Read ბიბლია იობ. 35 Bible Online

იობ. 35 - ბიბლია bible

იობ. 35

¹მიუგო ელიჰუმ და თქვა:

²„ნუთუ სამართლიანად მიგაჩნია, რომ ამბობ: ‘ღმერთზე მართალი ვარ?’

³რომ ამბობ: ‘რას მარგებს, რას მომიტანს ჩემი უცოდველობა?’

⁴მე გიპასუხებ შენ და შენს მეგობრებსაც, შენთან ერთად რომ არიან:

⁵ახედე ზეცას და დაინახე, შეხედე ღრუბელს — ისინი შენზე მაღლაა.

⁶თუ შენ შესცოდე, რას დაუშავებ ამით მას? თუ შენს დანაშაულს გაამრავლებ, ამით რას უზამ მას?

⁷თუ შენ მართალი ხარ, რას შემატებ მას? ან რას მიიღებს შენი ხელიდან?

⁸მხოლოდ შენისთანა კაცს ეხება შენი უკეთურება, და ადამის ძეს — შენი სიმართლე.

⁹ბევრი ჩაგვრისაგან ღაღადებენ, შველას ითხოვენ ძლიერის მკლავებიდან.

¹⁰და არავინ ამბობს: ‘სად არის ღმერთი, ჩემი გამჩენი, საგალობელთა ღამით მომძღვნელი,

¹¹რომელიც გვწვრთნის ჩვენ მიწის მხეცებზე მეტად, და განგვაბრძნობს ჩვენ ცის ფრინველებზე მეტად?’

¹²ღაღადებენ იქ ისინი და ის პასუხს არ სცემს, ავკაცთა ამპარტავნების გამო.

¹³ნაცვლად, ამაო ღაღადს არ მოისმენს ღმერთი, და ყოვლადძლიერი არ მოხედავს ამას.

¹⁴თუმცა შენ ამბობ, რომ ვერ ხედავ მას, მაგრამ სამსჯავრო მის წინაშეა, დაელოდე მას.

¹⁵და ახლა, რაკი იგი თავისმა რისხვამ არ მოინახულა, და დიდ რამედ არ ჩააგდებს სისულელეს,

¹⁶ამაოდ ხსნის ბაგეს იობი, და უაზროდ ხარჯავს სიტყვებს.“