Read ბიბლია გამ. 36 Bible Online

გამ. 36 - ბიბლია bible

გამ. 36

¹და გააკეთეს ბეცალელმა და აჰოლიაბმა და ყველა გულბრძენმა, რომელთაც მიანიჭა უფალმა სიბრძნე და გონიერება, რათა შეეცნოთ და ეკეთებინათ ყველა საქმე საწმიდრის სამუშაოსი, ყველაფერი, რაც უფალმა ბრძანა.

²და მოუხმო მოსემ ბეცალელსა და აჰოლიაბს, და ყოველ გულბრძენს, რომელთაც მიანიჭა უფალმა სიბრძნე გულისა, ყველას, ვისაც გული მიუწევდა საქმის დასაწყებად და მის საკეთებლად.

³და აიღეს მოსესაგან მთელი შემოწირულობა, რომელიც მიიტანეს ისრაელის ძეთ საწმიდრის საქმის აღსასრულებლად, მის საკეთებლად, და მათაც კვლავ მიჰქონდათ მასთან ძღვენი დილდილობით.

⁴და მოვიდა ყოველი გულით ბრძენი საწმიდრის ყოველი სამუშაოს საკეთებლად, თითოეული თავის სამუშაოზე, ვინც რას აკეთებდა,

⁵და უთხრეს მოსეს ასე: „ხალხს მოაქვს მეტი, ვიდრე საჭიროა სამუშაოს შესასრულებლად, რისი გაკეთებაც ბრძანა უფალმა.“

⁶და ბრძანა მოსემ, და გაავრცელეს ხმა ბანაკში ასე: „არც კაცმა და არც დედაკაცმა აღარაფერი აკეთოს საწმიდრის შესაწირისათვის.“ და შეწყვიტა ხალხმა მოტანა.

⁷და მარაგი საკმაო იყო ყველა საქმისათვის, რაც უნდა ეკეთებინათ, და მორჩა კიდეც.

⁸და გააკეთა ყოველმა გულბრძენმა, რომლებიც აკეთებდნენ კარავის საქმეს: ათი გადასაფარებელი გრეხილი ბისონის და ცისფერის, ძოწეულის და ჭიაფერის. გააკეთეს ქერუბიმები მათზე ოსტატური ნაკეთობით.

⁹სიგრძე თითოეული გადასაფარებლისა იყო ოცდარვა წყრთა, და სიგანე — ოთხი წყრთა. ერთი ზომის იყო ყოველი გადასაფარებელი.

¹⁰და შეაერთა ხუთი გადასაფარებელი ერთიმეორესთან.

¹¹და გააკეთა ცისფერი მარყუჟები ერთი გადასაფარებლის კიდეზე, სადაც იგი ერთიანდება სხვებთან. ასევე გააკეთა ბოლო გადასაფარებლის კიდეზე სხვებთან შესაერთებლად.

¹²ორმოცდაათი მარყუჟი გაუკეთა ერთ გადასაფარებელს და ორმოცდაათი მარყუჟი გააკეთა გადასაფარებლის ბოლოს, სადაც იგი ერთიანდება სხვებთან. ეს მარყუჟები ესადაგებოდნენ ერთიმეორეს.

¹³და გააკეთა ორმოცდაათი ოქროს დუგმა და შეაერთა გადასაფარებლები ერთიმეორესთან დუგმებით, და გამოვიდა სავანე ერთიანი.

¹⁴და გააკეთა გადასაფარებლები თხისურისაგან სავანის გადასახურად. თერთმეტი გადასაფარებელი გააკეთა ასეთი.

¹⁵სიგრძე თითოეული გადასაფარებლისა იყო ოცდაათი წყრთა და ოთხი წყრთა იყო თითოეული გადასაფარებლის სიგანე. ერთი ზომის იყო თერთმეტივე გადასაფარებელი.

¹⁶და შეაერთა ხუთი გადასაფარებელი ცალკე და ექვსი გადასაფარებელი ცალკე.

¹⁷და გააკეთა ორმოცდაათი მარყუჟი ბოლო გადასაფარებლის კიდეზე, მისაერთებელთან და ორმოცდაათი მარყუჟი გააკეთა მეორე მისაერთებელი გადასაფარებლის კიდეზე.

¹⁸და გააკეთა სპილენძის ორმოცდაათი დუგმა კარვის შესაერთებლად, რათა ყოფილიყო ერთიანი.

¹⁹და გააკეთა საფარი კარვისათვის ვერძთა ალისფერი ტყავებისგან და მაჩვის ტყავების საფარი ზემოდან.

²⁰და გააკეთა დასასმელი ძელები სავანისათვის აკაციის ხეთაგან.

²¹ათი წყრთა იყო სიგრძე ძელისა და ერთნახევარი წყრთა — სიგანე თითოეული ძელისა.

²²ორი კოტა ჰქონდა თითოეულ ძელს, ერთმანეთთან მიერთებული. ასე გაუკეთა კარვის ყოველ ძელს.

²³და გააკეთა ძელები სავანისათვის, ოცი ძელი ნეგების მხარისაკენ, სამხრეთისაკენ.

²⁴და ვერცხლის ორმოცი კვარცხლბეკი გააკეთა ოცი ძელის ქვეშ, ორი კვარცხლბეკი ერთი ძელის ქვეშ, ორივე მისი კოტასათვის და ორი კვარცხლბეკი მეორე ძელის ქვეშ — მისი ორივე კოტასათვის.

²⁵და სავანის მეორე მხრისათვის, ჩრდილოეთ მხარეს, გააკეთა ოცი ძელი.

²⁶და მათი ვერცხლის ორმოცი კვარცხლბეკი — ორი კვარცხლბეკი ერთი ძელის ქვეშ და ორი კვარცხლბეკი მეორე ძელის ქვეშ.

²⁷და სავანის უკანა მხარისათვის, დასავლეთისაკენ, გააკეთა ექვსი ძელი.

²⁸და ორი ძელი გააკეთა სავანის კუთხეებისათვის, უკანა მხარეს.

²⁹და შეერთებული იყო ისინი ქვემოთ და ერთად იყო შეერთებული ზევით ერთ რგოლთან. ასე გაუკეთა ორივეს ორივე კუთხეში.

³⁰და იყო რვა ძელი მათი ვერცხლის კვარცხლბეკებითურთ, თექვსმეტი კვარცხლბეკი. ორ-ორი კვარცხლბეკი თითოეული ძელის ქვეშ.

³¹და გააკეთა ძელაკები აკაციის ხეთაგან. ხუთი სავანის ძელთა ერთი გვერდისათვის,

³²და ხუთი ძელაკი სავანის მეორე გვერდის ძელთათვის, დასავლეთით.

³³და გააკეთა შუა ძელაკი გასაყრელად ძელთა შუაგულში ერთი ბოლოდან მეორემდე.

³⁴ძელები მოჭედა ოქროთი და მათი რგოლებიც. სათავსები ძელაკებისათვის გააკეთა ოქროსგან და ისინიც მოჭედა ოქროთი.

³⁵და გააკეთა ფარდა ცისფერი, ძოწეული, ჭიაფერი და გრეხილი ბისონისგან. ოსტატური ნაკეთობით გააკეთა მასზე ქერუბიმები.

³⁶და გაუკეთა მას ოთხი სვეტი აკაციისა და მოჭედა ისინი ოქროთი და ოქროს დუგმებით. და ჩამოასხა მათთვის ოთხი კვარცხლბეკი ვერცხლისა.

³⁷და გააკეთა ფარდა კარვის შესასვლელთან ცისფერი, ძოწეული, ჭიაფერი და გრეხილი ბისონისგან, მქარგავის ნაკეთობით.

³⁸და ხუთი სვეტი მისთვის დუგმებით. და მოჭედა მათი თხემები და მათი რკალები ოქროთი. მათი ხუთი კვარცხლბეკი სპილენძისაგან იყო.