Read ბიბლია გამ. 38 Bible Online

გამ. 38 - ბიბლია bible

გამ. 38

¹და გააკეთა სამსხვერპლო სრულადდასაწველისა აკაციის ხეთაგან: ხუთი წყრთა სიგრძე და ხუთი წყრთა სიგანე, ოთხკუთხედი; და სამი წყრთა სიმაღლე;

²და გაუკეთა რქები მას ოთხ კუთხეზე, მისგანვე იყო მისი რქები და მოჭედა იგი სპილენძით.

³და გააკეთა ყოველი ჭურჭელი სამსხვერპლოსი: ქოთნები და აქანდაზები, და სასხურებლები, ჩანგლები და საცეცხლურები. ყველა მისი ჭურჭელი სპილენძისაგან გააკეთა.

⁴და გააკეთა სამსხვერპლოსათვის ცხაური, ბადისებრი ნახელავი, სპილენძისაგან, მის კიდეზე, ქვემოდან მის ნახევრამდე.

⁵და ჩამოასხა ოთხი რგოლი სპილენძის ცხაურის ოთხი კუთხისათვის კეტების გასაყრელად.

⁶და გააკეთა კეტები აკაციის ხეთაგან და მოჭედა ისინი სპილენძით.

⁷და გაუყარა კეტები რგოლებში სამსხვერპლოს ფერდებზე, რათა ეტარებინათ იგი მათი მეშვეობით. ღრუ გააკეთა იგი ფიცრებისგან.

⁸და გააკეთა საბანელი სპილენძისა და მისი კვარცხლბეკიც სპილენძისა ქალების სარკეებით, რომლებიც მსახურებას ეწეოდნენ საკრებულო კარვის შესასვლელთან.

⁹და გააკეთა ეზო ნეგების, სამხრეთის, მიმართულებით. ეზოს ფარდა გრეხილი ბისონისაგან იყო, ასი წყრთა,

¹⁰მათი ოცი სვეტი და მათი სპილენძის ოცი კვარცხლბეკი; დუგმები სვეტებისა და მათი სალტეები — ვერცხლისა.

¹¹და ჩრდილოეთის მხრიდან [ფარდები] — ასი წყრთა. მათთვის გაკეთდა ოცი სვეტი და მათი ოცი კვარცხლბეკი სპილენძისა. დუგმები სვეტებისა და მათი სალტეები ვერცხლისა.

¹²და დასავლეთის მხრიდან — ფარდები ორმოცდაათი წყრთა. მათთვის ათი სვეტი და ათი კვარცხლბეკი. სვეტთა დუგმები და მათი სალტეები ვერცხლისა.

¹³და წინა მხრიდან აღმოსავლეთისაკენ — [ფარდები] ორმოცდაათი წყრთა.

¹⁴ფარდები თხუთმეტი წყრთისა ეზოს ერთი მხრისათვის. მათთვის სამი სვეტი და სამი კვარცხლბეკი.

¹⁵და მეორე მხრისათვის ეზოს კარიბჭის აქეთ-იქიდან თხუთმეტი წყრთა ფარდა. სამი სვეტი და სამი კვარცხლბეკი.

¹⁶ეზოს ირგვლივ ყველა ფარდა გრეხილი ბისონისა იყო.

¹⁷სვეტების კვარცხლბეკები სპილენძისა იყო, სვეტების დუგმები და მათი რკალები — ვერცხლისა, და მათი თხემთა ჭედურობაც ვერცხლისა. და ვერცხლის სალტეებით იყო შეერთებული ეზოს ყოველი სვეტი.

¹⁸და ეზოს კარიბჭის ფარდა იყო მქარგავის ნაკეთობა, ცისფერი, ძოწეული, ჭიაფერი და გრეხილი ბისონისაგან. ოცი წყრთა სიგრძით, ხუთი წყრთა სიმაღლით მთელ მანძილზე, ეზოს ფარდების მსგავსად.

¹⁹მათი ოთხი სვეტი და მათი ოთხი კვარცხლბეკი სპილენძისა იყო. და მათი დუგმები — ვერცხლისა და მათ თხემთა ჭედურობაც და რკალებიც — ვერცხლისა.

²⁰და ყოველი პალო კარვისა და ეზოს ირგვლივ სპილენძისა იყო.

²¹ეს არის აღრიცხვა სავანისა, მოწმობის სავანისა, რომელიც დაანგარიშებულ იქნა მოსეს ბრძანებით, ლევიანთა შრომით, ითამარ მღვდლის — აარონის ძის, ზედამხედველობით.

²²და ბეცალელმა, ძემ ურისა, ძისა ხურისა, იუდას ტომიდან, გააკეთა ყოველივე, რაც უბრძანა უფალმა მოსეს.

²³და მასთან იყო აჰოლიაბიც, ძე ახისამაქისა, დანის ტომიდან, მეჩუქურთმე და ოსტატი მქსოველი და მქარგავი ცისფერ, ძოწეულ, ჭიაფერსა და ბისონზე.

²⁴მთელი ოქრო, რაც დაიხარჯა საწმიდრის ყოველ საქმეზე, იყო ოქრო შემოწირული: ოცდაცხრა ტალანტი და შვიდას ოცდაათი შეკელი, საწმიდრის შეკელით.

²⁵ხოლო თემის აღრიცხულ პირთაგან ვერცხლი — ასი ტალანტი და ათას შვიდას სამოცდათხუთმეტი შეკელი — საწმიდრის შეკელით.

²⁶სულზე თითო ბეკაყი, ანუ ნახევარი შეკელი, საწმიდრის შეკელით, ყველასგან, ვინც გაიარა აღრიცხვა, ოცი წლიდან და ზევით, სულ ექვსას სამი ათას ხუთას ორმოცდაათი.

²⁷და იყო ასი ტალანტი ვერცხლი საწმიდრის კვარცხლბეკთა ჩამოსასხმელად და ფარდის კვარცხლბეკთათვის. ასი კვარცხლბეკი ასი ტალანტიდან, თითო ტალანტი კვარცხლბეკისათვის.

²⁸და ათას შვიდას სამოცდათხუთმეტი შეკელიდან მან გააკეთა დუგმები სვეტებისათვის და მოავარაყა მათი თხემები და შეაერთა ისინი სალტეებით.

²⁹და სპილენძი შერხევის შესაწირავისა — სამოცდაათი ტალანტი და ორი ათას ოთხასი შეკელი.

³⁰და გააკეთა მისგან საკრებულო კარვის შესასვლელის კვარცხლბეკები და სპილენძის სამსხვერპლო, და სპილენძის ცხაური მისთვის, და ყოველი ჭურჭელი სამსხვერპლოსი.

³¹და კვარცხლბეკები ეზოს ირგვლივ, და კვარცხლბეკები ეზოს კარიბჭისათვის, და ყოველი პალო სავანისა და ყოველი პალო ეზოს ირგვლივ.