Read ბიბლია გამ. 35 Bible Online

გამ. 35 - ბიბლია bible

გამ. 35

¹და შეკრიბა მოსემ ისრაელის ძეთა მთელი თემი და უთხრა მათ: „აჰა, სიტყვანი, რომელნიც გვამცნო უფალმა შესასრულებლად:

²ექვსი დღე აკეთეთ საქმე და მეშვიდე დღე წმიდა იყოს თქვენთვის, დასვენების შაბათი უფლისა. ყველა, ვინც ამ დღეს გააკეთებს საქმეს, მოკვდეს.

³არ დაანთოთ ცეცხლი არც ერთ თქვენს სამკვიდრებელში შაბათ დღეს.“

⁴და უთხრა მოსემ ისრაელის ძეთა მთელ თემს: „აჰა, სიტყვა, რომელიც ბრძანა უფალმა:

⁵გაიღეთ შესაწირავი უფლისათვის. ყოველმა გულით მსურველმა მიიტანოს შესაწირავი უფლისა: ოქრო, ვერცხლი და სპილენძი.

⁶მატყლი ცისფერი და ძოწეული და ჭიაფერი, ბისონი, და თხისური.

⁷და ტყავი ვერძთა ალისფერი, და ტყავნი მაჩვისა და ხე აკაციისა,

⁸და ზეთი გასანათებლად, და სურნელი საცხებელი ზეთისათვის და კეთილსურნელება საკმევლისათვის.

⁹და ქვები სარდიონისა და ჩასასმელი ქვები ეფოდისათვის და სამკერდულისათვის.

¹⁰და ყველა, გულით ბრძენი თქვენში, მოვიდეს და გააკეთოს ყოველივე, რაც ბრძანა უფალმა.

¹¹სავანე, მისი კარავი და მისი საფარველი, მისი დუგმები და მისი ძელები, მისი ძელაკები, მისი სვეტები და მისი კვარცხლბეკები.

¹²კიდობანი და მისი კეტები, თავსარქველი და ჩამოსაფარებელი ფარდა.

¹³ტაბლა და მისი კეტები, და ყოველი მისი ჭურჭელი და საწინაშეო პური.

¹⁴და სასანთლე გასანათებლად და ყოველი მისი ჭურჭელი, და მისი კანდელები და ზეთი გასანათებლად.

¹⁵და სამსხვერპლო საკმევლისა და მისი კეტები, საცხებელი ზეთი და სურნელოვანი საკმეველი, და ფარდა კარვის შესასვლელისა.

¹⁶სამსხვერპლო სრულადდასაწველისა და ბადე სპილენძისა, რომელიც მისთვისაა, მისი კეტები და ყოველი მისი ჭურჭელი, აბაზანა და მისი კვარცხლბეკი,

¹⁷საფარნი ეზოსი, მისი სვეტები და მათი კვარცხლბეკები, ფარდა ეზოს კარიბჭესთან.

¹⁸და სავანის პალოები და ეზოს პალოები და მათი საბელები.

¹⁹სამსახურებელი სამოსელი წმიდაში მსახურებისათვის და წმიდა შესამოსელნი აარონ მღვდლისათვის და შესამოსელნი მის ძეთათვის.“

²⁰და გამოვიდა ისრაელის ძეთა თემი მოსესგან.

²¹და მოვიდა ყოველი კაცი, რომელსაც გული ეწეოდა, და თითოეული, ვისაც სული აღეძრა, და მიიტანეს შესაწირავი უფლისა საკრებულო კარვის გასამართავად და ყოველი მისი საჭიროებისათვის და წმიდა შესამოსელისათვის.

²²და მოდიოდნენ კაცები ქალებთან ერთად. ყველა გულით მსურველს მიჰქონდა რგოლები და საყურეები და ბეჭდები, და სამკაულები, ყოველი ჭურჭელი ოქროსი. და ყველა, ვისაც სურდა შესაწირავად ოქრო უფლისათვის.

²³და ყველას, ვისაც კი ჰქონდა ცისფერი, მეწამული, ჭიაფერი ბისონი, და თხისური და ვერძთა ალისფერი ტყავები, მოჰქონდა.

²⁴ყველას, ვინც კი სწირავდა ვერცხლის შესაწირავს და სპილენძისას, მიჰქონდათ უფლის შესაწირავი. და ყველას, ვისაც ჰქონდა აკაციის ხეები სამუშაოს ყოველი საქმისათვის, მიჰქონდათ.

²⁵და ყოველი გულბრძენი დედაკაცი ართავდა თავისი ხელით და მიჰქონდა ნართი ცისფერი, მეწამული, ჭიაფერი და ბისონი.

²⁶და ყოველი დედაკაცი, ვისაც გული მიუწევდა და დართვა იცოდა, ართავდა თხისურს.

²⁷და მთავრებს მოჰქონდათ სარდიონის ქვები და ჩასასმელი ქვები ეფოდისა და სამკერდულისათვის,

²⁸და სურნელება და ზეთი გასანათებლად და ზეთი საცხებლისათვის და საკმევლისათვის.

²⁹და ყოველ მამაკაცსა და დედაკაცს, ვისაც გული უწევდა მისატანად ყოველი იმ საქმისათვის, რომლის კეთებაც ბრძანა უფალმა მოსეს ხელით, მიჰქონდათ ისრაელის ძეთ ნებაყოფლობითი შესაწირავი უფლისათვის.

³⁰და უთხრა მოსემ ისრაელის ძეთ: „შეხედეთ, მოუწოდა უფალმა სახელებით ბეცალელს, ძესა ურისა, ძისა ხურისა, იუდას ტომიდან.“

³¹და აავსო იგი ღვთის სულით, სიბრძნით, გონებით, ცოდნით და ყოველი ხელოვნებით,

³²რათა შეექმნათ ხელოვნებით ნაქსოვი ქსოვილი, დაემუშავებინათ ოქრო, ვერცხლი და სპილენძი,

³³და გამოეთალათ ქვები ჩასასმელად, და მოეხარატებინათ ხე და ყოველი სახელოვნო საქმე ეკეთებინათ;

³⁴და უნარი სწავლებისა ჩაუდო მას გულში, მას და აჰოლიაბს, ახისამაქის ძეს, დანის ტომიდან.

³⁵აუვსო მათ გული სიბრძნით, რათა ეკეთებინათ ყოველი საქმე ხარატისა და ხელოვანი მქსოველისა, და მქარგავისა ცისფერ, მეწამულ, ჭიაფერ და ბისონის ქსოვილზე. და ეკეთებინათ საქმე მქსოველისა, რომელიც ხელოვნებით ქსოვს.