Read ბიბლია იობ. 38 Bible Online

იობ. 38 - ბიბლია bible

იობ. 38

¹მაშინ მიუგო უფალმა იობს გრიგალიდან და უთხრა:

²„ვინ არის ეს, უგუნური სიტყვებით განგებას რომ აბნელებს, იმ საგნებზე რომ ლაპარაკობს, რაც არ ესმის?

³წელი შემოისარტყლე კაცურად, მე შეგეკითხები და შენ პასუხი გამეცი:

⁴შენ სად იყავი, დედამიწას რომ ვაფუძნებდი? მითხარი, თუ გაქვს გაგება,

⁵ვინ დაადგინა მისი ზომები, თუ იცი? ან ვინ გადაჭიმა მასზე ლარი?

⁶რაზე დგას მისი საძირკველი? ან ვინ დადო მისი ქვაკუთხედი,

⁷როცა გალობდნენ დილის ვარსკვლავები, და ღვთის ძენი ყიჟინებდნენ?

⁸ვინ ჩაუკეტა ზღვას კარიბჭეები, როცა ამოხეთქა, როგორც საშოდან?

⁹როცა ღრუბელი მივეცი სამოსლად და წყვდიადი — სახვევებად?

¹⁰როცა დავუდგინე მას ჩემი წესი და დავუტანე ურდული და ბჭენი?

¹¹და ვუთხარი: ‘აქამდე მოხვალ და მეტს არა. აქ უნდა შედგნენ შენი ზვიადი ზვირთები?’

¹²შენს დღეში თუ გიბრძანებია დილისათვის და გიუწყებია ცისკრისთვის მისი ადგილი,

¹³რომ მოეცვა ქვეყნის კიდეები და უკეთურნი განეფერთხა მისგან?

¹⁴იგი იცვლება, როგორც თიხა საბეჭდავის ქვეშ, და ისინი დგანან, როგორც სამოსელი.

¹⁵და წაერთმევათ უკეთურთ მათი ნათელი, და შემართული მკლავი შეიმუსრება.

¹⁶თუ ჩაგიღწევია ზღვის წყაროებამდე, და თუ გივლია უფსკრულის ფსკერზე?

¹⁷თუ გახსნილან შენს წინაშე სიკვდილის ბჭენი, და ბნელეთის ბჭენი თუ გინახავს?

¹⁸თუ განგიცდია დედამიწის სიგრძე-სიგანე? მითხარი, თუ იცი ეს ყველაფერი?

¹⁹სად არის გზა ნათლის სავანისა? და სად არის წყვდიადის ადგილი?

²⁰რომ დაიჭირო თავის საზღვართან და მიაგნო მისი სახლის ბილიკებს.

²¹შენ იცი, რადგან მაშინ დაიბადე, და დიდია რიცხვი შენი დღეებისა!

²²თუ შესულხარ თოვლის საგანძურებში, და სეტყვის საგანძურები თუ გიხილავს,

²³ძნელბედობისთვის რომ მოვიმარაგე, ბრძოლისა და ომის დღისათვის?

²⁴რა გზით ნაწილდება ნათელი, და როგორ ვრცელდება აღმოსავლის ქარი მიწაზე?

²⁵ვინ გახსნა სადინარი ნიაღვრისათვის და გზა — ჭექა-ქუხილთათვის,

²⁶რომ აწვიმოს უკაცრიელ მიწაზე და უდაბნოში, სადაც ადამიანის ჭაჭანება არ არის?

²⁷რათა გააძღოს უდაბური და ხრიოკი და აღმოაცენოს მწვანე ჯეჯილი.

²⁸თუ ჰყავს წვიმას მამა? ან ვინ დაბადა ნამის წვეთები?

²⁹და ყინული ვისი საშოდან გამოვიდა? და ციური ჭირხლი ვინ დაბადა?

³⁰წყალი ქვასავით იყინება, და იკვრის უფსკრულის ზედაპირი.

³¹თუ შეკრავ ხომლის საკვრელებს ან ორიონის საბელებს თუ გახსნი?

³²თუ ამოიყვან თანავარსკვლავედს თავის დროზე, და თუ წარუძღვები დათვს თავის ბელებთან ერთად?

³³თუ იცი ცათა კანონები? ან თუ დაადგენ მის წესს მიწაზე?

³⁴ღრუბელს თუ მიუწვდენ ხმას, რათა წყლის თქეშმა დაგფაროს?

³⁵ელვებს თუ წარავლენ, რომ წავიდნენ და გითხრან: ‘აქა ვართ?’

³⁶ვინ ჩადო გულში სიბრძნე? და ვინ მისცა გონებას გამჭრიახობა?

³⁷ვინ დათვლის ღრუბლებს სიბრძნით, და ვინ წამოაქცევს ცის რუმბებს,

³⁸როცა მტვერი შენივთდება და გოროხები ერთმანეთს ეწებება?

³⁹ნუთუ შენ უნადირებ ლომს მსხვერპლს, და შიმშილს უკლავ ლომის ბოკვერებს,

⁴⁰როცა ბუნაგებში გაწოლილან ან წვანან თავიანთ საფარში?

⁴¹საზრდოს ვინ უმზადებს ყორანს, როცა მისი ბახალები ღმერთს შესჩხავიან, და უსაზრდოოდ დაძრწიან?“