Read ბიბლია გამ. 22 Bible Online

გამ. 22 - ბიბლია bible

გამ. 22

¹„თუ ვინმემ მოიპაროს ხარი ან კრავი და დაკლას ან გაყიდოს, ხუთი მსხვილფეხა საქონელი უნდა გადაიხადოს ხარის წილ, და ოთხი წვრილფეხა საქონელი კრავის წილ.

²თუ სახლის გამოთხრაზე წაასწრებენ ქურდს და სცემენ ისე, რომ მოკვდება, მაშინ ეს სისხლი არ მოეკითხება.

³მაგრამ თუ მზემ მოუსწრო მას, სისხლი მოეკითხება. გადახდით გადაიხადოს ქურდმა და, თუ არა აქვს გადასახდელი, გაყიდონ იგი ქურდობისთვის.

⁴თუ მოპარული ცოცხლად აღმოაჩნდება ხელში, ხარი იქნება, სახედარი თუ ცხვარი, ერთიორად უნდა გადაიხადოს.

⁵თუ ვინმემ წაახდინოს მდელო ან ვენახი და გაუშვას თავისი საქონელი, და მოაძოვოს სხვისი მდელო, თავის საუკეთესო მდელოთაგან და საუკეთესო ვენახებიდან უნდა უზღოს.

⁶თუ ცეცხლი გამოვარდეს, ეკალს მოედოს და გადაწვას ზვინი ან თავთავი ან მდელო, უნდა გადაიხადოს ხანძრის გამჩაღებელმა.

⁷თუ ვინმემ თავის მოყვასს ფული ან ჭურჭელი მიაბაროს და ეს მოპარულ იქნეს იმ კაცის სახლიდან, თუ აღმოჩნდება ქურდი, მან ერთიორად გადაიხადოს.

⁸ხოლო თუ არ აღმოჩნდება ქურდი, ეახლოს სახლის პატრონი მსაჯულებს და დაიფიცოს, რომ არ წასცდენია ხელი თავისი მოყვასის ქონებაზე.

⁹ბრალდების ყოველგვარი მიზეზის გამო: ხარისა და სახედრის შესახებ, კრავისა და სამოსლის შესახებ, ყოველგვარი დანაკარგის შესახებ, რომელზეც ვინმე იტყვის, ჩემი არისო, მსაჯულებამდე მივიდეს ორივეს საქმე. ვისაც მსაჯულები გაამტყუნებენ, ის გადაუხდის ერთიორად თავის მოყვასს.

¹⁰თუ ვინმე მიაბარებს თავის მოყვასს სახედარს, ხარს ან კრავს და რაიმე საქონელს, და თუ ის მოკვდა ან დაშავდა, ან მოიტაცეს და მნახველი არავინ იქნა,

¹¹უფლის წინაშე ფიცი იყოს ორივეს შორის, რომ არ წასცდენია ხელი თავისი მოყვასის საკუთრებაზე. და მიიღოს ეს პატრონმა და იგი არ გადაიხდის.

¹²ხოლო თუ მოპარავენ მას, გადაუხადოს მის პატრონს.

¹³თუ მას მხეცი დაგლეჯით დაგლეჯს, წარმოადგინოს დაგლეჯილი დასამოწმებლად, და არ გადაიხდის.

¹⁴და თუ ვინმემ ითხოვოს თავისი მოყვასისგან პირუტყვი და ის დაშავდეს ან მოკვდეს, და მისი პატრონი იქ არ იყოს, გადახდით გადაიხადოს,

¹⁵მაგრამ თუ მისი პატრონი იქ იყო, არ გადაიხდის. თუ ქირის კაცია, ქირიდან გამოექვითება.

¹⁶თუ ვინმემ შეაცდინოს ქალწული, რომელიც დანიშნული არაა, და დაწვეს მასთან, მაშინ ურვადით უნდა შეირთოს ცოლად.

¹⁷თუ ქალიშვილის მამა უარზე დადგეს და მას არ მიათხოვოს, ვერცხლი მიუწონოს ამ კაცმა, როგორც ქალწულობის ურვადი.

¹⁸ჯადოქარს ნუ აცოცხლებ.

¹⁹ყველა, ვინც დაწვება პირუტყვთან, სიკვდილით მოკვდეს.

²⁰ვინც ერთი უფლის გარდა სხვა ღმერთებს შესწიროს მსხვერპლი, უნდა განადგურდეს.

²¹ხიზანს ნუ დაჩაგრავ და ნუ შეავიწროვებ, რადგან ხიზნები იყავით თქვენც ეგვიპტის ქვეყანაში.

²²არ დაჩაგრო ქვრივი და ობოლი.

²³თუ ჩაგვრით დაჩაგრავ, შემომღაღადებენ ისინი და სმენით მოვისმენ მათ ღაღადისს,

²⁴და აინთება ჩემი რისხვა, და მოგკლავთ თქვენ მახვილით, და დაქვრივდებიან თქვენი ცოლები და დაობლდებიან თქვენი შვილები.

²⁵თუ ვერცხლს ასესხებ ვინმეს ჩემი ხალხიდან, შენთან მყოფ ღარიბ-ღატაკს, ნუ შეავიწროვებ მას და ნუ დააკისრებ ვახშის გადახდას.

²⁶თუ გირაოდ აიღებ შენი მოყვასის მოსასხამს, მზის ჩასვლამდე დაუბრუნე მას,

²⁷რადგან ის ერთადერთი საფარველია მისი. იგი მისი სხეულის მოსასხამია, რითი დაწვეს? და იქნება, როცა შემომღაღადებს, მე მოვისმენ, რადგან მოწყალე ვარ.

²⁸ღმერთს ნუ დაგმობ და შენი ხალხის მთავარს ნუ დასწყევლი.

²⁹შენი კალოს პირველნაყოფი და შენი საწნახლის პირველდაწურული არ დამიგვიანო. პირმშო შენს ძეთაგან მე მომეცი.

³⁰ეგევე გააკეთე შენს ხარზე და შენს ცხვარზე. შვიდი დღე იყოს თავის დედასთან, ხოლო მერვე დღეს მომეცი მე.

³¹წმიდა ხალხი უნდა იყოთ ჩემთვის: ხორცი, მინდორში ნამხეცავი, არ ჭამოთ, ძაღლს მიუგდეთ.“