Read ბიბლია გამ. 29 Bible Online

გამ. 29 - ბიბლია bible

გამ. 29

¹ეს არის, რაც უნდა გაუკეთო შენ მათ, რათა აკურთხო ისინი ჩემთვის მღვდლობის გასაწევად: აიყვანე ერთი მოზვერი და ორი უმანკო ვერძი.

²და აიღე ხმიადები და უფუარი კვერები, ხორბლის წმიდა ფქვილისაგან, ზეთწაცხებული. გამტკიცული ფქვილისგან გააკეთე ისინი.

³და მოათავსე ისინი ერთ კალათაში, და მიიტანე ისინი კალათით. და აგრეთვე მოზვერი და ორი ვერძი.

⁴აარონი და მისი ძენი მიაახლე საკრებულო კარვის კარს და განბანე ისინი წყლით.

⁵და აიღე შესამოსელნი და შემოსე აარონი კვართით და წამოსასხამით, ეფოდით და სამკერდულით, და შემოარტყი მას სარტყელი ეფოდისა.

⁶და დაახურე დოლბანდი თავზე, და მიამაგრე წმიდის გვირგვინი დოლბანდზე.

⁷და აიღე საცხებელი ზეთი, და დაასხი მას თავზე, და სცხე მას.

⁸და მიაახლე მისი ძენი და შემოსე ისინი კვართებით.

⁹და შემოარტყი მათ სარტყელი, აარონს და მის ძეებს, და დაახურე მათ დოლბანდები, და იყოს მღვდლობა საუკუნო წესად. და აუვსებ ხელს აარონს და მის ძეთ.

¹⁰და მიიყვანე მოზვერი საკრებულო კარავთან, და დაასხან აარონმა და მისმა ძეებმა თავიანთი ხელები მოზვერს თავზე.

¹¹და დაკალი მოზვერი უფლის წინაშე საკრებულო კარვის შესასვლელთან.

¹²და აიღე მოზვრის სისხლიდან, და წასცხე თითით სამსხვერპლოს რქებს. მთელი სისხლი კი დაღვარე სამსხვერპლოს საძირკველთან.

¹³და აიღე მთელი ქონი, რომელიც აკრავს შიგნეულს, და ღვიძლის ქონი, ორივე თირკმელი მათივე ქონითურთ, და აკმიე სამსხვერპლოზე.

¹⁴ხოლო მოზვრის ხორცი და მისი ტყავი და მისი სიბინძურე დაწვი ცეცხლში ბანაკის გარეთ. ცოდვის მსხვერპლია იგი.

¹⁵და აიყვანე ერთი ვერძი, და დაასხან აარონმა და მისმა ძეებმა ხელები ვერძს თავზე.

¹⁶და დაკალი ვერძი, და აიღე მისი სისხლი, და მოაპკურე სამსხვერპლოს ირგვლივ.

¹⁷და ვერძი დაჭერი ნაწილებად და გარეცხე მისი შიგნეული და მისი კანჭები, და დაადე ისინი მის გაკვეთილ ნაწილებს და მის თავს.

¹⁸და აკმიე მთელი ვერძი სამსხვერპლოზე. ეს სრულადდასაწველი მსხვერპლია უფლისა, კეთილსურნელებაა, საცეცხლო მსხვერპლია იგი უფლისათვის.

¹⁹და აიყვანე მეორე ვერძი, და დაასხან აარონმა და მისმა ძეებმა ხელები ვერძის თავს.

²⁰და დაკალი ვერძი, და აიღე მისი სისხლი, და სცხე აარონის მარჯვენა ყურის ბიბილოს და მის ძეთა მარჯვენა ყურის ბიბილოს, და მათი მარჯვენა ხელის ცერს და მათი მარჯვენა ფეხის ცერს. და მოაპკურე სისხლი სამსხვერპლოს, ირგვლივ.

²¹და აიღე სისხლი, რომელიც სამსხვერპლოზეა, და საცხებელი ზეთი და მოასხურე აარონსა და მის შესამოსელს, და მის ძეებსა და მის ძეთა სამოსელს მასთან ერთად. და განიწმიდება იგი და მისი შესამოსელნი, და მის ძეთა შესამოსელნი მასთან ერთად.

²²და აიღე ვერძისგან ქონი და დუმა, და ქონი, რომელიც აკრავს შიგნეულს, და ღვიძლის ქონი, და ორივე თირკმელი, და ქონი, რომელიც მათზეა, და მარჯვენა კანჭი, რადგან ეს ვერძი ხელავსებისაა,

²³და ერთი მთელი პური, და ერთი ზეთიანი ნამცხვარი, და ერთი კვერი ხმიადების კალათიდან, რომელიც უფლის წინაშეა.

²⁴და დაუწყვე ყოველივე აარონს ხელისგულებზე და მის ძეთ ხელისგულებზე, და შეარხიე ისინი შესარხეველ შესაწირავად უფლის წინაშე.

²⁵და აიღე ისინი მათ ხელთაგან, და აკმიე სამსხვერპლოზე სრულადდასაწველად, კეთილსურნელებად უფლის წინაშე. იგი საცეცხლო მსხვერპლია უფლისა.

²⁶და აიღე ხელავსების ვერძის მკერდი, რომელიც აარონისაა, და შეარხიე იგი შესარხეველ შესაწირავად უფლის წინაშე. და ეს იქნება შენი წილი.

²⁷და განწმიდე მკერდი შესარხეველი შესაწირავისა და კანჭი აღსამართავი შესაწირავისა, რომელიც შერხეულ და აღმართულ იქნა ხელთავსების ვერძისაგან, რომელიც აარონისაა და, რომელიც მისი ძეებისაა.

²⁸და ეს იყოს აარონისა და მისი ძეებისათვის საუკუნო წესად ისრაელის ძეთაგან, რადგან ეს აღსამართავი შესაწირავია და აღსამართავი შესაწირავი უნდა იყოს ისრაელის ძეთაგან მათი სამშვიდობო მსხვერპლებიდან მათი აღსამართავი შესაწირავი უფლისათვის.

²⁹და წმიდა შესამოსელი, რომელიც აარონისაა, დარჩეს მის ძეებს მის შემდგომ, რათა მასში მიიღონ ცხება და ხელის ავსება.

³⁰შვიდი დღე ემოსოს იგი მღვდელს, ვინც მის ნაცვლად იქნება მის ძეთაგან, რომელიც შევა საკრებულო კარავში წმიდაში მსახურებისთვის.

³¹ხელთავსების ვერძი აიყვანე და მოხარშე მისი ხორცი წმიდა ადგილზე.

³²და ჭამონ აარონმა და მისმა ძეებმა ხორცი ვერძისა და პური, რომელიც კალათშია, საკრებულო კარვის შესასვლელთან.

³³და ჭამონ ის, რომლითაც მიღებული აქვთ მათ გამოსყიდვა ხელავსებისათვის და კურთხევისათვის. უცხომ არ ჭამოს იგი, რადან წმიდაა იგი.

³⁴და თუ დარჩება ხელავსების ხორცისაგან და პურისაგან დილამდე, მაშინ დაწვი მონარჩენი ცეცხლში. აღარ იჭამოს, რადგან წმიდაა იგი.

³⁵და ყველაფერი ისე გაუკეთე აარონსა და მის ძეებს, როგორც გამცნე შენ: შვიდ დღეში აუვსე მათ ხელი.

³⁶და მოზვერი ცოდვის შესაწირავისა შესწირე ყოველდღე გამოსასყიდად და განწმიდე სამსხვერპლო შენი გამოსყიდვისას მასზე, და სცხე მას, რათა განწმიდო იგი.

³⁷შვიდ დღეს ასრულებდე გამოსყიდვას სამსხვერპლოსთვის და განწმედდე მას. და იქნება სამსხვერპლო წმიდათაწმიდა. ყველა, ვინც შეეხება სამსხვერპლოს, განიწმიდება.

³⁸აი რას შესწირავ სამსხვერპლოზე: ორ ერთწლიან კრავს ყოველდღე, მუდმივად.

³⁹ერთი კრავი შესწირე დილით, ხოლო მეორე კრავი შესწირე საღამოთი,

⁴⁰და მეათედი ეფა, გამტკიცული ფქვილი, მეოთხედ ჰინ გამოხდილ ზეთში შერეული, და მეოთხედი ჰინი ღვინო საღვრელად ერთი კრავისთვის.

⁴¹მეორე კრავი შესწირე მწუხრის ჟამს, მსგავსად დილის შესაწირავისა, და ასეთივე საღვრელით შესწირე იგი, კეთილსურნელებად, საცეცხლო შესაწირავად უფალს.

⁴²ეს სრულადდასაწველი მუდმივად იყოს თქვენს თაობებში საკრებულო კარვის შესასვლელთან უფლის წინაშე, სადაც გამოგეცხადებით თქვენ, რათა გელაპარაკო.

⁴³და იქ გამოვეცხადები ისრაელის ძეთ და განიწმიდება კარავი ჩემი დიდებით.

⁴⁴და განვწმედ საკრებულო კარავს და სამსხვერპლოს, და აარონს და მის ძეებსაც განვწმედ, რათა მღვდლობა გამიწიონ.

⁴⁵და დავივანებ ისრაელის ძეთა შორის და ვიქნები მათი ღმერთი.

⁴⁶და შეიცნობენ, რომ მე ვარ უფალი, ღმერთი მათი, რომელმაც გამოვიყვანე ისინი ეგვიპტის ქვეყნიდან, რათა დავივანო მათ შორის. მე ვარ უფალი, მათი ღმერთი.