Read ბიბლია გამ. 3 Bible Online

გამ. 3 - ბიბლია bible

გამ. 3

¹მწყემსავდა მოსე თავისი სიმამრის, მიდიანელი მღვდლის ითროს წვრილფეხა საქონელს. წაასხა მან წვრილფეხა საქონელი უდაბნოს იქით და მიადგა ღვთის მთას, ხორებს.

²და გამოეცხადა მას უფლის ანგელოზი ცეცხლის ალში შუაგულ მაყვალში. და დაინახა: აჰა, მაყვალს ცეცხლი უკიდია, მაგრამ მაყვალი არ იწვის.

³და თქვა მოსემ: „წავალ და ვნახავ ამ დიდ სანახაობას, რად არ იწვის ეს მაყვალი?“

⁴და დაინახა უფალმა, რომ წავიდა სანახავად, და დაუძახა მას ღმერთმა მაყვალის შუაგულიდან და უთხრა: „მოსე! მოსე!“ და თქვა: „აქა ვარ“.

⁵და უთხრა მას უფალმა: „ახლოს ნუ მოხვალ! გაიძრე ფეხზე შენი ფეხსაცმელი, რადგან ადგილი, სადაც შენ დგახარ, წმიდა მიწაა.“

⁶და უთხრა: „მე ვარ მამაშენის ღმერთი, ღმერთი აბრაამისა, ღმერთი ისაკისა და ღმერთი იაკობისა.“ და დაიფარა მოსემ სახე, რადგან შეეშინდა ღმერთის ხილვისა.

⁷და უთხრა უფალმა: „ხილვით ვიხილე ტანჯვა ჩემი ხალხისა, რომელიც ეგვიპტეშია, და ვისმინე მისი კვნესა აღმსრულებელთაგან, რადგან მე ვიცი მისი სატკივარი.

⁸და ჩამოვედი, რათა ვიხსნა ეგვიპტელთა ხელიდან და გამოვიყვანო იმ ქვეყნიდან, და შევიყვანო კარგსა და ვრცელ ქვეყანაში, სადაც მოედინება რძე და თაფლი — ქანაანელთა, ხეთელთა, ამორეველთა, ფერიზელთა, ხიველთა, იებუსეველთა ადგილზე.

⁹და აჰა, ისრაელის ძეთა კვნესამ მოაწია ჩემამდე, და ასევე ვიხილე ჩაგვრა, რომლითაც ეგვიპტელნი ჩაგრავენ მათ.

¹⁰ახლა კი წადი და მიგავლენ ფარაონთან, და გამოიყვანე ჩემი ხალხი, ისრაელის ძენი, ეგვიპტიდან.

¹¹და უთხრა მოსემ ღმერთს: „მე ვინა ვარ, რომ წავიდე ფარაონთან და გამოვიყვანო ისრაელის ძენი ეგვიპტიდან?“

¹²და თქვა: „მე ვიქნები შენთან და ეს გექნება ნიშნად, მე რომ მიგავლინე: როცა გამოიყვან ამ ხალხს ეგვიპტიდან, ემსახურეთ ღმერთს ამ მთაზე.“

¹³და უთხრა მოსემ ღმერთს: „აჰა, მე მივალ ისრაელის ძეებთან, და ვეტყვი მათ: თქვენი მამების ღმერთმა მომავლინა-მეთქი თქვენთან. და მეტყვიან: ‘რა არის მისი სახელი?’ რა ვუთხრა მათ?“

¹⁴და უთხრა ღმერთმა მოსეს: „მე ვარ, რომელიც ვარ.“ და თქვა „ასე უთხარი ისრაელის ძეთ — მე ვარმა მომავლინა-თქო თქვენთან.“

¹⁵კვლავ უთხრა ღმერთმა მოსეს: „ასე უთხარი ისრაელის ძეთ: უფალმა, თქვენი მამების ღმერთმა, აბრაამის ღმერთმა, ისაკის ღმერთმა და იაკობის ღმერთმა მომავლინა თქვენთან. ეს არის საუკუნოდ სახელი ჩემი და ეს არის ჩემი სახსენებელი თაობიდან თაობამდე.

¹⁶წადი და შეკრიბე ისრაელის უხუცესები და უთხარი მათ: უფალი, თქვენი მამების ღმერთი, გამომეცხადა მე; ღმერთი აბრაამისა, ისაკისა და იაკობისა, და თქვა ასე: ‘მონახულებით მოგინახულეთ თქვენ. დავინახე რა ხდება თქვენს თავს ეგვიპტეში.

¹⁷მე ვთქვი: წაგიყვანთ ეგვიპტის სატანჯველიდან ქანაანელთა, ხეთელთა, ამორეველთა, ფერიზელთა, ხიველთა და იებუსეველთა ქვეყანაში, ქვეყანაში, სადაც მოედინება რძე და თაფლი.’

¹⁸მოისმენენ შენს ხმას, და მიხვალთ შენ და ისრაელის უხუცესნი ეგვიპტის მეფესთან, და ეტყვით მას: ‘უფალმა, ებრაელთა ღმერთმა მოგვიწოდა, ჩვენ და ახლა წავალთ სამი დღის სავალ გზაზე უდაბნოში და მსხვერპლს შევწირავთ უფალს, ჩვენს ღმერთს.’

¹⁹ვიცი, რომ ეგვიპტის მეფე არ გაგიშვებთ, თუ არ აიძულებს მას ძლიერი ხელი.

²⁰და გავიწვდი ხელს, და განვგმირავ ეგვიპტეს ყოველი ჩემი სასწაულით, რასაც მოვახდენ მასში. და ამის შემდეგ გაგიშვებთ.

²¹და ამ ხალხს მადლს ვაპოვნინებ ეგვიპტელთა თვალში. როცა წახვალთ, არ წახვალთ ხელცარიელნი.

²²და ინათხოვროს ყოველმა ქალმა თავისი მეზობლისა და თავისი ხიზანი ქალისაგან ნივთი ვერცხლისა და ნივთი ოქროსი, და სამოსელი. და შემოსეთ თქვენი ძენი და ასულნი, და გაძარცვეთ ეგვიპტელნი.“