Read ბიბლია გამ. 40 Bible Online

გამ. 40 - ბიბლია bible

გამ. 40

¹და უთხრა უფალმა მოსეს:

²„პირველი თვის პირველ დღეს დადგი საკრებულო კარავი.

³და დადგი იქ კიდობანი მოწმობისა, და ჩამოაფარე კიდობანს ფარდა.

⁴და შეიტანე ტაბლა, და განალაგე მასზე მისი საგნები, და შეიტანე სასანთლე და დადგი ზედ მისი კანდელები.

⁵და დადგი ოქროს სამსხვერპლო საკმევლისათვის მოწმობის კიდობნის წინ, და ჩამოჰკიდე ფარდა სავანის შესასვლელთან.

⁶და დადგი სამსხვერპლო სრულადდასაწველისა საკრებულო კარვის შესასვლელის წინ.

⁷და დადგი საბანელი საკრებულო კარავსა და სამსხვერპლოს შორის და ჩაასხი შიგ წყალი.

⁸და მოაწყვე ეზო ირგვლივ და ჩამოჰკიდე ფარდა ეზოს კარიბჭეზე.

⁹აიღე ზეთი და სცხე სავანეს და ყოველივეს, რაც მასშია, და წმიდა ჰყავ იგი და ყოველი მისი ჭურჭელი და წმიდა იქნება.

¹⁰და სცხე სრულადდასაწველის სამსხვერპლოს და ყოველ მის ჭურჭელს, და წმიდა ჰყავ სამსხვერპლო, და წმიდათა წმიდა იქნება სამსხვერპლო.

¹¹და სცხე საბანელს და მის კვარცხლბეკს და წმინდა ჰყავ იგი.

¹²და მიიყვანე აარონი და მისი ძენი საკრებულო კარვის შესასვლელთან, და განბანე ისინი წყლით.

¹³და შემოსე აარონი წმიდა შესამოსლით, და სცხე მას, და წმიდა ჰყავ იგი, რათა მღვდლობა გამიწიოს.

¹⁴და მისი ძენი მოიყვანე და შემოსე ისინი კვართებით.

¹⁵და სცხე მათ, როგორც სცხე მათ მამას, რათა მღვდლობა გამიწიონ, და იყოს მათი ცხება საუკუნო მღვდლობად მათ თაობებში!“

¹⁶და გააკეთა მოსემ ყოველივე, როგორც უბრძანა უფალმა მას.

¹⁷და მეორე წლის პირველ თვეს, თვის პირველ დღეს, აღმართულ იქნა სავანე.

¹⁸და აღმართა მოსემ სავანე, და დადგა მისი კვარცხლბეკები, და აღმართა მისი ძელები, და დააყენა მისი ძელაკები, და აღმართა მისი სვეტები.

¹⁹და გადააფარა საფარველი სავანეს და დაადო საფარველის საბურველი ზემოდან, როგორც უბრძანა უფალმა მოსეს.

²⁰და აიღო და ჩადო მოწმობა კიდობანში, და გაუყარა კეტები კიდობანს და დაადგა სარქველი კიდობანს ზემოდან.

²¹და შეიტანა კიდობანი სავანეში, და ჩამოჰკიდა ფარდა და დაფარა კიდობანი მოწმობისა, როგორც უბრძანა უფალმა მოსეს.

²²და დადგა ტაბლა საკრებულო კარავში, კარვის ჩრდილოეთ მხარეს, ფარდის გარეთ.

²³და დააწყო მასზე პური წყობით უფლის წინაშე, როგორც უბრძანა უფალმა მოსეს.

²⁴და დადგა სასანთლე საკრებულო კარავში ტაბლის პირისპირ, სავანის სამხრეთ მხარეს.

²⁵და აანთო კანდელები უფლის წინაშე, როგორც უბრძანა უფალმა მოსეს.

²⁶და დადგა ოქროს სამსხვერპლო საკრებულო კარავში ფარდის წინ.

²⁷და აკმია მასზე სურნელოვანი საკმეველი, როგორც უბრძანა უფალმა მოსეს.

²⁸და ჩამოჰკიდა ფარდა სავანის შესასვლელში.

²⁹და დადგა სრულადდასაწველის სამსხვერპლო საკრებულო კარვის სავანის შესასვლელში, და აღავლინა მასზედ სრულადდასაწველი და ძღვენი პურისა, როგორც ნაბრძანები ჰქონდა უფალს მოსესთვის.

³⁰და დადგა საბანელი საკრებულო კარავსა და სამსხვერპლოს შორის, და ჩაასხა შიგ წყალი განსაბანად.

³¹და განიბანეს მასში მოსემ და აარონმა და მისმა ძეებმა ხელები და ფეხები.

³²საკრებულო კარავში შესვლისას, ან სამსხვერპლოსთან მიახლოებისას განიბანებოდნენ ისინი, როგორც ნაბრძანები ჰქონდა უფალს მოსესთვის.

³³და მოაწყო ეზო სავანესა და სამსხვერპლოს ირგვლივ, და ჩამოჰკიდა ფარდა ეზოს კარიბჭეზე. და დაასრულა მოსემ საქმე. ღრუბელმა აღავსო საკრებულო კარავი

³⁴და დაჰფარა ღრუბელმა საკრებულო კარავი, და უფლის დიდებამ აღავსო სავანე.

³⁵და ვერ შევიდა მოსე საკრებულო კარავში, რადგან დაივანა მასზე ღრუბელმა და უფლის დიდებამ აღავსო სავანე.

³⁶როცა ასცილდებოდა სავანეს ღრუბელი, აიყრებოდნენ ხოლმე ისრაელის ძენი ყოველი მათი აყრისას.

³⁷და თუ არ ასცილდებოდა ღრუბელი, არ აიყრებოდნენ იმ დღემდე, როცა ასცილდებოდა.

³⁸რადგან უფლის ღრუბელი იყო სავანეზე დღისით, და ცეცხლი იყო შიგ ღამით ისრაელის მთელი სახლის თვალწინ, როცა კი აიყრებოდნენ.