Read ბიბლია გამ. 39 Bible Online

გამ. 39 - ბიბლია bible

გამ. 39

¹ცისფერი, ძოწეული და ჭიაფერისაგან დაამზადეს საწესო შესამოსელი წმიდა სამსახურისათვის, და დაამზადეს წმიდა შესამოსელი აარონისათვის, როგორც უბრძანა უფალმა მოსეს.

²და დაამზადეს ეფოდი ოქროსაგან, ცისფერი, ძოწეული, ჭიაფერი და გრეხილი ბისონისაგან.

³და გამოჭედეს ოქროს ფურცლები, და დახიეს ძაფებად, ჩასაქსოვად ლურჯ, ძოწეულ, ჭიაფერ და ბისონის ძაფებთან ერთად, ოსტატური ნაკეთობით.

⁴შემაერთებელი სამხრეები გაუკეთეს მას. მის ორივე კიდეზე იყო შეერთებული.

⁵და მისი ეფოდის სარტყელი, რომელიც მის ზემოთ იყო, იმავე ნაკეთობისა იყო: ოქროსაგან, ცისფერი, ძოწეული, ჭიაფერი და გრეხილი ბისონისაგან, როგორც უბრძანა უფალმა მოსეს.

⁶და დაამუშავეს სარდიონის ქვები, ჩასვეს ისინი ოქროს ბუდეში და საბეჭდავის ტვიფარივით ამოტვიფრეს ისრაელის ძეთა სახელები.

⁷და მიამაგრა ისინი ეფოდის სამხრეებს სამახსოვრო ქვებად ისრაელის ძეთათვის, როგორც უბრძანა უფალმა მოსეს.

⁸და გააკეთა სამკერდული ოსტატური ნაკეთობით, მსგავსი ეფოდის ნაკეთობისა ოქროსაგან, ცისფერი, ძოწეული, ჭიაფერი და გრეხილი ბისონისაგან.

⁹ოთხკუთხედი იყო იგი. ორმაგი გააკეთეს სამკერდული — სიგრძით მტკაველი და სიგანით მტკაველი, ორმაგი.

¹⁰და ჩასვეს მასში ქვათა ოთხი მწკრივი: მწკრივი ლალისა, ტოპაზისა და ბივრილისა — ერთი მწკრივი.

¹¹მეორე მწკრივი: ზურმუხტისა, საფირონისა და ალმასისა.

¹²და მესამე მწკრივი: იაგუნდისა, აქატისა და ამეთვისტოსი.

¹³და მეოთხე მწკრივი: ქრიზოლითისა, სარდიონისა და იასპისა, მოჩარჩოებული ოქროს ბუდეებით, თავიანთი მოჭედილობით.

¹⁴და ეს ქვები ისრაელის ძეთა სახელებზე იყო, თორმეტი იყო მათი სახელების მიხედვით, საბეჭდავი ტვიფრით ამოტვიფრული, თითოეული თავის სახელით, თორმეტი ტომისთვის.

¹⁵და გაუკეთეს სამკერდულს გრეხილი ძეწკვები წნული ნაკეთობით, წმიდა ოქროსი.

¹⁶და გააკეთეს ოქროს ორი ბუდე და ოქროს ორი რგოლი, და მიამაგრეს ორივე რგოლი სამკერდულის ორ კიდეს.

¹⁷და გაუყარეს ოქროს ორივე წნული ორივე რგოლში სამკერდულის კიდეებზე.

¹⁸და ორივე წნულის ორივე კიდე მიამაგრეს ორივე ბუდეს, და მიამაგრეს ისინი ეფოდის სამხრეებს წინიდან.

¹⁹და გააკეთეს ორი რგოლი ოქროსი და მიამაგრეს სამკერდულის ორ კიდეს იმ არშიაზე, რომელიც ეფოდის შიდა მხარეს არის მოქცეული.

²⁰და გააკეთეს ოქროს ორი რგოლი და დაამაგრეს ისინი ეფოდის ორივე სამხრეზე ქვემოდან, მისი წინა მხრიდან, მისი ნაწიბურის პირდაპირ, ეფოდის სარტყელზე, ზემოდან.

²¹და მიაბნიეს სამკერდული თავის რგოლებს, ეფოდის რგოლებს ცისფერი ზონრით, რათა იყოს ეფოდის სარტყელზე და არ სცილდებოდეს სამკერდული ეფოდს, როგორც უბრძანა უფალმა მოსეს.

²²და გაუკეთა ეფოდს მოსასხამი მქსოველის ნაკეთობით, მთლიანად ცისფერი ქსოვილისაგან.

²³და ჭრილი მოსასხამის შუაში იყო, ჯაჭვის პერანგის ჭრილივით, შემოკერილი მისი ჭრილის ირგვლივ, რომ არ შემორღვეულიყო.

²⁴და გაუკეთეს მოსასხამის კალთებს ბროწეულები ცისფერი, ძოწეული, ჭიაფერი ქსოვილისა და გრეხილი ბისონისაგან.

²⁵და გააკეთეს წმიდა ოქროს ეჟვნები, და ჩამოჰკიდეს ეჟვნები ბროწეულთა შორის მოსასხამის კალთებს ირგვლივ.

²⁶ეჟვანი და ბროწეული, ეჟვანი და ბროწეული მოსასხამის კალთებს ირგვლივ მსახურებისათვის, როგორც უბრძანა უფალმა მოსეს.

²⁷და დაუმზადეს კვართები ბისონისა, მქსოველის ნაკეთობით, აარონსა და მის ძეებს.

²⁸და დოლბანდი ბისონისა, და თავსაბურველის სამკაულები ბისონისა, და სელის შარვალი გრეხილი ბისონისა.

²⁹და სარტყელი გრეხილი ბისონისა და ცისფერი, ძოწეული და ჭიაფერი ქსოვილისაგან, მქარგავის ნაკეთობით, როგორც უბრძანა უფალმა მოსეს.

³⁰და გაუკეთეს ფირფიტა წმიდა ოქროსი, წმიდა გვირგვინი და ამოტვიფრეს მასზე წარწერა, როგორც საბეჭდავის ტვიფარზე: „სიწმიდე უფლისა.“

³¹და მიამაგრეს მას ცისფერი ზონარი, რათა მიებნიათ იგი დოლბანდზე ზემოდან, როგორც უბრძანმა უფალმა მოსეს.

³²და ასე დასრულდა საკრებულო კარვის ყოველი სამუშაო. და გააკეთეს ისრაელის ძეთ ყოველივე; როგორც უბრძანა უფალმა მოსეს. ისე გააკეთეს.

³³და მიიტანეს სავანე მოსესთან, კარავი და ყოველი მისი მოწყობილობა, მისი დუგმები, მისი ძელები, მისი ძელაკები, მისი სვეტები და მისი კვარცხლბეკნი.

³⁴და საბურველი ვერძთა ალისფერი ტყავისა და საბურველი მაჩვის ტყავებისა და ფარდა.

³⁵კიდობანი მოწმობისა და კეტები მისი, და თავსარქველი.

³⁶ტაბლა, მთელი მისი მოწყობილობა და საწინაშეო პური.

³⁷სასანთლე ხალასი ოქროსი, მისი კანდელები, ზედ გამწკრივებული კანდელები, და მთელი მისი მოწყობილობა და ზეთი გასანათებლად.

³⁸და ოქროს სამსხვერპლო და ზეთი, და კეთილსურნელება საკმევლისა და ფარდა კარვის შესასვლელის.

³⁹სპილენძის სამსხვერპლო და მისი სპილენძის ცხაური, მისი კეტები და ყოველი მისი მოწყობილობა და საბანელი და მისი კვარცხლბეკი.

⁴⁰ეზოს ფარდები, მისი სვეტები და მისი კვარცხლბეკები, ეზოს კარიბჭის ფარდები, მისი თოკები და მისი პალოები და ყოველი მოწყობილობა კარავში სამსახურებლად, საკრებულო კარვისათვის.

⁴¹საწესო შესამოსელნი წმიდაში სამსახურებლად, წმიდა შესამოსელნი აარონ მღვდლისათვის, და შესამოსელნი მისი ძეებისა, მღვდლობის გასაწევად.

⁴²ყოველივე, როგორც უფალმა უბრძანა მოსეს, ისე შეასრულეს ისრაელის ძეთ, მთელი სამუშაო.

⁴³და ნახა მოსემ ყოველი საქმე, და აჰა, გაუკეთებიათ იგი. როგორც უბრძანა უფალმა, ისე გააკეთეს. და აკურთხა ისინი მოსემ.