Read ბიბლია იობ. 19 Bible Online

იობ. 19 - ბიბლია bible

იობ. 19

¹და მიუგო იობმა და თქვა:

²„როდემდე უნდა მიმწუხრებდეთ სულს და მთრგუნავდეთ მე სიტყვებით?

³უკვე ათჯერ შეურაცხმყავით, და არ გეთაკილებათ, რომ მძრახავთ.

⁴და თუ მე მართლა შევცდი, ჩემი შეცდომა ჩემთანვე რჩება.

⁵თუ თქვენ მართლა ჩემზე დიდად მოგაქვთ თავი და ჩემი დამუნათებით თავი ისე გიჭირავთ, თითქოს მართლები იყოთ,

⁶იცოდეთ, რომ ღმერთმა გამამრუდა და გამხვია თავის ბადეში.

⁷აჰა, ვღაღადებ: ‘ძალადობაა!’ შველას ვითხოვ, მაგრამ არ არის სამართალი.

⁸მან გადამიღობა გზა და ვეღარ გადავსულვარ, მან დააფინა ჩემს ბილიკებს ბნელი.

⁹შემომაძარცვა ჩემი დიდება, და თავიდან გვირგვინი მომხადა.

¹⁰ყოველმხრივ დამაქცია და უკვე მივდივარ, ხესავით ამომიძირკვა სასოება.

¹¹და აღაგზნო ჩემზე თავისი რისხვა. და თავის მტრად შემრაცხა.

¹²ერთად მომადგნენ მისი ურდონი, და გამოთვალეს თავიანთი გზა ჩემს წინააღმდეგ, და ჩემი კარვის ირგვლივ დაიბანაკეს.

¹³ჩემი ძმები ჩამომაშორა, და ჩემი ნაცნობნი გამიუცხოვდნენ.

¹⁴მახლობელნი განმიდგნენ და ნაცნობებმა დამივიწყეს.

¹⁵ჩემ სახლში მოსული გარეულნი და ჩემი სახლის მხევლები უცხოდ მათ თვალში უცხო გავხდი.

¹⁶ჩემს მსახურს ვეძახი და არ მპასუხობს; ვევედრები მას ჩემი პირით.

¹⁷ჩემი სუნთქვა შესძაგდა ჩემს ცოლს, და ჩემი სიმყრალე — დედაჩემის ძეთ.

¹⁸ბავშვებმაც შემიზიზღეს მე, წამოვდგები და აბუჩად მიგდებენ.

¹⁹მომიძულეს ჩემმა სანდო მეგობრებმა და ვინც მიყვარდნენ, მტრად მომეკიდნენ.

²⁰ჩემი ტყავი და ხორცი ჩემს ძვალს მიეკრა ცარიელი ღრძილებიღა დავრჩი.

²¹შემიწყალეთ, ჩემო მეგობრებო, რადგან ღვთის ხელი შემეხო მე!

²²რატომ მდევნით თქვენც, როგორც ღმერთი? და რატომ არ ძღებით ჩემი ხორცით?

²³ნეტავ ჩაიწერებოდეს ჩემი სიტყვები, ნეტავ წიგნში ჩაიბეჭდებოდეს,

²⁴რკინის საჭვრეთლით კლდეზე ამოიკვეთებოდეს სამარადისოდ!

²⁵და მე ვიცი, ცოცხალია ჩემი მხსნელი და საბოლოოდ მიწაზე წამოიმართება.

²⁶მას შემდეგ, რაც ასე შემომეძარცვება კანი ჩემი ხორციდან, ვიხილავ ღმერთს,

²⁷რომელსაც მე თავად ვიხილავ და ჩემი თვალები დაინახავენ მას და არა სხვისი. დამელია თირკმლები ჩემი ჩემს წიაღში.

²⁸თუ იტყვით: ‘რას ვდევნით მას?’ და: ‘საქმის ფესვი ნაპოვნია მასში!’

²⁹გეშინოდეთ მახვილისა, რადგან რისხვას მოაქვს რათა იცოდეთ, რომ არის განკითხვა!“