Read ბიბლია იობ. 18 Bible Online

იობ. 18 - ბიბლია bible

იობ. 18

¹და მიუგო ბილდად შუხელმა და თქვა:

²„როდის მორჩებით ყველანი ამ სიტყვებს? იფიქრეთ და მერე ვილაპარაკოთ.

³რატომ ვითვლებით პირუტყვებად და გონებაჩლუნგებად თქვენს თვალებში?

⁴საკუთარმა რისხვამ გსურს დაგღრღნას? შენი გულისთვის ხომ არ უნდა იქნეს მიტოვებული მიწა, და დაიძრას კლდე თავისი ადგილიდან?

⁵ურჯულოთა ნათელიც დაიშრიტება და აღარ აელვარდება ალი მისი ცეცხლისა.

⁶მის კარავში ნათელი ჩამობნელდება და მისი სანთელი მის თავზე ჩაქრება.

⁷შემოკლდება ნაბიჯი მისი ძლიერებისა, და საკუთარი რჩევა დაამხობს მას,

⁸რადგან ფეხებით ბადეშია გახლართული და ხლართებში დაიარება.

⁹მარყუჟს იგი ქუსლით ჰყავს დაჭერილი, და მახეს გაბმული ჰყავს.

¹⁰დამალულია მიწაზე მისი საბელი, და მისთვის დაგებულია ხაფანგი მის ბილიკზე.

¹¹ირგვლივ აფრთხობენ მას საშინელებანი, და ფეხდაფეხ მისდევენ ისინი.

¹²შიმშილი ძალას გამოაცლის, და დაღუპვა მზადაა, მის გვერდითაა.

¹³კანს შეუჭამს ნაწილ-ნაწილ, ასოებს შეუჭამს სიკვდილის პირმშო.

¹⁴ამოიძირკვება თავისი საიმედო კარვიდან, და მას საშინელებათა მეფეს მიჰგვრის.

¹⁵მის კარავში ისაა დავანებული, ვინც მისიანი არაა. და მის საბინადროს გოგირდი გადაეყრება.

¹⁶ქვემოდან ფესვები გაუხმება, მაღლიდან ტოტები დაუჭკნება.

¹⁷და გაქრება მისი სახსენებელი ქვეყნად, და სახელი აღარ ექნება ქუჩაზე.

¹⁸განდევნიან მას ნათლიდან ბნელში, და წუთისოფელს მოსწყვეტენ მას.

¹⁹არც ნაშიერი, არც შთამომავალი არც ნამატი დაურჩება საბინადროში.

²⁰მისი ბედის გამო განცვიფრდებიან დასავლეთში მყოფნი, და აღმოსავლეთში მყოფთ შეიპყრობს ძრწოლა.

²¹სწორედ ასეთია უღვთოთა სავანენი და ეს არის იმის ადგილი, ვინც ღმერთს არა სცნობს.“