Read ბიბლია გამ. 23 Bible Online

გამ. 23 - ბიბლია bible

გამ. 23

¹„ნუ დაყრი ცრუ ხმებს; ხელს ნუ მისცემ უკეთურს, რათა ბოროტების მოწმე არ გახდე.

²ნუ აჰყვები უმრავლესობას ბოროტებაში და ნუ გამოეხმაურები დავას, რათა უმრავლესობისკენ არ გადაიხარო და არ გაამრუდო სამართალი.

³და გლახაკს ნუ ესარჩლები მის დავაში.

⁴თუ შეეყარო შენი მტრის ხარს ან სახედარს, გზადაბნეულს, დაბრუნებით დაუბრუნე მას.

⁵თუ დაინახო შენი მოძულის სახედარი დავრდომილი თავის ტვირთქვეშ, ნუ მიატოვებ მას: ტვირთი ჩამოხსენი მასთან ერთად.

⁶ნუ გაამრუდებ სამართალს შენი ღარიბის დავაში.

⁷სიცრუეს განშორდი და უდანაშაულო და მართალ კაცს ნუ მოკლავ, რადგან არ გავამართლებ დამნაშავეს.

⁸და ქრთამს ნუ აიღებ, რადგან ქრთამი აბრმავებს თვალხილულებს და აუკუღმართებს მართალთა სიტყვებს.

⁹და ხიზანს ნუ შეავიწროებ. თქვენ იცით ხიზნის სული, რადგან ხიზნები იყავით თქვენ ეგვიპტის ქვეყანაში.

¹⁰ექვსი წელი თესე შენი მიწა და აიღე ნაყოფი მისი,

¹¹ხოლო მეშვიდე წელს მიატოვეთ, ნუ შეეხებით მას, რათა შენი ხალხის ღარიბ-ღატაკებმა ჭამონ და ნარჩენით გამოიკვებნენ ველური ცხოველები. ასევე მოექეცი შენს ვენახსა და ზეთისხილს.

¹²ექვსი დღე აკეთე შენი საქმე, და მეშვიდე დღეს დაისვენე, რათა დაისვენოს შენმა ხარმა და შენმა სახედარმა, და სული მოითქვას შენი მხევლის ძემ და ხიზანმა.

¹³ყველაფერი, რაც მე გითხარით, დაიცავით, და სხვა ღმერთების სახელი არ ახსენოთ, ბაგეებზე არ გაიკაროთ.

¹⁴სამგზის იდღესასწაულე ჩემთვის წელიწადში.

¹⁵დღესასწაული უფუარობისა დაიცავი: შვიდი დღე ჭამე ხმიადი, როგორც გიბრძანე, აბიბის თვის დაწესებულ ჟამს, რადგან ამ დროს გამოხვედი შენ ეგვიპტიდან. და ნუ გამოჩნდებიან ჩემს წინაშე ხელცარიელნი.

¹⁶და დაიცავი დღესასწაული შენი შრომის პირველნაყოფთა მკისა, რაც ყანაში დაგითესავს; აგრეთვე დღესასწაული კრეფისა წელიწადის დამლევს, როცა აკრეფ შენს ნაშრომს ყანიდან.

¹⁷წელიწადში სამჯერ გამოცხადდეს ყოველი შენი მამაკაცი უფალი ღმერთის წინაშე.

¹⁸საფუარიანთან ერთად ნუ შესწირავ ჩემი შესაწირავის სისხლს, ნურც ჩემი სადღესასწაულო ქონი დარჩება დილამდე.

¹⁹შენი მიწის პირველნაყოფი მიიტანე უფლის, შენი ღმერთის სახლში. ნუ მოხარშავ თიკანს თავისი დედის რძეში.

²⁰აჰა, მე წაგიმძღვარებ ანგელოზს შენს დასაცავად გზაზე და შენს მისაყვანად იმ ადგილზე, რომელიც მე გავამზადე.

²¹იფრთხილე მის წინაშე და ისმინე მისი ხმა, ნუ აუჯანყდები მას, რადგან ის არ მოგიტევებთ თქვენს ცოდვას, რადგან მასშია ჩემი სახელი.

²²თუ სმენით მოუსმენ მის ხმას და ყველაფერს გააკეთებ, რასაც გეუბნები, მაშინ ვუმტრობ შენს მტერს და შევავიწროვებ შენს შემავიწროვებელს.

²³რადგან წაგიძღვება ჩემი ანგელოზი და მიგიყვანს ამორეველებთან, ხეთელებთან, ფერიზელებთან, ქანაანელებთან, ხიველებთან და იებუსეველებთან, და შევმუსრავ მათ.

²⁴თაყვანი არ სცე მათ ღმერთებს და არ ემსახურო მათ, და არ მოიქცე მათი საქმისამებრ, არამედ ნგრევით დაანგრიე ისინი და შემუსვრით შემუსრე მათი ძეგლები.

²⁵და ემსახურეთ უფალს, თქვენს ღმერთს, და ის აკურთხებს შენს პურს და შენს წყალს, და განვაშორებ ავადმყოფობას შენგან.

²⁶არ იქნება მუცელმოწყვეტილი ან ბერწი დედაკაცი შენს მიწაზე. შენს დღეთა რიცხვს აღვავსებ.

²⁷წინ წაგიმძღვარებ ჩემს შიშისზარს. და ძრწოლას მოვგვრი ყოველ ხალხს, რომელთანაც შენ მიხვალ. და მოვაქცევ ყოველი შენი მტრის ზურგს შენსკენ;

²⁸და წინ წაგიმძღვარებ კრაზანებს და გარეკავენ ხიველებს, ქანაანელებს და ხეთელებს შენგან.

²⁹არ გავრეკავ მათ შენგან ერთი წლის განმავლობაში, რომ არ მოოხრდეს ქვეყანა და არ მოგეძალნენ ველური მხეცები.

³⁰თანდათანობით გავრეკავ მათ შენგან, ვიდრე მოშენდებოდე და დაიმკვიდრებდე ამ ქვეყანას.

³¹და გავავლებ შენს საზღვარს მეწამული ზღვიდან ფილისტიმელთა ზღვამდე, და უდაბნოდან მდინარემდე, რადგან მოგცემთ ხელში ამ ქვეყნის მცხოვრებთ, და შენ გარეკავ მათ შენგან.

³²ნუ შეკრავ კავშირს ნურც მათთან, ნურც მათ ღმერთებთან.

³³არ იცხოვრონ მათ შენს ქვეყანაში, რომ არ შეგაცდინონ ჩემს წინაშე. თუ მოემსახურები მათ ღმერთებს, ეს მახე იქნება შენთვის.“