Read ბიბლია გამ. 27 Bible Online

გამ. 27 - ბიბლია bible

გამ. 27

¹და გააკეთე სამსხვერპლო აკაციის ხისაგან ხუთი წყრთა სიგრძისა და ხუთი წყრთა სიგანისა. ოთხკუთხედი იყოს სამსხვერპლო, სამი წყრთის სიმაღლისა.

²და გაუკეთე მას რქები მის ოთხივ კუთხეზე. მისგანვე იყოს მისი რქები და მოჭედე იგი სპილენძით.

³და გაუკეთე მას ქოთნები ფერფლის ჩასაყრელად, და მისი ნიჩბები, და მისი სასხურებელნი, და მისი ჩანგლები, და მისი აქანდაზები, ყოველი მისი ჭურჭელი სპილენძისგან გააკეთე.

⁴და გაუკეთე მას ცხაური ბადისებრი ნაკეთობისა სპილენძისაგან, და ბადეზე გაუკეთე ოთხი რგოლი სპილენძისა მის ოთხ კიდეზე.

⁵და დადევი იგი სამსხვერპლოს წრიული შვერილის ქვეშ. ქვევიდან ბადე სამსხვერპლოს ნახევრამდე იყოს.

⁶და გაუკეთე კეტები სამსხვერპლოს, კეტები აკაციის ხისა და მოჭედე ისინი სპილენძით.

⁷გაეყაროს მისი კეტები რგოლებში და იყოს კეტები სამსხვერპლოს ორივე გვერდზე, მის სატარებლად.

⁸ღრუიანი გააკეთე იგი ფიცრებით. როგორც გიჩვენე შენ მთაზე, ეგრე გააკეთონ.

⁹და მოაწყვე სავანის ეზო სამხრეთის მხრისაკენ, ნეგებისაკენ. ფარდები ეზოსათვის გრეხილი ბისონისა, ასი წყრთის სიგრძისა ერთ მხარეზე.

¹⁰და სვეტები მისი ოცი და მათი კვარცხლბეკები ოცი, სპილენძისგან. სვეტების დუგმები და მათი რკალები ვერცხლისა.

¹¹და აგრეთვე ჩრდილოეთის მხარის გასწვრივ, ასი წყრთის სიგრძის ფარდები. და სვეტები მისი — ოცი, და მათი კვარცხლბეკები — ოცი, სპილენძისა. და სვეტების დუგმები და მათი რკალები, ვერცხლისა.

¹²და ეზოს სიგანეზე დასავლეთით — ფარდები ორმოცდაათი წყრთისა. მათი ათი სვეტი და ათი კვარცხლბეკი.

¹³და ეზოს სიგანეზე აღმოსავლეთით, მზის აღმოსავლისკენ — ორმოცდაათი წყრთა,

¹⁴და თხუთმეტი წყრთა ფარდები ერთი მხარისათვის მათი სამი სვეტითა და მათი სამი კვარცხლბეკით.

¹⁵და მეორე მხარისათვის — თხუთმეტი ფარდა სამი სვეტითა და სამი კვარცხლბეკით.

¹⁶და ეზოს ბჭისათვის ფარდა — ოცი წყრთა, ცისფერი, ძოწეული და ჭიაფერი ქსოვილებისა და დაგრეხილი ბისონისა, მქარგავის ნაკეთობით. ოთხი სვეტი და ოთხი კვარცხლბეკი.

¹⁷ეზოს ყოველი სვეტი ირგვლივ შეერთებული იყოს ვერცხლის რკალებით. მათი დუგმები ვერცხლის იყოს, და მათი კვარცხლბეკები — სპილენძისა.

¹⁸ეზოს სიგრძე ასი წყრთაა და სიგანე — ორმოცდაათი ორმოცდაათზე. სიმაღლე ხუთი წყრთაა, გრეხილი ბისონისა, მათი კვარცხლბეკნი — სპილენძისა.

¹⁹სავანის ყველა ჭურჭელი ყოველი მისი სამსახურისთვის და ყველა მისი პალო და ეზოს პალო — სპილენძისა.

²⁰უბრძანე ისრაელის ძეთ მოგიტანონ სუფთად გამოხდილი ზეთისხილის ზეთი გასანათებლად, რათა მუდამ ენთოს ლამპარი.

²¹საკრებულო კარავში ფარდის გარეთ, რომელიც მოწმობის კიდობნის წინაა, ენთოთ იგი აარონსა და მის ძეთ მწუხრიდან დილამდე, უფლის წინაშე. ეს საუკუნო წესია მათი თაობებისათვის ისრაელის ძეთაგან.