Read ბიბლია იობ. 13 Bible Online

იობ. 13 - ბიბლია bible

იობ. 13

¹„აჰა, ეს ყოველივე ჩემმა თვალმა იხილა, ჩემმა ყურმა ისმინა და გაიგო.

²რაც თქვენ იცით, მეც ვიცი, არც მე ვარ თქვენზე უარესი.

³მაინც დაველაპარაკებოდი ყოვლადძლიერს, და სამხილს მოვახსენებდი ღმერთს.

⁴თქვენ კი სიცრუის მგლესავები ხართ, ყველანი უვარგისი მკურნალები ხართ!

⁵ნეტავ დუმილით მაინც დადუმდებოდეთ! და ეს იქნებოდა თქვენი სიბრძნე.

⁶გთხოვთ, ისმინეთ ჩემი სამხილი და გაიგონეთ ჩემი ბაგეების საჩივარი!

⁷ღვთის გულისათვის იტყვით ტყუილს? მისი გულისთვის იტყვით სიცრუეს?

⁸მიკერძოებას გამოიჩენთ მის მიმართ? ღმერთს გამოესარჩლებით?

⁹კარგი იქნება, რომ გამოგჩხრიკოთ? კაცი კაცს რომ ატყუებს, ისე მოატყუებთ მას?

¹⁰ის კიცხვით გაგკიცხავთ, მალულად თუ გამოიჩენთ მიკერძოებას.

¹¹ნუთუ არ შეგეშინდებათ მისი სიდიადისა და მისი შიში თავს არ დაგატყდებათ?

¹²თქვენი შეგონებანი ნაცრის არაკებია, თქვენი სიმაგრეები თიხის სიმაგრეებია.

¹³დადუმდით ჩემს წინაშე და მალაპარაკეთ, და მერე, რაც მომივა, მომივიდეს.

¹⁴რად უნდა ვზიდო ჩემი ხორცი ჩემი კბილით? ხელში რად უნდა ჩავიდო ჩემი სული?

¹⁵რომ მომკლას კიდეც, მაინც მისი იმედი მექნება, მაინც დავიცავ ჩემს გზებს მის წინაშე.

¹⁶ესეც ჩემი ხსნა იქნება, რადგან უღვთო კაცი ვერ მივა მის წინაშე.

¹⁷სმენით ისმინეთ ჩემი სიტყვა, ყური უგდეთ ჩემს ნათქვამს!

¹⁸აჰა, სამსჯავროსთვის გამიმზადებია ჩემი სარჩელი! ვიცი, რომ გავმართლდები.

¹⁹ვინ არის ჩემი მოდავე? რადგან მაშინ დავდუმდებოდი და მოვკვდებოდი!

²⁰ოღონდ ორ რამეს ნუ მიზამ, და შენს სახეს არ დავემალები:

²¹შენი ხელი მომარიდე და შენი შიშის ზარი ნუ შემაძრწუნებს.

²²მაშინ მიხმე და მე პასუხს გაგცემ, ან მე ვილაპარაკებ და შენ მიპასუხე!

²³რამდენი ბრალი და ცოდვა მაწევს? მაცოდინე ჩემი დანაშაული და ჩემი ცოდვა!

²⁴რად მალავ სახეს? შენს მტრად რადა მთვლი?

²⁵მოფარფატე ფოთოლს აფრთხობ და ხმელ ჩალას დევნი?

²⁶რადგან მწარე ამბებს სწერ ჩემზე და მამკვიდრებინებ სიჭაბუკის ცოდვებს,

²⁷ხუნდებში მაყოფინებ ფეხებს, უდარაჯებ ყველა ჩემს ბილიკს, და ნიშანს მასვამ.

²⁸ის კი იხრწნება, როგორც მძორი, როგორც ჩრჩილისგან დაჭმული სამოსელი.“