Read ბიბლია იობ. 15 Bible Online

იობ. 15 - ბიბლია bible

იობ. 15

¹და მიუგო ელიფაზ თემანელმა და თქვა:

²„განა თავქარიანად უნდა პასუხობდეს ბრძენკაცი? განა აღმოსავლეთის ხორშაკით უნდა ივსებდეს მუცელს?

³უნდა დაობდეს უსარგებლო ლაპარაკით ან სიტყვებით, რომლებშიც ხეირი არა ყრია რა?

⁴შენ აქარწყლებ ღვთისმოშიშებას, და აბრკოლებ ლოცვას ღვთის წინაშე,

⁵რადგან შენი უკეთურება წვრთნის შენს ბაგეს და ცბიერთა ენა აგირჩევია.

⁶შენივე პირი გამტყუნებს, მე კი არა, და შენი ბაგენი მოწმობენ შენს წინააღმდეგ.

⁷პირველშობილი ხომ არა ხარ კაცთა შორის, და ბორცვებზე უწინარეს ხომ არ შექმნილხარ?

⁸ღვთის საიდუმლო ხომ არ მოგისმენია და სიბრძნე ხომ არ მოგიხვეჭია?

⁹ისეთი რა იცი, ჩვენ რომ არ ვიცოდეთ? რას ხვდები ისეთს, ჩვენ რომ ვერ მივმხვდარვართ?

¹⁰ჩვენს შორის თმაჭაღარაც არის და მოხუცებულიც, მამაშენს რომ აღემატება დღეებით.

¹¹გეცოტავება ღვთის ნუგეში და თვინიერი სიტყვა, შენთან მოუბარი?

¹²სხვაგან რად მიგიწევს გული, და რად აფახულებ თვალებს?

¹³ღმერთის წინააღმდეგ რომ მიმართავ შენს სულს და ასეთი სიტყვები ამოგდის პირიდან?

¹⁴რა არის კაცი, რომ სუფთა იყოს, ან მართალი იყოს დედაკაცის ნაშობი?

¹⁵აჰა, თავისი წმიდებსაც არ ერწმუნება იგი, და მის თვალში ზეცაც კი არ არის სუფთა,

¹⁶მეტადრე საძაგელი და გახრწნილია კაცი, წყალივით რომ სვამს უკეთურებას!

¹⁷გეტყვი და მომისმინე, ნანახს მოგიყვები,

¹⁸რაც ბრძენკაცებს სმენიათ და არ დაუმალავთ თავიანთი მამებისგან გაგონილი.

¹⁹მათ, მხოლოდ მათ მიეცათ ქვეყანა, და არ გაუვლია უცხოს მათ შორის.

²⁰იტანჯება ურჯულო მთელი თავისი დღე და მოსწრება, და წელთა რიცხვი დაფარულია მტარვალისათვის,

²¹შიშისზარია მის ყურებში, მშვიდობიანობის დროსაც მას ესხმის დამღუპველი.

²²არ სწამს მას, რომ წყვდიადიდან დაბრუნდება, განწირულია მახვილისათვის.

²³დაწანწალებს ლუკმაპურისთვის, იცის, შავი დღე შერჩება ხელში.

²⁴აძრწუნებს მას იწროება და გასაჭირი, სჯაბნიან მას, მსგავსად საომრად გასული მეფისა.

²⁵რადგან ღვთის წინააღმდეგ აღმართა ხელი და ყოვლადძლიერს აუჯანყდა.

²⁶ეჭრებოდა მას ჯიუტად, თავისი სქელკოპებიანი ფარით,

²⁷რადგან თავისივე ცხიმით დაიფარა სახე და ქონი მოიდო თეძოებზე.

²⁸და დავანებულია აოხრებულ ქალაქებში, მიტოვებულ სახლებში, რომლებიც დასანგრევადაა განწირული.

²⁹ვერ გამდიდრდება და არ გაძლებს მისი დოვლათი, და ფესვს ვერ გაიდგამს მიწაში მათი ნაგრამი.

³⁰ვერ გაექცევა წყვდიადს, ალი დააჭკნობს მის ყლორტებს, და მისი პირის მონაბერით წარიტაცება.

³¹ნუ ირწმუნებს ამაოებას იგი, რადგან ამაოება იქნება მისი საზღაური.

³²უდროოდ გათავდება და მისი ტოტები ვერ ამწვანდება.

³³დაემსგავსება ვაზს, ისვრიმი რომ შეაჭკნა, და

³⁴რადგან ბერწია უღვთოთა კრებული, და ცეცხლი შეჭამს მექრთამეთა კარვებს.

³⁵მუცლად იღებენ სალმობას და შობენ სიავეს და შიგანი მათი ამზადებს სიცრუეს“.