიის რჯულში და არ შეიცვალოს, რომ ვაშთი აღარ შევიდეს მეფე ახაშვეროშის წინაშე; ხოლო მისი დედოფლობა მეფემ სხვას გადასცეს, მასზე უკეთესს.

²⁰როცა გაიგებენ მეფის ამ დადგენილებას, რომელიც გამოვა მთელ მის სამეფოში, თუმცა კი უვრცელესია იგი, ყველა ცოლი, ბანოვანიდან მოყოლებული მდაბიომდე, პატივისცემით მოეპყრობა თავის ქმარს!“

²¹და მოეწონათ ეს სიტყვა მეფეს და მთავრებს, და მოიქცა მეფე მემუქანის სიტყვისამებრ,

²²და დაუგზავნა წერილები მეფის სამთავროებს — თითეულ სამთავროს თავისი დამწერლობით, თითეულ ხალხს თავის ენაზე, რათა ყოველი კაცი ბატონი ყოფილიყო თავის სახლში, და რომ ეს ყველას გამოსცხადებოდა მის ბუნებით ენაზე.