Read ბიბლია გამ. 28 Bible Online

გამ. 28 - ბიბლია bible

გამ. 28

¹და მიიახლოვე აარონი, შენი ძმა, და მისი ძენი მასთან ერთად, ისრაელის ძეთაგან, რათა მღვდლობა გამიწიოს, აარონი და ნადაბი, აბიჰუ, ელეაზარი და ითამარი, ძენი აარონისა.

²და დაუმზადე წმიდა სამოსელი აარონს, შენს ძმას, დიდებისათვის და დასამშვენებლად.

³და ელაპარაკე ყველა გულბრძენს, რომელნიც მე ავავსე სიბრძნის სულით, რომ დაუმზადონ სამოსელი აარონს მის საკურთხებლად, რათა მღვდლობა გამიწიოს.

⁴და აჰა, სამოსელნი, რომელნიც მათ უნდა დაამზადონ: სამკერდული, ეფოდი, წამოსასხამი და ნაქსოვი კვართი, დოლბანდი და სარტყელი. და დაამზადონ სამოსელი აარონს, შენს ძმას, და მის ძეთ, რათა მღვდლობა გამიწიოს.

⁵და აიღონ ოქრო, ცისფერი და ძოწეული და ჭიაფერი მატყლი და ბისონი.

⁶და დაამზადონ ეფოდი ოქროსაგან, ცისფერი და ძოწეული, ჭიაფერი და გრეხილი ბისონისა, ოსტატური ნაკეთობით.

⁷ორი შემკვრელი სამხრე ექნება მას მის ორი-ვე კიდეზე, რათა დამაგრებული იყოს.

⁸და სარტყელი ეფოდისა, რომელიც მასზეა, იყოს ისეთივე ნაკეთობისა, ოქროსაგან, ცისფერი და ძოწეული, ჭიაფერი და გრეხილი ბისონისგან.

⁹და აიღე სარდიონის ორი ქვა, და ამოკვეთე მათზე ისრაელის ძეთა სახელები.

¹⁰ექვსი ამ სახელთაგან ერთ ქვაზე და დანარჩენი ექვსი სახელი მეორე ქვაზე, მათი წარმომავლობის მიხედვით.

¹¹ქვაზე ამომკვეთელის ნაკეთობით, საბეჭდავის ტვიფარივით ამოტვიფრე ორივე ქვაზე ისრაელის ძეთა სახელები. ბუდეები ოქროს მოჭედილობით გააკეთე.

¹²და მოათავსე ორი ქვა ეფოდის სამხრეებზე — ისრაელის ძეთა სამახსოვრო ქვები, და აარონმა ატაროს მათი სახელები უფლის წინაშე თავის ორივე მხარზე, მათ სამახსოვროდ.

¹³და გააკეთე ბუდეები ოქროსაგან.

¹⁴ორი ძეწკვი წმიდა ოქროსაგან, გრეხილი გააკეთე ისინი, წნული ნაკეთობით, და მიამაგრე წნული ძეწკვები ბუდეებს.

¹⁵და დაამზადე განკითხვის სამკერდული ოსტატური ნაკეთობით. ისეთივე ნაკეთობით დაამზადე, როგორც ეფოდია. ოქროსაგან, ცისფერი და ძოწეული და ჭიაფერი და გრეხილი ბისონისგან დაამზადე იგი.

¹⁶ოთხკუთხედი იყოს იგი, ორკეცი, მტკაველი მისი სიგრძე და მტკაველი მისი სიგანე.

¹⁷და ჩასვი მასში ჩასასმელი ქვები; ქვების ოთხი მწკრივი: ლალისა, ტოპაზისა და ბივრილისა — ერთი მწკრივი.

¹⁸და მეორე მწკრივი: ზურმუხტისა, საფირონისა და ალმასისა.

¹⁹და მესამე მწკრივი: იაგუნდისა, აქატისა და ამეთვისტოსი.

²⁰და მეოთხე მწკრივი: ქრიზოლითისა, სარდიონისა, იასპისა. ოქროს ბუდეში უნდა ჩაისვას ისინი.

²¹ქვები თორმეტი იყოს ისრაელის ძეთა სახელების მიხედვით. საბეჭდავის ტვიფარივით უნდა იყოს, და თითოეული თავისი სახელით უნდა იყოს თორმეტი ტომისათვის.

²²და გააკეთე სამკერდულზე გრეხილი ძეწკვები, წნულად გაკეთებული, წმიდა ოქროთი.

²³და გააკეთე სამკერდულზე ოქროს ორი რგოლი, და მიამაგრე ეს ორი რგოლი სამკერდულის ორ კიდეზე.

²⁴და ჩასვი ოქროს წნული ორივე რგოლში სამკერდულის კიდეებზე.

²⁵და ორივე წნულის ორივე კიდე მიამაგრე ორივე ბუდეზე, და მიამაგრე ეფოდის სამხრეებზე, მის წინა მხარეს.

²⁶და გააკეთე ორი რგოლი ოქროსი და მიამაგრე ისინი სამკერდულის ორივე კიდეზე, მის არშიაზე, რომელიც ეფოდის შიგნითაა.

²⁷და გააკეთე ოქროს ორი რგოლი და მიამაგრე ისინი ეფოდის ორივე სამხრეზე ქვევიდან, მისი წინამხრიდან, მისი შეერთების ადგილთან, ეფოდის სარტყელზე.

²⁸და მიამაგრონ სამკერდული მისი რგოლებით ეფოდის რგოლებს ცისფერი ზონრით, რათა იგი იყოს ეფოდის სარტყელზე და არ მოსცილდეს სამკერდული ეფოდს.

²⁹და ატაროს აარონმა ისრაელის ძეთა სახელები განკითხვის სამკერდულზე, თავის გულზე, წმიდაში შესვლისას, მუდმივ სამახსოვროდ უფლის წინაშე.

³⁰და ჩასვი განკითხვის სამკერდულში ურიმი და თუმიმი. და იქნება ისინი აარონის გულზე მისი მისვლისას უფლის წინაშე; და ატაროს აარონმა ისრაელის ძეთა სამართალი თავის გულზე უფლის წინაშე მარადის.

³¹და დაამზადე მოსასხამი ეფოდისათვის მთლად ცისფერი.

³²და იყოს ჭრილი მის შუაში თავისათვის. არშია ჰქონდეს მის ჭრილს ირგვლივ, მქსოველის ნაკეთი, ჯავშნის ჭრილივით ჰქონდეს მას, რომ არ გაიხეს.

³³და გაუკეთე კალთებზე ბროწეულები ცისფერი, ძოწეული და ჭიაფერი მის კალთებზე ირგვლივ. და ოქროს ეჟვნები შეაბი მათ შორის, ირგვლივ.

³⁴ოქროს ეჟვანი და ბროწეული, ოქროს ეჟვანი და ბროწეული სამოსლის კალთებზე, ირგვლივ.

³⁵და იგი იყოს აარონზე მსახურებისთვის, რათა ისმოდეს მისი ხმა მისი შესვლისას წმიდაში უფლის წინაშე, და მისი გამოსვლისას, რომ არ მოკვდეს.

³⁶და გააკეთე გვირგვინი წმიდა ოქროსი, და ამოკვეთე მასზე საბეჭდავის ტვიფარივით: ‘სიწმიდე უფლისა.’

³⁷და მიამაგრე იგი ცისფერი ზონრით, და იყოს იგი დოლბანდზე, დოლბანდის წინა მხარეს იყოს იგი.

³⁸და იყოს ის აარონის შუბლზე, და იტვირთოს აარონმა ნაკლი შესაწირავთა, რომლებსაც შესწირავენ ისრაელის ძენი, ყოველი მათი წმიდა საბოძვარისთვის, და იყოს იგი მის შუბლზე მუდამ, რათა სასურველი იყოს ისინი უფლის წინაშე.

³⁹და მოქსოვე კვართი ბისონისა, და სარტყელი გაუკეთე, მქარგავის ნაკეთი.

⁴⁰დაუმზადე აარონის ძეთ კვართი და გაუკეთე მათ სარტყელნი, და თავსამკაულნი გაუკეთე მათ სადიდებლად და დასამშვენებლად.

⁴¹და შემოსე მათით აარონი, შენი ძმა, მისი ძენი მასთან ერთად, და სცხე მათ, და აუვსე მათ ხელი, და აკურთხე ისინი, რომ მღვდლობა გამიწიონ.

⁴²და დაუმზადე მათ სელის შარვალი, დასაფარავად სხეულის სიშიშვლისა. წელიდან წვივამდე რომ სწვდებოდეს.

⁴³და იქონიონ ისინი აარონმა და მისმა ძეებმა საკრებულო კარავში შესვლისას ან სამსხვერპლოსთან მიახლებისას წმიდაში მსახურებისათვის, რათა ცოდვა არ დაედოთ და არ დაიხოცნენ. ეს საუკუნო წესია მისთვის და მის შთამომავალთათვის მის შემდეგ.