Read ბიბლია გამ. 26 Bible Online

გამ. 26 - ბიბლია bible

გამ. 26

¹და გააკეთე სავანე გრეხილი ბისონის, ცისფერი, ძოწეული და ჭიაფერი ქსოვილის ათი გადასაფარებლისაგან. და ქერუბიმები გაუკეთე ოსტატური ნამუშევრით.

²თითოეული გადასაფარებელის სიგრძე იყოს ოცდარვა წყრთა, ხოლო სიგანე თითოეული გადასაფარებლისა — ოთხი წყრთა. ერთი ზომა ყოველი გადასაფარებლისთვის.

³ხუთი გადასაფარებელი იქნება შეერთებული ურთიერთთან და კიდევ ხუთი გადასაფარებელი იქნება შეერთებული ურთიერთთან.

⁴და გააკეთე ცისფერი მარყუჟი ერთი გადასაფარებლის კიდეზე, რომელიც ბოლოში აერთებს ორივე ნახევარს. და აგრეთვე გააკეთე ბოლო გადასაფარებლის კიდეზე, რომელიც აერთიებს ორივე ნახევარს.

⁵ორმოცდაათი მარყუჟი გაუკეთე იმ გადასაფარებლის კიდეს, რომელიც სხვებს უერთდება. მარყუჟები უნდა შეესაბამებოდნენ ურთიერთს.

⁶და გააკეთე ორმოცდაათი დუგმა ოქროსი, და შეაერთე გადასაფარებლები ურთიერთთან დუგმებით, და ერთიანი იქნება სავანე.

⁷და გააკეთე გადასაფარებელი თხისურისგან, სავანის დასაფარად. თერთმეტი ასეთი გადასაფარებელი გააკეთე.

⁸სიგრძე ერთი გადასაფარებლისა იყოს ოცდაათი წყრთა, ხოლო სიგანე — ოთხი წყრთა: ერთი ზომა იყოს თერთმეტივე გადასაფარებლისათვის.

⁹და შეაერთე ხუთი გადასაფარებელი ცალკე და ექვსი გადასაფარებელი ცალკე, და ორად მოკეცე მეექვსე გადასაფარებელი კარვის წინ.

¹⁰და გააკეთე ორმოცდაათი მარყუჟი ერთი გადასაფარებლის ბოლო კიდეზე შესაერთებლად, და ორმოცდაათი მარყუჟი მეორე გადასაფარებლის კიდეზე მასთან შესაერთებლად.

¹¹და გააკეთე სპილენძის ორმოცდაათი დუგმა და გაუყარე დუგმები მარყუჟებში, და შეაერთე სავანე, და ერთი იქნება.

¹²და ჩამოშვებული ნამეტი სავანის გადასაფარებლიდან, გადასაფარებლის ნამეტობის ნახევარი, გადაიჭიმოს სავანის უკანა მხარეს.

¹³და ნამეტი სავანის გადასაფარებლის სიგრძიდან, ერთი წყრთა ერთი მხრიდან, გადაიჭიმოს სავანის გვერდებზე აქეთა და იქითა მხრიდან, მის დასაფარავად.

¹⁴და გააკეთე საფარველი კარვისათვის წითელი ვერძის ტყავისა და ზევიდან მაჩვის ტყავისა.

¹⁵და გააკეთე ძელები სავანისათვის აკაციის ხისაგან.

¹⁶ათი წყრთა იყოს სიგრძე ძელისა და წყრთანახევარი იყოს სიგანე თითოეული ძელისა.

¹⁷ორ-ორი რიკი თითოეული ძელისათვის, ერთიმეორეზე მიერთებული. ეგრე გააკეთე სავანის ყოველი ძელისათვის.

¹⁸და გააკეთე ძელები სავანისათვის: ოცი ძელი ნეგების მხარისაკენ, სამხრეთისაკენ.

¹⁹და ვერცხლის ორმოცი კვარცხლბეკი გააკეთე ოცი ძელის ქვეშ: ორი კვარცხლბეკი ერთი ძელის ქვეშ მისი ორი რიკისთვის და ორი კვარცხლბეკი სხვა ძელის ქვეშ მისი ორი რიკისთვის.

²⁰და სავანის მეორე გვერდისათვის, ჩრდილოეთის მხარისაკენ — ოცი ძელი.

²¹და მათი ვერცხლის ორმოცი კვარცხლბეკი: ორ-ორი კვარცხლბეკი თითო ძელის ქვეშ.

²²და სავანის უკანა მხარისათვის, დასავლეთით, გააკეთე ექვსი ძელი.

²³და ორი ძელი გააკეთე სავანის კუთხეებისთვის, უკანა მხარეს.

²⁴და იყოს ისინი შეკრული ქვევიდან, და ერთად იყოს შეკრული ზემოთ, ერთ რგოლთან. ასე უნდა იყოს ორთავესათვის: ორივე კუთხისათვის იყოს ისინი.

²⁵და იყოს რვა ძელი და მათი კვარცხლბეკი ვერცხლისა — თექვსმეტი კვარცხლბეკი: ორი კვარცხლბეკი ერთი ძელის ქვეშ და ორი კვარცხლბეკი მეორე ძელის ქვეშ.

²⁶და გააკეთე ძელაკები აკაციის ხისგან: ხუთი — სავანის ერთი გვერდის ძელებისათვის.

²⁷და ხუთი ძელაკი სავანის მეორე მხარის ძელებისათვის, და ხუთი ძელაკი სავანის უკანა მხარის ძელებისათვის, დასავლეთით.

²⁸და შუა ძელაკი ძელების შუაგულში გასაყრელად — ერთი ბოლოდან მეორემდე.

²⁹და მოავარაყე ძელები ოქროთი, და მათი რგოლები, ძელაკების გასაყრელები გააკეთე ოქროსი, და ძელაკებიც ოქროთი მოავარაყე.

³⁰და ააგე სავანე იმ წესით, რომელიც გიჩვენე მთაზე.

³¹და გააკეთე ფარდა ცისფერი, და ძოწეული და ჭიაფერი ქსოვილებისა, და გრეხილი ბისონისა. ოსტატური ნაკეთობით გააკეთონ იგი, ქერუბიმებით.

³²და ჩამოკიდე იგი ოქროთი მოპირკეთებულ აკაციის ოთხ სვეტზე, ოქროსი იყოს მათი დუგმები, ვერცხლის ოთხ კვარცხლბეკზე,

³³და მიაბნიე ფარდა დუგმებს, და შეიტანე იქ, ფარდის მიღმა, მოწმობის კიდობანი. და ფარდა გამოჰყოფს თქვენთვის წმიდას წმიდათა წმიდისაგან.

³⁴და დაახურე თავსარქვეველი მოწმობის კიდობანს წმიდათა წმიდაში.

³⁵და დადგი ტაბლა ფარდის გარეთ და სასანთლე ტაბლის პირისპირ სავანის მხარეს, სამხრეთისაკენ, და დადგი ტაბლა ჩრდილოეთით.

³⁶და გააკეთე ფარდა სავანის შესასვლელთან ცისფერი, ძოწეული და ჭიაფერი ქსოვილისა, და გრეხილი ბისონისა, მქარგავის ნამუშევარი. და გააკეთე ფარდისათვის ხუთი სვეტი აკაციისა და მოავარაყე ისინი ოქროთი. და მათი დუგმები ოქროსი იყოს; და ჩამოასხი მათთვის სპილენძის ხუთი კვარცხლბეკი.