Read ბიბლია გამ. 9 Bible Online

გამ. 9 - ბიბლია bible

გამ. 9

¹და უთხრა უფალმა მოსეს: „მიდი ფარაონთან და უთხარი, ასე თქვა-თქო უფალმა, ებრაელთა ღმერთმა: ‘გაუშვი ჩემი ხალხი, რათა მემსახუროს.

²თუ უარს იტყვი გაშვებაზე და კვლავ დააკავებ მას,

³აჰა, უფლის ხელი იქნება შენს ჯოგზე, რომელიც ველზეა — ცხენებზე, სახედრებზე, აქლემებზე, მსხვილფეხა და წვრილფეხა საქონელზე. გაჩნდება ძალზე მძიმე ჭირი.

⁴და გაარჩევს უფალი ისრაელის ჯოგსა და ეგვიპტის ჯოგს, და არ გაწყდება არაფერი, რაც ისრაელის ძეთ ჰყავთ.“

⁵დანიშნა უფალმა დრო და თქვა: „ხვალ გააკეთებს უფალი ამას ამ ქვეყანაში.“

⁶და გააკეთა უფალმა ეს საქმე მეორე დღეს, და ამოწყდა მთელი ჯოგი ეგვიპტისა. და ისრაელის ძეთა ჯოგიდან არ მომკვდარა არც ერთი.

⁷და გაგზავნა ფარაონმა შესატყობად და აჰა, ისრაელის ჯოგიდან არ მომკვდარა არც ერთი. და გამძვინვარდა გული ფარაონისა და არ გაუშვა ხალხი.

⁸და უთხრა მოსემ უფალს და აარონს: „აიღეთ სავსე პეშვი ჭვარტლი ღუმლიდან და ააფრქვიოს იგი მოსემ ზეცისკენ ფარაონის თვალწინ.

⁹და იქცევა მტვრად ეგვიპტის მთელ ქვეყანაზე, და გაუჩნდება კაცსა და პირუტყვს გამონაყარი ჩირქოვან მუწუკებად ეგვიპტის მთელ ქვეყანაზე.“

¹⁰და აიღეს ჭვარტლი ღუმლიდან და წარდგნენ ფარაონის წინაშე და ააფრქვია ის მოსემ ზეცისკენ და გაუჩნდა გამონაყარი ჩირქოვან მუწუკებად კაცსა და პირუტყვს.

¹¹და ვერ შეძლეს გრძნეულებმა დგომა მოსეს წინაშე გამონაყარის გამო, რადგან გამონაყარი იყო გრძნეულებზეც და ყოველ ეგვიპტელზე.

¹²და გაამძვინვარა უფალმა გული ფარაონისა, და არ ისმინა მათი, როგორც ნათქვამი ჰქონდა უფალს მოსესთვის.

¹³და უთხრა უფალმა მოსეს: ადექი დილაადრიან, და დადექი ფარაონის წინაშე, და უთხარი მას: ასე თქვა-თქო უფალმა, ებრაელთა ღმერთმა: ‘გაუშვი ჩემი ხალხი, რათა მემსახუროს.

¹⁴თორემ ამჯერად შევყრი ყველა ჩემს სენს შენს გულს, შენს მსახურებსა და შენს ხალხს, რათა გაიგო, რომ არავინაა ჩემი მსგავსი მთელს ქვეყანაზე.

¹⁵რადგან, ახლა რომ გამეწოდა ჩემი ხელი, ხომ მოგსრავდით შენ და შენს ხალხს შავი ჭირით, და წაიშლებოდი ქვეყნიდან.

¹⁶მაგრამ იმისათვის დაგარჩინე, რომ გაჩვენო ჩემი ძალა, რომ აუწყო ჩემი სახელი მთელ ქვეყანას.

¹⁷შენ კვლავ ეწინააღმდეგები ჩვენს ხალხს და არ უშვებ მას.

¹⁸აჰა, დავცხებ ხვალ ამ დროს ძალზე მაგარ სეტყვას, რომლის მსგავსიც არ ყოფილა ეგვიპტეში დღიდან მისი დაფუძნებისა აქამდე.

¹⁹ახლა კი გაგზავნე და შეკრიბე შენი ჯოგი და რაც მინდვრადა გყავს. ყოველი ადამიანი და პირუტყვი, რომელიც დარჩება ველზე და არ შეეფარება სახლს, დაისეტყვება და მოკვდება“.

²⁰ვისაც უფლის სიტყვისა შეეშინდა ფარაონის მსახურთაგან, თავისი მსახურნი და თავისი ჯოგი სახლებში შერეკა.

²¹ხოლო ვინც არ მიაპყრო გული უფლის სიტყვას, თავისი ჯოგი ველზე დატოვა.

²²და უთხრა უფალმა მოსეს: „გაიწოდე ხელი ცისაკენ და დაისეტყვება ეგვიპტის მთელი ქვეყანა — ადამიანები, პირუტყვი და ველის ყოველი ბალახი ეგვიპტის ქვეყანაში“.

²³გაიწოდა მოსემ თავისი კვერთხი ზეცისაკენ და გამოსცა უფალმა გრგვინვა და სეტყვა, და წამოვიდა ცეცხლი ქვეყანაზე და დასეტყვა უფალმა ეგვიპტის ქვეყანა.

²⁴მოდიოდა სეტყვა და ცეცხლი გიზგიზებდა სეტყვაში, ძლიერი იყო იგი, მისი მსგავსი არ ყოფილა ეგვიპტელთა მთელ ქვეყანაში, იმ დღიდან, რაც იქ ხალხი დასახლდა.

²⁵და გაანადგურა სეტყვამ ეგვიპტის მთელ ქვეყანაზე ყველაფერი, რაც მინდვრად იყო ადამიანიდან პირუტყვამდე. და ყოველი ბალახი ველისა გაანადგურა სეტყვამ, და ყოველი ხე ველისა დალეწა.

²⁶მხოლოდ გოშენის ქვეყანაში, სადაც ისრაელის ძენი იყვნენ, არ მოსულა სეტყვა.

²⁷და გაგზავნა ფარაონმა, და მოუხმო მოსეს და აარონს, და უთხრა მათ: „ამჯერად მე შევცოდე. უფალი მართალია, მე და ჩემი ხალხი კი — დამნაშავენი.

²⁸შეევედრეთ უფალს და დაცხრეს ღვთის გრგვინვა და სეტყვა, და გაგიშვებთ, მეტს აღარ დაგაყოვნებთ.“

²⁹და უთხრა მას მოსემ: „ქალაქიდან გასვლისას გავიწვდი ხელებს უფლისაკენ, გრგვინვა დაცხრება და სეტყვა აღარ იქნება, რათა გაიგო, რომ უფლისაა ქვეყანა.

³⁰მაგრამ შენ და შენს მსახურებს, ვიცი, ჯერაც არ შეგეშინდებათ უფალი ღმერთისა.“

³¹სელი და ქერი განადგურდა, რადგან ქერი ამოთავთავებული იყო, სელი კი — აყვავებული.

³²ხოლო ხორბალი და ასლი არ განადგურდა, რადგან გვიანებია ისინი.

³³და გავიდა მოსე ფარაონისგან ქალაქგარეთ, და გაიწოდა ხელები უფლისაკენ. გრგვინვა და სეტყ-ვა შეწყდა და წვიმა აღარ იღვრებოდა მიწაზე.

³⁴და დაინახა ფარაონმა, რომ შეწყდა წვიმა და სეტყვა, და გრგვინვა, და კვლავ შესცოდა. და დაიმძიმეს თავიანთი გულები მან და მისმა მსახურებმა.

³⁵გამძვინვარდა გული ფარაონისა და არ გაუშვა ისრაელის ძენი, როგორც ნათქვამი ჰქონდა უფალს მოსეს პირით.