Read ბიბლია ესთ. 6 Bible Online

ესთ. 6 - ბიბლია bible

ესთ. 6

¹იმ ღამეს ძილი გაუკრთა მეფეს. და მოატანინა სამახსოვრო წიგნი — მატიანეები — და წაკითხულ იქნა მეფის წინაშე.

²და აღმოჩნდა ჩაწერილი, როგორ ჰყავდა ნამხილები მორდექაის ბიგთანა და თერეში, მეფის ის ორი საჭურისი, ზღურბლის მცველები, რომელთაც განზრახული ჰქონდათ მეფე ახაშვეროშზე ხელის აღმართვა.

³და ბრძანა მეფემ: „რა პატივი და დიდება მიაგეს მორდექაის ამისათვის?“ და მოახსენეს მეფეს მისმა მსახურებმა: „არაფერი მიუგიათ მისთვის.“

⁴და იკითხა მეფემ: „ვინ არის ეზოში?“ და ჰამანი მოსულიყო მეფისათვის იმის სათქმელად, რომ ჩამოეხრჩოთ მორდექაი მისთვის გამზადებულ ძელზე.

⁵და მოახსენეს მეფის მსახურებმა მას: „აი, ჰამანი დგას ეზოში.“ და ბრძანა მეფემ: „შემოვიდეს.“

⁶და შევიდა ჰამანი, და ჰკითხა მას მეფემ: „რა ვუყოთ კაცს, ვისი პატივისცემაც სურს მეფეს?“ და თქვა ჰამანმა თავის გულში: „ვისი პატივისცემა უნდა სურდეს მეფეს, თუ არა ჩემი?“

⁷და უთხრა ჰამანმა მეფეს: „კაცს, ვისი პატივისცემასაც მეფეს სურს,

⁸მიართვან სამეფო მოსასხამი, რომელიც ემოსა მეფეს, და ცხენი, რომელზეც იჯდა მეფე, როდესაც სამეფო გვირგვინი დაადგეს თავზე.

⁹და ხელში მისცენ მოსასხამი და ცხენი მეფის ყველაზე დიდებულ მთავარს; შემოსონ ის კაცი, ვისი პატივისცემაც სურს მეფეს; გაატარონ ცხენით ქალაქის მოედანზე და დაიძახონ მის წინაშე: „ასე ექცევიან იმ კაცს, ვისი პატივისცემაც სურს მეფეს!“

¹⁰და უბრძანა მეფემ ჰამანს: „ჩქარა, აიღე მოსასხამი და ცხენი, როგორც შენ თქვი და მოექეცი ასე მორდექაის, იუდაელს, მეფის კარიბჭესთან რომ ზის; არაფერი დააკლო შენს ნათქვამს.“

¹¹და აიღო ჰამანმა მოსასხამი და ცხენი, შემოსა მორდექაი, ცხენით გაიყვანა ქალაქის მოედანზე და დაიძახა მის წინაშე: „ასე ექცევიან იმ კაცს, ვისი პატივისცემაც სურს მეფეს.“

¹²და დაბრუნდა მორდექაი მეფის კარიბჭესთან, ჰამანი კი გაეშურა შინისაკენ, დამწუხრებული და თავდაბურული.

¹³და უამბო ჰამანმა ზერეშს, თავის ცოლს და ყველა თავის მეგობარს, ყველაფერი, რაც მას შეემთხვა. და უთხრეს მას მისმა ბრძენკაცებმა და ზერეშმა, მისმა ცოლმა: „თუ მორდექაი, რომლის გამოც ემხობი, იუდაელთა მოდგმისაა, მაშინ ვერ დასძლევ მას, უსათუოდ დაემხობი მის წინაშე.“

¹⁴როდესაც ჯერ კიდევ ელაპარაკებოდნენ, მოვიდნენ მეფის საჭურისები და დააჩქარეს ჰამანი, წასულიყო ესთერის მომზადებულ ნადიმზე.