Read ბიბლია გამ. 25 Bible Online

გამ. 25 - ბიბლია bible

გამ. 25

¹და უთხრა უფალმა მოსეს:

²„უთხარი ისრაელის ძეთ, რომ ამიკრიფონ შესაწირავი. ყოველი კაცისგან, ვისაც გული ეტყვის, ამიკრიფეთ შესაწირავი.

³და ესაა შესაწირავი, რასაც აკრეფთ მათგან: ოქრო, ვერცხლი და სპილენძი,

⁴და ცისფერი, ძოწეული და ჭიაფერი, სელი და თხისური,

⁵და ცხვრის ტყავები წითელი და მაჩვისა და აკაციის ხე,

⁶და გასანათებელი ზეთი, სურნელებანი საცხებელი ზეთისთვის და საკმევლისათვის.

⁷ქვები სარდიონი და ქვები ჩასასმელი ეფოდისთვის და სამკერდულისათვის.

⁸და გამიკეთონ მე საწმიდარი და დავივანებ მათ შორის.

⁹ყოველივე, როგორც მე გიჩვენებ შენ სავანის ნიმუშად ყოველი მისი ჭურჭლის ნიმუშად, ეგრე გააკეთე.

¹⁰და გააკეთეთ კიდობანი აკაციის ხეთაგან: ორნახევარი წყრთა იყოს მისი სიგრძე და ერთნახევარი წყრთა მისი სიგანე, და ერთნახევარი წყრთა მისი სიმაღლე.

¹¹და მოჭედე იგი წმიდა ოქროთი. შიგნიდან და გარედან მოჭედე იგი. და გაუკეთე ზემოთ ოქროს გვირგვინი ირგვლივ.

¹²და ჩამოასხი მისთვის ოთხი რგოლი ოქროსი, და მიამაგრე ოთხ ქვედა კუთხეზე: ორი რგოლი მის ერთ მხარეს და ორი რგოლი მის მეორე მხარეს.

¹³და გააკეთე კეტები აკაციის ხისაგან, და მოჭედე ისინი ოქროთი.

¹⁴და გაუყარე კეტები რგოლებში კიდობნის გვერდებზე, რათა ატაროთ კიდობანი მათი საშუალებით.

¹⁵კიდობნის რგოლებში კეტები უნდა იყოს, არ მოსცილდეს მას.

¹⁶და ჩადევით კიდობანში მოწმობა, რომელსაც მოგცემ შენ.

¹⁷და გააკეთე თავსარქველი წმიდა ოქროსი: ორნახევარი წყრთა იყოს მისი სიგრძე, და ერთნახევარი წყრთა მისი სიგანე.

¹⁸და გააკეთე ორი ქერუბიმი: ოქროთი ჭედურად. თავსარქველთან დასხით ქერუბიმები მის ორივე კიდეზე.

¹⁹და დასვი ერთი ქერუბიმი ერთ კიდეზე და ერთი ქერუბიმი — მეორე კიდეზე. დასხით ქერუბიმები თავსარქვლის ორივე კიდეზე.

²⁰და იქნებიან ქერუბიმები ფრთაგაშლილნი ზემოთკენ, და დაფარავენ თავიანთი ფრთებით თავსარქველს. პირისახეები ერთმანეთისკენ ექნებათ. თავსარქვლისაკენ იქნება ქერუბიმების პირისახეები.

²¹და დააფარე თავსარქველი კიდობანს ზევიდან. და ჩადევი კიდობანში მოწმობა, რომელსაც მე მოგცემ.

²²და გამოგეცხადები შენ იქ და დაგელაპარაკები თავსარქველს ზემოდან, ორი ქერუბიმის შუაგულიდან, რომელნიც მოწმობის კიდობანზეა, ყოველივეზე რასაც გამცნებ შენ ისრაელის ძეთათვის.

²³და გააკეთე ტაბლა აკაციის ხისაგან. ორი წყრთა იყოს მისი სიგრძე და წყრთა მისი სიგანე, და ერთნახევარი წყრთა მისი სიმაღლე.

²⁴და მოჭედე იგი წმიდა ოქროთი, და გაუკეთე მას ოქროს გვირგვინი ირგვლივ.

²⁵და გაუკეთე მას ჩარჩო ირგვლივ ხელისგულის სიმაღლის, და გაუკეთე ოქროს გვირგვინი მის ჩარჩოს ირგვლივ.

²⁶და გაუკეთე მას ოქროს ოთხი რგოლი, და მიამაგრე რგოლები ოთხ კუთხეზე მის ოთხ ფეხთან.

²⁷ჩარჩოსთან იყოს რგოლები სათავსებით კეტებისთვის, მაგიდის სატარებლად.

²⁸და გააკეთე კეტები აკაციის ხისაგან, და მოჭედე ისინი ოქროთი, რათა მათი მეშვეობით ატაროთ ტაბლა.

²⁹და გააკეთე მისი ლანგრები და მისი თასები, და მისი ჯამები, და მისი ტოლჩები საღვრელისთვის, წმიდა ოქროსაგან გააკეთე ისინი.

³⁰და დებდე ამ ტაბლაზე საწინაშეო პურს ჩემს წინაშე მუდამ.

³¹და გააკეთე სასანთლე წმიდა ოქროსაგან. ჭედური გაკეთდეს სასანთლე, მისი შვერილი და მისი ტოტი, მისი თასები, მისი კვირტები და მისი ყვავილები მისგანვე უნდა იყოს.

³²და ექვსი ტოტი გამოდიოდეს მისი გვერდებიდან: სამი ტოტი სასანთლისა მისი ერთი გვერდიდან და სამი ტოტი სასანთლისა მისი მეორე გვერდიდან.

³³სამი ნუშისებრი თასი ერთ ტოტზე, კვირტი და ყვავილი. ასევე ექვს ტოტზე, რომელნიც გამოდიან სასანთლიდან.

³⁴და თვით სასანთლეზე — ოთხი ნუშისებრი თასი, მისი კვირტები და მისი ყვავილები.

³⁵და მისი კვირტი ორი ტოტის ქვეშ, და კიდევ ერთი კვირტი მისი ორი ტოტის ქვეშ, სასანთლიდან გამომავალი ექვსი ტოტისათვის.

³⁶მათი კვირტები და მათი ტოტები იქნება მისგანვე, მთლიანად ერთი ჭედურობით, წმიდა ოქროთი.

³⁷და გააკეთე შვიდი კანდელი მისი და აანთე მისი კანდელები, რათა ანათებდეს მის წინ.

³⁸და მისი მაშები, და მისი აქანდაზები იყოს წმიდა ოქროსი.

³⁹ერთი ტალანტი წმიდა ოქროსგან გაკეთდეს იგი მთელ ამ ჭურჭელთან ერთად.

⁴⁰იცოდე, გააკეთე იმ ნიმუშის მიხედვით, რომელიც გიჩვენე მთაზე.